Home တၢ်ကစီၣ် KNP ကနုာ်လီၤတပြၢ၀ဲတၢ်လီၢ် ၃ တီၤ လၢကရ့ၣ်နံၣ်ကီၢ်စဲၣ် ဖါစီကီၢ်ဆၣ်

KNP ကနုာ်လီၤတပြၢ၀ဲတၢ်လီၢ် ၃ တီၤ လၢကရ့ၣ်နံၣ်ကီၢ်စဲၣ် ဖါစီကီၢ်ဆၣ်

214
0
Photo: KNP

လါယူၤလံ ၂၁ သီႇ ၂၀၂၀ နံၣ်ႇ စီၤထိလ့

ကရ့ၣ်နံၣ်ကီၢ်စဲၣ်(ကယါ)ႇ ဘီၤလၣ်ခဲကီၢ်ရ့ၣ်ႇ ဖါစီ၀့ၢ်ပူၤန့ၣ်် ကညီကလုာ်ပၣ်တံၣ် (KNP) အံၤ နံၣ်လၢကဟဲ ၂၀၂၀ တၢ်ဃုထၢန့ၣ် ကနုာ်လီၤတပြၢ၀ဲတၢ်လီၢ် ၃ တီၤအဂ့ၢ်န့ၣ် ဖါစီကီၢ်ဆၣ်ႇ ၦၤပၢၤလီၢ်ဆ့ၣ်နီၤ စီၤဘံၤ၀ါ စံးဘၣ်ခ့ၣ်အဲးစံၣ် ဖဲလါယူၤလံ ၂၀ သီအနံၤန့ၣ်လီၤႉ

ဖါစီအပူၤ KNP ကနုာ်လီၤတပြၢ၀ဲလၢ ကလုာ်ဘျီၣ်ဒိၣ်ခၢၣ်စး ၁ ဂၤႇ ကမျၢၢ်ဘျီၣ်ဒိၣ်ခၢၣ်စးတၢ်လီၢ်တတီၤဒီး လၢကီၢ်စဲၣ်ဘျီၣ်ဒိၣ်အဂီၢ် ကနုာ်လီၤတပြၢ၀ဲလၢတၢ်လီၢ်တတီၤအဃိ ခၢၣ်စးလၢကနုာ်ဒိးဃုထၢအသးတဖၣ်န့ၣ် မ့ၢ်၀ဲဒၣ်ထဲပိာ်ခွါတဖၣ်လီၤအဂ့ၢ်န့ၣ် KNP ဖါစီကီၢ်ဆၣ် ပၢဆှၢတၢ်ကမံးတံာ်ဒီး ပၣ်တံၣ်၀ဲၤကျိၤခိၣ် ခိၣ်နၢ်ဒိၣ်ထီတဖၣ် စံး၀ဲန့ၣ်လီၤႉ

“လၢပကီၢ်ဆၣ်အပူၤန့ၣ် တနီၤန့ၣ် စီၤစုၤ၀ဲဒၣ်ဒီးပၣ်တံၣ်ထံရူၢ်ကီၢ်သဲးအနံၣ် ၇၀န့ၣ် အိၣ်၀ဲဒၣ်လီၤႉ တနီၤစ့ၢ်ကီး စီၤစုၤ၀ဲဒၣ်ဒီးကညီပၣ်တံၣ်စ့ၢ်ကီး အိၣ်၀ဲလီၤႉ ဘၣ်မနုာ်အဃိလဲၣ်န့ၣ် ပၣ်တံၣ်ဖးဒိၣ်တဖၣ်ဒီး ပၣ်တံၣ်လၢ အအိၣ်ဆီလီၤအသးဖဲကီၢ်စဲၣ်တဖၣ်စ့ၢ်ကီးအိၣ်၀ဲအဃိ စီၤစုၤ၀ဲဒၣ်ဒီးကညီကလုာ်ပၣ်တံၣ်န့ၣ် အိၣ်၀ဲလီၤႉ တၢ်လီၢ်သၢတီၤလၢာ်အဂီၢ် ကဂုာ်ကျဲးစၢးလၢအဂ့ၤကတၢၢ်လီၤႉ ကန့ၢ်အဂီၢ် ပမုၢ်လၢ်ပာ်၀ဲဒၣ်လီၤ” အဂ့ၢ်န့ၣ် စီၤဘံၤ၀ါ စံး၀ဲလီၤႉ

ကညီကလုာ်ပၣ်တံၣ်အံၤ အိးထီၣ်၀ဲဒၣ်ကီၢ်ဆၣ်ပၢဆှၢတၢ်ကမံးတံာ်ကရူၢ်အရူအံၤဖဲ ကရ့ၣ်နံၣ်ကီၢ်စဲၣ်ႇ ဖါစီကီၢ်ဆၣ်ပူၤ ဖဲ ၂၀၁၉ နံၣ်ႇ လါဒံၣ်စ့ဘၢၣ် ၂၄ သီအနံၤ ၀ံၤအလီၢ်ခံႇ လၢကနုာ်လီၤတၢ်ဃုထၢဒ်အခဲအံၤအဂီၢ် ထိၣ်ဃူထိၣ်ဖိးဒီးဆၢတဲာ်လီၤ၀ဲဒၣ်အသိးႇ ကညီထံရူၢ်ကီၢ်သဲးပၣ်တံၣ်တဖၣ်ကနုာ်လီၤဒိးဃုထၢအသး လၢကရ့ၣ်နံၣ်ကီၢ်စဲၣ်ပူၤ မ့ၢ်၀ဲအဆိကတၢၢ်တဘျီစ့ၢ်ကီးလီၤႉ

ကရ့ၣ်နံၣ်ကီၢ်စဲၣ်ႇ ဘီၤလၣ်ခဲကီၢ်ရ့ၣ်ႇ ဖါစီကီၢ်ဆၣ်ပူၤ ဒ်ပၢပြးတီခိၣ်ရိၣ်မဲ၀ဲၤကျိၤ ထုးထီၣ်ပာ်ဖျါ၀ဲတုၤလၢ ၂၀၁၉ နံၣ် စရီအသိး ၦၤနီၣ်ဂံၢ်ပာ်ဖှိၣ်ခဲလၢာ်အိၣ်၀ဲ ၂၃ႇ၄၈၅ ဂၤဒီး ကညီကလုာ်အိၣ်၀ဲ ၁၄ႇ၈၆၃ ဂၤဒီး ကီၢ်ဆၣ်ၦၤနီၣ်ဂံၢ်ပာ်ဖှိၣ်ခဲလၢာ်န့ၣ် (၆၃ႉ၂၆)မျးကယၤ အဂ့ၢ် သ့ၣ်ညါဘၣ်လီၤႉ လၢန့ၣ်အမဲာ်ညါ ဖဲ၂၀၁၅ နံၣ် တၢ်ဖးစရီအသိး ဖါစီကီၢ်ဆၣ်ပူၤ ၦၤဟ့ၣ်တၢ်ဖးဖိတဖၣ်အိၣ်၀ဲ ၁၂ႇ၄၆၉ ဂၤ အဂ့ၢ်န့ၣ် တၢ်ဃုထၢခီမံရှၢၣ်တဖၣ် ထုးထီၣ်ပာ်ဖျါ၀ဲန့ၣ်လီၤႉ

ကရ့ၣ်နံၣ်ကီၢ်စဲၣ်ႇ ဖါစီကီၢ်ဆၣ်အပူၤ ဖဲ ၂၀၁၀ တၢ်ဃုထၢန့ၣ် ကီၢ်စၢဖှိၣ်သွံၣ်ဃူဖိးဒီး တၢ်ဂုၤထီၣ်ပသီထီၣ်ပၣ်တံၣ်အံၤ မၤနၢၤ၀ဲတၢ်အသိးႇ ဖဲ ၂၀၁၅ တၢ်ဃုထၢန့ၣ် ဒီကလုုာ်ဒံၣ်မိၣ်ခြ့ၣ်စံၣ်ကရၢစိ(အဲၣ်အဲလ်ဒံၣ်)ပၣ်တံၣ် မၤနၢၤ၀ဲတၢ်စုာ်စုာ်န့ၣ်လီၤႉ