Home တၢ်ကစီၣ် ဆီထံးကီၢ်ဆၣ်ပူၤ ၦၤတီခိၣ်ရိၣ်မဲတၢ်ပာ်ဖျါထီၣ်သး ၂ ဂၤ လၢပၢၤကီၢ်ဖီၣ်ဃာ်အံၤ တၢ်ပျၢ်က့ၤလံ

ဆီထံးကီၢ်ဆၣ်ပူၤ ၦၤတီခိၣ်ရိၣ်မဲတၢ်ပာ်ဖျါထီၣ်သး ၂ ဂၤ လၢပၢၤကီၢ်ဖီၣ်ဃာ်အံၤ တၢ်ပျၢ်က့ၤလံ

241
0

လါအီကူး ၇ သီႇ ၂၀၂၀ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ်(ပကိကီၢ်ခီဒိၣ်ႇ ရှွၣ်ကၠ့ၣ်ကီၢ်ဆၣ်)အပူၤ ဒ်သိးပယီၤသုးကထုးကွံာ်သးအဂီၢ် ဖဲမဟါ(လါအီကူး ၆ သီ)ဂီၤခီအဆၢကတီၢ် လီၢ်က၀ီၤဖိမၤ၀ဲဒၣ်တၢ်ပာ်ဖျါထီၣ် တၢ်ဘၣ်သးအံၤ ဖဲန့ၣ်ၦၤလၢအတီခိၣ်ရိၣ်မဲတၢ် ၂ ဂၤ ဘၣ်တၢ်ဖီၣ်အီၤဒီးက့ၤကိးအ၀ဲသ့ၣ်ဆူ ရှွ့ၣ်ကၠ့ၣ်ကီၢ်ဆၣ် ပၢၤကီၢ်ရူဒီး ဖဲတနံၤအံၤ မုၢ်ထူၣ်အဆၢကတီၢ်တၢ်ပျၢ်က့ၤအ၀ဲသ့ၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ

မုၢ်တြီၢ်ကီၢ်ရ့ၣ်ႇ ဒဲလွိကီၢ်ဆၣ် ပိလိထၣ်သ၀ီဖိ နီၢ်မုၣ်နီၤဘၣ်တၢ်ခးသံအီၤအံၤ ဒ်သိးကဒိးန့ၢ်ဘၣ်တၢ်တီတၢ်တြၢ် အဂီၢ်ဒီး တၢ်အိၣ်မူတၢ်ဘံၣ်တၢ်ဘၢကအိၣ်အဂီၢ် ဒ်သိးပယီၤသုးကထုးကွံာ်အသးအဂီၢ် ဖဲမဟါဂီၤခီအဆၢက တီၢ်န့ၣ် ဆီထံးကီၢ်ဆၣ်အပူၤ သ၀ီ ၁၆ ဖျၢၣ် ၦၤနီၣ်ဂံၢ်ခဲလၢာ် ၂၀၀ ဘျဲၣ်အံၤ မၤ၀ဲတၢ်ပာ်ဖျါထီၣ်အသးန့ၣ်လီၤႉ

အ၀ဲသ့ၣ် စးထီၣ်ဟးထီၣ်ပာ်ဖျါထီၣ်တၢ်ဘၣ်သးဖဲ စလူခၠီသ၀ီပူၤ ဒီး ရဲၣ်ကျဲၤပာ်၀ဲလၢကပာ်ဖျါထီၣ်တၢ်ဘၣ်သးဖဲ ဒိၤစယ့ၣ်ႇ ကၠိၣ်ခၠီဒီး ကွ့စ့ၣ် တၢ်လီၢ် ၄ တီၤအံၤအခါ ဖဲလဲၤတုၤ၀ဲကၠိၣ်ခၠီတၢ်လီၢ်အကတီၢ် မုၢ်ဃ့ၢ်လီၤ ၂ နၣ်ရံၣ်ဃၣ်ဃၣ်န့ၣ် ပၢၤကီၢ်သုးက့ၤကိး၀ဲဒၣ် ၦၤလၢအတီခိၣ်ရိၣ်မဲတၢ်လၢအမ့ၢ် စီၤအဲၣ်သဒါဒီး စီၤကၠံၤ၀့ ၂ ဂၤအံၤန့ၣ်လီၤႉ

ဖဲလါယူၤလံ ၅ သီအနံၤစ့ၢ်ကီး လၢၢ်ဒိၣ်ကီၢ်ဆၣ် လီၢ်က၀ီၤသ၀ီဖိ ၈၀၀ ဘျဲၣ် နီၤဖးလီၤသးလၢတၢ်လီၢ် ၂ တီၤဒီးကိးသတြီထီၣ်၀ဲလၢအမ့ၢ် တၢ်မၤသံ၀ဲနီၢ်မုၣ်နီၤဒီးၦၤအဂၤတဖၣ် (ဟံဂ့ၢ်၀ီဖျိဖျိဖျါဖျါတဘျီဃီ)ႇ တၢ်ထီၣ်ဒုးကလုာ်ဒူၣ်ဟီၣ်က၀ီၤဒီးမၤသံမၤ၀ီကလုာ်ဒူၣ်ဖိ(တၢ်ကဆိကတီၢ်ကွံာ်အီၤတဘျီဃီ)ႇ ပယီၤပဒိၣ်သုးမၤဘၣ်ဒိၦၤဂ့ၢ်၀ီခွဲးယာ်(တၢ်ကဟံအီၤဂ့ၢ်၀ီတဘျီဃီ)ႇ ကမျၢၢ်ကပူၤဖျဲးဒီးတၢ်ဘၣ် ယိၣ်သးပျံၤ(ပယီၤပဒိၣ်မၤဖျါထီၣ်တၢ်အၢၣ်လီၤလံာ်ဃံးဃာ်တဘျီဃီ)ႇ ကမျၢၢ်တၢ်အိၣ်မူ တၢ်ဘံၣ်တၢ်ဘၢကအိၣ်အဂီၢ်(ပယီၤသုးပဒိၣ်ဟးထီၣ်ကွံာ်ပဟီၣ်က၀ီၤပူၤတဘျီဃီ)သ့ၣ်တဖၣ်အံၤ ဃ့ထီၣ်၀ဲဒၣ်ဒီး မၤ၀ဲဒၣ်တၢ်ပာ်ဖျါထီၣ်သးန့ၣ်လီၤႉ

ဒ်န့ၣ်အသိး ဖဲအပူၤကွံာ် လါယူၤလံ ၂၂ သီအနံၤစ့ၢ်ကီး နီၢ်မုၣ်နီၤဘၣ်တၢ်ခးသံအီၤအမဲာ်ညါ ဖၣ်ပူၣ်ဟီၣ်က၀ီၤပူၤ တၢ်ခးသံ၀ဲဒၣ် KNU သ့ၣ်ၦၢ်ၦၤမၤတၢ်ဖိႇ တၢ်ခးသံ၀ဲဒၣ်လီၢ်က၀ီၤခိၣ်နၢ်တဂၤဒီး ပယီၤသုးခးလီၤကျိဖးဒိၣ် လီၤတဲာ်ဘၣ်ဒိဘၣ်ထံး၀ဲဒၣ်လီၢ်က၀ီၤဖိတဖၣ်အဖီခိၣ် ဒ်သိးကဒိးန့ၢ်ဘၣ်တၢ်တီတၢ်တြၢ်အဂီၢ် မုၢ်တြီၢ်ကီၢ်ရ့ၣ်ႇ ဒွဲၣ်လိကီၢ်ဆၣ်အပူၤ လီၢ်က၀ီၤဒူဖိသ၀ီဖိခဲလၢာ် ၁ႇ၅၀၀ ဘျဲၣ် လဲၤပာ်ဖျါထီၣ်သးလၢ ပယီၤသုးကလၢၤ ၄ ခါအမဲာ်ညါစ့ၢ်ကီးန့ၣ်လီၤႉ

ဖဲအပူၤကွံာ် လါယူၤလံ ၁၆ သီအနံၤန့ၣ် မုၢ်တြီၢ်ကီၣ်ရ့ၣ်ႇ ဒွဲၣ်လိကီၢ်ဆၣ်ႇ ပိာ်လိထၣ်သ၀ီ ဖိ နီၢ်မုၣ်နီၤလၢအသးနံၣ်အိၣ်(၄၀)နံၣ်အံၤ ပယီၤသုးကလၢၤ နီၣ်ဂံၢ်(၈)လၢအအိၣ်ခူၣ်သူၣ်ထၣ် ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ)စုဒုၣ်တီၤအဖီလာ်ႇ ခီၣ်ချ့သုးရ့ၣ်(ခမရ–၄၀၉) သုးဖိလၢအမ့ၢ် မီၣ်သါမိလွ့ၣ်ဒီး မီၣ်အ့မ့သူၣ်ခံဂၤအံၤ ခးသံ၀ဲဒၣ်နီၢ်မုၣ်နီၤဒီး ဘ့ၣ်လီၤဟံန့ၢ်၀ဲဒၣ်အတၢ်ထူးတၢ်တီၤအဂ့ၢ်န့ၣ် လီၢ်က၀ီၤဖိတဖၣ် စံး၀ဲလီၤႉ

ဘၣ်ဃးဒီးတၢ်ကဲထီၣ်သးအံၤ ၦၤလၢအမၤကမၣ်တၢ် ပယီၤသုးဖိသါမၤသါမိလွ့ၣ်ဒီးဟ့မ့သူၣ်ခံဂၤအံၤန့ၣ် ဖဲလါယူၤလံ ၂၉ သီအနံၤန့ၣ် သုးကွီၢ်ဘျီၣ်ရူ သမံသမိး၀ဲဒၣ်ဒီး တၢ်စံၣ်ညီၣ်၀ဲတၢ်ကမၣ်လၢအဒိၣ်ကတၢၢ်အဂ့ၢ်န့ၣ် ပယီၤသုးတၢ်ကစီၣ်လၢအမ့ၢ်အတီတၢ်ဘိးဘၣ်ရၤလီၤကရူၢ်အံၤ ဖဲအပူၤကွံာ် လါယူၤလံ ၃၁ သီအနံၤန့ၣ် ထုးထီၣ်ဘိးဘၣ်ရၤလီၤ၀ဲဒၣ်န့ၣ်လီၤႉ