ပယီၤသုးခးသံ၀ဲကညီပိာ်မုၣ်တဂၤအဖီခိၣ် လီၢ်က၀ီၤဖိလၢအကထိပာ်ဖျါထီၣ်တၢ်ဘၣ်သး

လါယူၤလံ ၂၂ သီႇ ၂၀၂၀ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇ ဖၣ်ပူၣ်(မုၢ်တြီၢ်)ကီၢ်ရ့ၣ်ႇ ဒွဲၣ်လိကီၢ်ဆၣ်ႇ ခူၣ်သူၣ်ထၣ်သ၀ီကရူၢ်အပူၤ ပယီၤသုးဖိ ၂ ဂၤခးသံ၀ဲဒၣ်သ၀ီဖိပိာ်မုၣ်တဂၤကဲထီၣ်သး၀ံၤအလီၢ်ခံ ဖဲတနံၤအံၤ(လါယူၤလံ ၂၂ သီ)အနံၤန့ၣ် လီၢ်က၀ီၤသ၀ီဖိလၢအကထိပာ်ဖှိၣ်ထီၣ်သးဒီး ပာ်ဖျါထီၣ်အတၢ်ဘၣ်သးတခါကဲထီၣ်သးန့ၣ်လီၤႉ

ပယီၤသုးကလၢၤလၢအအိၣ်ဆီလီၤအသးဖဲခူၣ်သူၣ်ထၣ်သ၀ီကရူၢ်တဖၣ်လၢအမ့ၢ် ၀ီၢ်မုၢ်ႇ ခူၣ်သူၣ်ထၣ်ႇ က့ၣ်ကိာ်ႇ မဲၤ၀့ၤ သုးကလၢၤ ၄ ခါအံၤအမဲာ်ညါ လီၢ်က၀ီၤသ၀ီဖိ ၁ႇ၅၀၀ ဘျဲၣ် ဒ်သိးပယီၤသုးကလၢၤတဖၣ် ကဟးထီၣ်ကွံာ်အဂီၢ် စိာ်ထီၣ်၀ဲဒၣ်လံာ်က့ ဖိးစထၢၣ်တဖၣ်ဒီး ဃ့ထီၣ်ပာ်ဖျါထီၣ်၀ဲအသးန့ၣ်လီၤႉ

ဖဲအပူၤကွံာ် လါယူၤလံ ၁၆ သီအနံၤ တၢ်ကဲထီၣ်သးလၢပယီၤသုးဖိ ၂ ဂၤ ခးသံ၀ဲဒၣ်ပိာ်လိထၣ်သ၀ီ ဖိ ကညီမုၣ် နီၢ်မုၣ်နီၤ၀ံၤ ဟံ၀ဲဒၣ်အဖဲထူနၢ်ဒံးတဖၣ်အမဲာ်ညါႇ ဖဲတနံၣ်အံၤ ၂၀၂၀ အတီၢ်ပူၤ ပယီၤသုးအံၤ ခးလီၤ၀ဲဒၣ်ကျိဖးဒိၣ်လၢသ၀ီပူၤအိၣ်၀ဲအဖီခိၣ် ကဲထီၣ်၀ဲဒၣ်တၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးလၢဒူဖိသ၀ီဖိအဂီၢ် လီၤအဂ့ၢ်န့ၣ် လံာ်တၢ်ပာ်ဖျါလၢအဘၣ်ထွဲဒီးတၢ်ပာ်ဖျါထီၣ်သးတနံၤအပူၤ ပာ်ဖျါဃာ်၀ဲလီၤႉ

လၢန့ၣ်အမဲာ်ညါ သုးကလၢၤတဖၣ်မ့ၢ်ဆဲးအိၣ်ဒံး၀ဲဒၣ်န့ၣ် လီၢ်က၀ီၤဖိတဖၣ်အတၢ်ဘံၣ်တၢ်ဘၢအဂီၢ် တၢ်ဘၣ်ယိၣ်ဘၣ်ဘှီအိၣ်၀ဲဒၣ်အသိး တၢ်မၤသံ၀ဲလီၢ်က၀ီၤသ၀ီဖိတဖၣ်စ့ၢ်ကီး ဟဲကဲထီၣ်ကဒါအသးသ့၀ဲအဃိ သုးကလၢၤလၢအိၣ်တၢ်လီၢ်ဖဲအံၤတဖၣ် ကဂုၤကဒါက့ၤခံဟးထီၣ်ကွံာ်အဂီၢ် ဃ့ထီၣ်၀ဲလီၤအဂ့ၢ်န့ၣ် ၦၤလၢအတီခိၣ်ရိၣ်မဲတၢ်ပာ်ဖျါထီၣ်သးတဖၣ် စံး၀ဲလီၤႉ