Home တၢ်ကစီၣ် KNU လီၢ်ခၢၣ်သးကမံးတံာ်လီၢ်လံၤ ပဒိၣ်မါည့မီၣ် ကနုာ်လီၤတၢ်ဃုထၢဒ် KPP ပၣ်တံၣ်ခၢၣ်စးအသိး

KNU လီၢ်ခၢၣ်သးကမံးတံာ်လီၢ်လံၤ ပဒိၣ်မါည့မီၣ် ကနုာ်လီၤတၢ်ဃုထၢဒ် KPP ပၣ်တံၣ်ခၢၣ်စးအသိး

144
0

လါယူၤလံ ၂၉ သီႇ ၂၀၂၀ နံၣ်ႇ စးဖါရှီ

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ လီၢ်ခၢၣ်သးကမံးတံာ်လီၢ်လံၤ ပဒိၣ်မါည့မီၣ်အံၤ နံၣ်လၢကဟဲ ၂၀၂၀ တၢ်ဃုထၢဖးဒိၣ်အပူၤ ကနုာ်လီၤဃုထၢတပြၢအသးဒ် ကညီပၣ်တံၣ်တခါလၢအမ့ၢ် ကညီကမျၢၢ်ပၣ်တံၣ် -KPP ခၢၣ်စးတဂၤအသိးန့ၣ်လီၤႉ

တၢ်ကစီၣ်ဟူထီၣ်သါလီၤ၀ဲဒၣ်လၢ ကနုာ်လီၤဒိးဃုထၢအသးလၢနီၢ်တဂၤခၢၣ်စး မ့တမ့ၢ် ကညီပၣ်တံၣ်တခါခါအခၢၣ်စး၀ံၤအလီၢ်ခံႇ ဖဲလါယူၤလံ ၂၇ သီအနံၤန့ၣ် လၢအ၀ဲဒၣ်တကပၤ ကနုာ်လီၤတပြၢအသးဒ် ကညီကမျၢၢ်ပၣ်တံၣ် -KPP ခၢၣ်စးအသိးအဂ့ၢ်န့ၣ် ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်လီၤႉ

ပဒိၣ်မါည့မီၣ် စံး၀ဲ“ကနုာ်လီၤတပြၢလၢ KPP န့ၣ် မ့ၢ်၀ဲလီၤႉ ဘၣ်မနုာ်အဃိလၢယဘၣ်နုာ်လီၤလၢ KPP အပူၤလဲၣ်န့ၣ် အပူၤကွံာ် ၂၀၁၅ နံၣ်လံၤလံၤန့ၣ် KPP အံၤ ဟဲဃ့ကညးၦၤလီၤႉ လီၤဆီဒၣ်တၢ် ဖါတံၢ်ရှွ့ၣ်မီ(ဒူပျာ်ယာ် ကီၢ်ရ့ၣ်ခိၣ်)ဒီး ယၤလီၤမီၣ်ႉ ဖဲန့ၣ်ဆၢကတီၢ်ခါန့ၣ် ဟဲပာ်ဖှိၣ်မၤသကိးတၢ်ဒီးၦၤအဂီၢ် ပၣ်တံၣ်ၦၤပၢၤလီၢ်ဆ့ၣ်နီၤနီၢ်ကစၢ်ဒၣ်၀ဲစ့ၢ်ကီး တဲ၀ဲထီဘိလီၤႉ ခဲအံၤယဟးထီၣ်လၢၦၢ်ပူၤတဘျီဃီ ဆဲးယၤလီတဲစိလီၤႉ ခိးသဂၢၢ်၀ဲယၤလီၤႉ ဘၣ်ထွဲဒီးပၣ်တံၣ်န့ၣ် တၢၣ်ပီၣ်တဲသကိး၀ဲလီၤႉ ခီဖျိလၢဟဲဃ့ထီၣ်လၢကဟဲပာ်ဖှိၣ်ထီၣ်သးဒီးအ၀ဲသ့ၣ်ပၣ်တံၣ်အဃိ လီၢ်ခံကတၢၢ်န့ၣ် ယဃုထၢလၢပၣ်တံၣ်န့ၣ်လီၤႉ အိၣ်ကတီၤထီၣ်သးဘူးထီၣ်လၢ၀ံၤ၀ဲလံလီၤႉ တၢ်ဃုထၢခီမံၣ်ရှၢၣ်မ့ၢ်ဂ့ၤႇ ကီၢ်ဆၣ်ႇ ကီၢ်ရ့ၣ်တၢ်ဃုထၢခီမံရှၢၣ်စ့ၢ်ကီး သဂၢၢ်လီၤၦၤလၢမုာ်မုာ်ခုၣ်ခုၣ်န့ၣ်လီၤ” အဂ့ၢ်န့ၣ် စံး၀ဲလီၤႉ

လၢန့ၣ်အမဲာ်ညါ ကီၢ်ပူၤထံရူၢ်ကီၢ်သဲးတၢ်အိၣ်သးႇ ကညီထံရူၢ်ကီၢ်သဲးပၣ်တံၣ်အတၢ်အိၣ်သးတဖၣ်အံၤ အပူၤကွံာ် ခီဖျိလၢပတသ့ၣ်ညါလီၤတံၢ်လီၤဆဲးဘၣ်အဃိ လၢကနုာ်လီၤတပြၢသးနီၢ်တဂၤခၢၣ်စးအဂီၢ် တၢ်ဆိကမိၣ် အိၣ်၀ဲဘၣ်ဆၣ် ကဘၣ်ပာ်ဖှိၣ်ထီၣ်သးဒီးကညီပၣ်တံၣ်တခါခါမး ကတုၤထီၣ်ထီၣ်ဘး၀ဲဒၣ်ဒီး တၢ်ကဲဘျုးကဲဖှိၣ်ကအိၣ်၀ဲလီၤန့ၣ် ထံၣ်ဆိကမိၣ်အဃိဆၢတဲာ်လီၤ၀ဲဒၣ်ဒ်အံၤလီၤအဂ့ၢ်န့ၣ် ပဒိၣ်မါည့မီၣ် ဆဲးစံး၀ဲလီၤႉ

တကီၢ်ခါ ကညီထံရူၢ်ကီၢ်သဲးပၣ်တံၣ် လၢအအိၣ်ဆီလီၤအသးဖဲကညီကီၢ်စဲၣ်န့ၣ် မ့ၢ်၀ဲ ကညီကလုာ်ဒံၣ်မိၣ်ကရဲၣ်တ့ၣ်ပၣ်တံၣ် -KNDP˜ ဖျိၤ–စှီၤဒံၣ်မိၣ်ကရဲၣ်တ့ၣ်ပၣ်တံၣ် -PSDP ဒီး ၀့ၢ်တကူၣ်ႇအ့ၣ်ယၣ်၀တံၣ်အပူၤန့ၣ် ကညီကလုာ်ပၣ်တံၣ် -KNP˜ ကညီကမျၢၢ်ပၣ်တံၣ် -KPP ကညီထံရူၢ်ကီၢ်သဲးပၣ်တံၣ် အိၣ်၀ဲ ၄ ခါလီၤႉ

ကညီကမျၢၢ်ပၣ်တံၣ် -KPP နဲၣ်ရွဲၣ်သဃဲၤ(၁)နၣ်ခ့ၤအ့အူ စံး၀ဲ “တၢ်အ၀ဲန့ၣ် မ့ၢ်၀ဲလီၤႉ အခီၣ်ထံးန့ၣ် တလီၤတံၢ်ဒံးဘၣ်အဃိ ပတထုးဖျါထီၣ်ဘၣ်လီၤႉ ခဲအံၤကနုာ်လီၤ၀ဲဒၣ်လၢ KPP အပူၤလီၤန့ၣ် လီၤတံၢ်၀ဲလံလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ပဒိၣ်မါည့မီၣ်အံၤ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအပူၤ မ့ၢ်ၦၤတဂၤလၢ အမၤတ့ၢ် တၢ်ပၢၢ်ဆၢတၢ်ဖံးတၢ်မၤတဆီဘၣ်တဆီန့ၣ်လီၤႉ အ၀ဲကနုာ်လီၤမၤတၢ်လၢ ဘျီၣ်ဒိၣ်ထံရူၢ်ကီၢ်သဲးတကပၤကန့ၢ်အဂီၢ် ဖဲလါယူၤလံ ၂၁ သီ တုၤလၢ ၂၃ သီ တၢ်မၤ၀ဲ ၇ ဘျီတဘျီ ဂ့ၢ်ဂီၢ်အူတၢ်အိၣ်ဖှိၣ်အံၤ ဟးထီၣ်၀ဲဒၣ်လၢခ့ၣ်အဲၣ်ယူၣ်တၢ်ကရၢကရိအပူၤလၢ အဖိးသဲစးစ့ၢ်ကီးန့ၣ်လီၤႉ