Home တၢ်ကစီၣ် JMC-U တၢ်အိၣ်ဖှိၣ် လၢဆိကတီၢ်သးလၢ ၂ နံၣ်ဃၣ်ဃၣ် တၢ်က့ၤစးထီၣ်ကဒါ

JMC-U တၢ်အိၣ်ဖှိၣ် လၢဆိကတီၢ်သးလၢ ၂ နံၣ်ဃၣ်ဃၣ် တၢ်က့ၤစးထီၣ်ကဒါ

232
0

လါယူၤလံ ၈ သီႇ ၂၀၂၀ နံၣ်ႇ စီၤထိလ့

ကီၢ်စၢဖှိၣ်အပတီၢ် တၢ်ခိးကွၢ်ဟုၣ်ကွၢ်စူၣ်တၢ်ပတုာ်တၢ်ခးသဃဲၤ ကမံးတံာ် (JMC-U) ၁၉ ၀ီတ၀ီ တၢ်အိၣ်ဖှိၣ် လၢအဆိကတီၢ်သးခံနံၣ်ဃၣ်ဃၣ်အံၤ ဖဲလါယူၤလံ ၇ သီအနံၤန့ၣ် တၢ်စးထီၣ်မၤ၀ဲတၢ်အိၣ်ဖှိၣ်ဖဲ န့ၣ်ပၠံၣ်တီၣ်ႇ Horizon Lake View Hotel န့ၣ်လီၤႉ

ဖဲအပူၤကွံာ် ၂၀၁၈ နံၣ်အတီၢ်ပူၤန့ၣ် ဘၣ်ထွဲ NCA တၢ်မၤလိၣ်ထီၣ်ဖးထီၣ် တၢ်တၢၣ်ပီၣ်တဲသကိးတဖၣ်အပူၤန့ၣ် တၢ်ထိၣ်ဃူထိၣ်ဖိးအကတီၢ် တၢ်ကတာ်ထီဃာ်အသးတဖၣ်အိၣ်ထီၣ်၀ဲအဃိႇ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒီး RCSS တဖၣ် ဘၣ်ပတုာ်ဃာ်၀ဲ ထံရူၢ်ကီၢ်သဲးတၢ်တၢၣ်ပီၣ်တဲသကိးတဖၣ်အံၤ တစိၢ်တလီၢ်အသိးႇ JMC တၢ်တၢၣ်ပီၣ်တဲသကိးတဖၣ်စ့ၢ်ကီး တၢ်ပတုာ်စိဃာ်၀ဲတစိၢ်တလီၢ်၀ံၤအလီၢ်ခံ တၢ်က့ၤမၤကဒါ JMC-U တၢ်အိၣ်ဖှိၣ် ဒ်အခဲအံၤလီၤအဂ့ၢ်န့ၣ် JMC-U ၦၤပၢၤလီၢ်ဆ့ၣ်နီၤ =၂ တၢတဂၤ သုးခိၣ်ကျၢၢ် စီၤအါစဲးဖိ စံး၀ဲလီၤႉ

“တၢ်သးလီၤပလိာ်လၢအပၣ်ဃုာ်၀ဲဒၣ်လၢ NCA အပူၤတဖၣ် တၢ်ကဘၣ်ပာ်ပနီၣ်၀ဲႇ တၢ်ကဘၣ်ပာ်ကဲႇ တၢ်သ့ဟံးမူဒါႇ မူဒါလၢအလီၤဘၣ်ၦၤတဖၣ် တၢ်ကတၢၣ်ပီၣ်တဲသကိး၀ဲဒီး လၢနီၢ်တဂၤအသိးမ့ၢ်ဂ့ၤႇ တၢ်ကရၢကရိတခါဒီးတခါအဖီခိၣ်မ့ၢ်ဂ့ၤႇ မ့ၢ်ပာ်ဒ့ၣ်ပာ်ကမၣ်ပဲာ်ဖးနီၤဖးအီၤအလီၢ် တၢ်လၢပလဲၤခီဖျိဘၣ်တၢ်ဂ့ၢ်တၢ်ကျိၤတဖၣ်န့ၣ် ထိၣ်ဃူဒီးဘှါရှဲအီၤလၢတၢ်သူၣ်အိၣ်သးအိၣ်အပူၤအဂီၢ် လိၣ်၀ဲဒၣ်လီၤန့ၣ် အဲၣ်ဒိးဆီၣ်တခူထီၣ်လီၤ”အဂ့ၢ်န့ၣ် သုးခိၣ်ကျၢၢ် စီၤအါစဲးဖိ စံးလီၤ၀ဲဖဲတၢ်အိၣ်ဖှိၣ်အပူၤန့ၣ်လီၤႉ

၁၉ ၀ီတ၀ီ JMC-U တၢ်အိၣ်ဖှိၣ်အပူၤ အပူၤကွံာ်တၢ်အိၣ်ဖှိၣ်တဖၣ် တၢ်သးလီၤပလိာ်လၢအမ့ၢ် လီၢ်က၀ီၤဖိ တအိၣ်ခိးကွၢ်ဟုၣ်ကွၢ်စူၣ်တၢ်ကရူၢ်တဖၣ် တၢ်ကဒုးအိၣ်ထီၣ်တၢ်ဂ့ၢ်ႇ ၂၀၂၀=၂၁ ကျိၣ်စ့အနံၣ်အဂီၢ် တၢ်တိာ်ပာ်တၢ်ပာ်ကီၤစ့ႇ JMC အရူအဂီၢ် ပဒိၣ်တပၤဆှၢနုာ်လီၤ ပၢဆှၢရဲၣ်ကျဲၤၦၤနဲၣ်တၢ်ခိၣ်အံၤ တၢ်ကပာ်ဂၢၢ်ပာ်ကျၢၤအဂီၢ်ႇ ပၢဆှၢရဲၣ်ကျဲၤၦၤနဲၣ်တၢ်ခံဂၤတဂၤန့ၣ် ကလုာ်ဒူၣ်ဖီၣ်စုက၀ဲၤကရူၢ်တကပၤ တၢ်ကဃုထၢဒီးတူၢ်လိာ်၀ဲဒၣ်တၢ်ဂ့ၢ်သ့ၣ်တဖၣ် တၢ်ကတၢၣ်ပီၣ်တဲသကိး၀ဲန့ၣ်လီၤႉ

လၢန့ၣ်အမဲာ်ညါ JMC တၢ်ဖံးတၢ်မၤတၢ်နဲၣ်ကျဲဒီး တၢ်မၤအကျိၤအကွာ်တဖၣ်န့ၣ် တၢ်က့့ၤပဲာ်ထံနီၤဖးက့ၤ၀ဲ ႇ JMC-S တၢ်အိၣ်ဖှိၣ်တဖၣ် တၢ်ကဆဲးမၤ၀ဲဒ်လဲၣ် တၢ်ဂ့ၢ်တၢ်ကျိၤတဖၣ်ႇ တၢ်ကမၤ၀ဲ JMC ကမျၢၢ်တၢ်အိၣ်ဖှိၣ်တဖၣ်န့ၣ် တၢ်ကဘၣ်ဆီလီၤ၀ဲဒၣ်ကျဲသနူဒီး ဆူညါတဘျီ JMC-U တၢ်အိၣ်ဖှိၣ်တဖၣ် တၢ်ကမၤ၀ဲအဆၢကတီၢ်ဒီးတၢ်လီၢ်တဖၣ်န့ၣ် တၢ်ကပာ်ပနီၣ်၀ဲတၢ်ဂ့ၢ်တဖၣ် တၢ်ကတၢၣ်ပီၣ်တဲသကိး၀ဲန့ၣ်လီၤႉ

JMC-U ၁၈ ၀ီတ၀ီ တၢ်အိၣ်ဖှိၣ်အံၤ စးထီၣ်ဖဲ ၂၀၁၈ နံၣ်ႇ လါစဲးပထ့ဘၢၣ် ၁၂ သီ တုၤလၢ ၁၄ သီအနံၤ တၢ်မၤ၀ဲဒၣ် ဖဲ၀့ၢ်တကူၣ်ႇ ရှွ့ၣ်လံၣ်ကျဲ ကလုာ်ဘၣ်လိာ်ဖိးမံဒီးတၢ်မုာ်တၢ်ခုၣ်အ၀ဲၤလီၢ်အံၤ ၀ံၤအလီၢ်ခံ ပဒိၣ်ႇသုးမုၢ်ဒိၣ် ဒီး ကလုာ်ဒူၣ်ဖီၣ်စုက၀ဲၤလၢအဆဲးလီၤစုမုၢ်ကျၢၢ်တဖၣ်အဘၢၣ်စၢၤ ထံရူၢ်ကီၢ်သဲးတၢ်တၢၣ်ပီၣ်တဲသကိးတဖၣ် အိၣ်ကတာ်ထီသးအဃိ ဆိကတီၢ်သးယံၤ၀ဲဒၣ်လၢ ၂ နံၣ်ဃၣ်ဃၣ်ညါလီၤႉ တကီၢ်ခါ JMC-U ၁၉ ၀ီတ၀ီ တၢ်အိၣ်ဖှိၣ်အံၤ တၢ်မၤ၀ဲဒၣ်လၢန့ၣ်ပၠံၣ်တီၣ် စးထီၣ် ဖဲလါယူၤလံ ၇ သီ တုၤလၢ ၈ သီအနံၤန့ၣ်လီၤႉ