ကီၢ်ခီဒီးကီၢ်စဲၣ် ၆ ခါအပူၤ ဂ့ၢ်၀ီတၢ်လီၢ် ၅ ခါဒီးခၢၣ်စး ၇၀ ဘျဲၣ် KPP ကနုာ်လီၤတပြၢ

လါယူၤလံ ၂၇ သီႇ ၂၀၂၀ နံၣ်ႇ နါ၀့ၤဖၠိစၣ်

ကညီကမျၢၢ်ပၣ်တံၣ် (KPP) အံၤ နံၣ်လၢကဟဲ ၂၀၂၀ တၢ်ဃုထၢဖးဒိၣ်ပူၤ ကညီကလုာ်လၢအအိၣ်ဆိးအါကတၢၢ်လၢအမ့ၢ် ကီၢ်ခီဒိၣ်ဒီးကီၢ်စဲၣ် ၆ ခါအပူၤႇ ကညီကလုာ်ဒူၣ်ဂ့ၢ်၀ီကိတိာ် တၢ်လီၢ် ၅ ခါ ဃုာ်ဒီး ခၢၣ်စး (၇၀)ဂၤဘျဲၣ် ကနုာ်လီၤဒိးတပြၢအသးလီၤအဂ့ၢ်န့ၣ် လီၢ်ခၢၣ်သးပၢဆှၢရဲၣ်ကျဲၤကရူၢ် စံး၀ဲန့ၣ်လီၤႉ

KPP အံၤ ၀့ၢ်တကူၣ်ကီၢ်ခီဒိၣ် ကညီဂ့ၢ်၀ီခၢၣ်စးအဂီၢ် မါသါ၀့အူ ကနုာ်လီၤတပြၢ၀ဲဒီး မ့မ့ၢ်အ့ၣ်ယၣ်၀တံၣ်ကီၢ်ခီဒိၣ်ပူၤန့ၣ် နၣ်ခ့ၤအ့အူႇ မိၣ်ကီၢ်စဲၣ်ပူၤန့ၣ် နီၢ်ဆၣ်ထူဒီး တနီသရံၣ်ပူၤန့ၣ် စီၤဟၤဘံၤ ၦၤတဖၣ်အံၤကနုာ်လီၤတပြၢအသးန့ၣ်လီၤႉ

အ့ၣ်ယၣ်၀တံၣ်ကီၢ်ခီဒိၣ်အပူၤ ၦၤလၢကနုာ်လီၤတပြၢလၢကညီဂ့ၢ်၀ီ ပၣ်တံၣ်နဲၣ်ရွဲၣ်–၁ နၣ်ခ့ၤအ့အူ စံး၀ဲ “ကညီကမျၢၢ်အံၤ အဲၣ်ဒိး၀ဲဒၣ်လၢယကနုာ်လီၤတပြၢ၀ဲဒၣ်လီၤႉ အ၀ဲသ့ၣ်အတၢ်အဲၣ်ဒိးန့ၣ် ဟ့ၣ်ဂံၢ်ဟ့ၣ်ဘါ၀ဲယၤလီၤႉ ပ၀ဲဒၣ်ဒု ပဂံၢ်ပဘါတအိၣ်၀ဲဒ်သိးဒီးပၣ်တံၣ်ဖးဒိၣ်အသိးဘၣ်မီၤႉ ဘၣ်ဆၣ် ပကဘၣ်ဟံးန့ၢ်၀ဲ ကညီကမျၢၢ်ကလုာ်အတၢ်ဂံၢ်တၢ်ဘါဒီး ကဘၣ်လဲၤ၀ဲလီၤမီၤ” အဂ့ၢ်န့ၣ် စံးဘၣ်ခ့ၣ်အဲးစံၣ် ဖဲလါယူၤလံ ၂၄ သီအနံၤန့ၣ်လီၤႉ

ဒ်န့ၣ်အသိး KPP အံၤ အ၀ဲသ့ၣ်ဟီၣ်က၀ီၤလၢအမ့ၢ် ကညီကီၢ်စဲၣ် သၣ်တီၣ်ကၠံကီၢ်ဆၣ်ပူၤ လၢကလုာ်ဘျီၣ်ဒိၣ်အဂီၢ် စီၤဒီၤပလဲႇ ကမျၢၢ်ဘျီၣ်ဒိၣ်အလီၢ်န့ၣ် ပၣ်တံၣ်ၦၤပၢၤလီၢ်ဆ့ၣ်နီၤ စီၤထိအီၤမၠ့ၣ်ႇ မ့မ့ၢ်လၢကီၢ်စဲၣ်ဘျီၣ်ဒိၣ်အဂီၢ် စီၤကၠ့ၤအ့ၤ၀့မၠ့ၣ် ဒီး စီၤခရံာ်တိၤဖၢၤရှွ့ၣ်တဖၣ် ကနုာ်လီၤတပြၢ၀ဲဒၣ်စုာ်စုာ်လီၤအဂ့ၢ်န့ၣ် သ့ၣ်ညါဘၣ်လီၤႉ

ကညီထံရူၢ်ကီၢ်သဲးပၣ်တံၣ် ၄ ပၣ်တံၣ် လၢကနုာ်လီၤတၢ်ဃုထၢန့ၣ် ကညီကမျၢၢ်ပၣ်တံၣ် (KPP) အံၤ မ့ၢ်ကညီပၣ်တံၣ်လၢ ခၢၣ်စးအအါကတၢၢ်လၢကနုာ်လီၤတပြၢအသးဒီး ခၢၣ်စးလၢကနုာ်လီၤတပြၢအသးအစရီလီၤတံၢ်လီၤဆဲးန့ၣ် တၢ်ကထုးထီၣ်ပာ်ဖျါ၀ဲဒၣ် ဖဲလါယူၤလံအလီၢ်ခံကတၢၢ်တနွံလီၤအဂ့ၢ်န့ၣ် ပၣ်တံၣ်ၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ

KPP အံၤ ဖဲ ၂၀၂၀ နံၣ်ႇ လါမ့ၤ တၢ်စးထီၣ်ဒုးအိၣ်ထီၣ်ပၣ်တံၣ်၀ံၤအလီၢ်ခံ ၂၀၁၀ တၢ်ဃုထၢဖးဒိၣ်အပူၤ မၤနၢၤ၀ဲတၢ်လၢတၢ်လီၢ် ၆ တီၤ ဒီး ၂၀၁၅ တၢ်ဃုထၢပူၤန့ၣ် သၣ်တီၣ်ကၠံကီၢ်စဲၣ်ဘျီၣ်ဒိၣ်တၢ်လီၢ်တတီၤ မၤနၢၤ၀ဲဒၣ်တၢ်ဖးဒီး မ့ၢ်ကညီပၣ်တံၣ်လၢအမၤနၢၤ၀ဲဒၣ်တၢ်ဃုထၢခံဘျီလၢာ်န့ၣ်လီၤႉ