Home တၢ်ကစီၣ် သုးဖိလၢအဖီၣ်မၤဒၢၣ်၀ဲကမျၢၢ် တၢ်ကဟံအရ့တုၤလီၤတီၤလီၤအဂ့ၢ် DKBA စံး၀ဲ

သုးဖိလၢအဖီၣ်မၤဒၢၣ်၀ဲကမျၢၢ် တၢ်ကဟံအရ့တုၤလီၤတီၤလီၤအဂ့ၢ် DKBA စံး၀ဲ

833
0
Photo: Nay Naw

လါအီကူာ် ၁၇ သီႇ ၂၀၂၀ နံၣ်ႇ န့ၣ်နီၣ်

ကညီကီၢ်စဲၣ် မၠၣ်၀တံၣ်၀့ၢ်ပူၤ ဖဲလါအီကူာ် ၁၂ သီ မုၢ်ဟါအဆၢကတီၢ်န့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီသုးမုၢ်ဒိၣ် -DKBA သုးဖိတဂၤလၢ ဖီၣ်ဒီးမၢၣ်ဒၢၣ်၀ဲကမျၢၢ်တဂၤအံၤန့ၣ် ဒ်သုးတၢ်သိၣ်တၢ်သီအိၣ်၀ဲအသိး တၢ်ကဟံအရ့တုၤလီၤတီၤလီၤအဂ့ၢ်န့ၣ် သုးၦၤဘၣ်မူဘၣ်ဒါစံး၀ဲန့ၣ်လီၤႉ

ဖဲအပူၤကွံာ် လါအီကူာ် ၁၂ သီ မုၢ်နၤခီ ၉ နၣ်ရံၣ်အဆၢကတီၢ် အူမၠိ၀့လၢအအိၣ်ဖဲ မၠၣ်၀တံၣ်၀့ၢ်ႇ နီၣ်ဂံၢ်(၃)က၀ီၤဒ့ႇ ကၠၤခ့ကျဲအံၤ တၢ်ဖီၣ်က့ၤကိးအီၤ၀ံၤတၢ်မၤဒၢၣ်မၤလိာ်အီၤဒီးတၢ်မၤပျံၤမၤဖုးအီၤဒီးကျိ လၢအမ့ၢ် DKBA ကရူၢ် ထဲၣ်မၠဲၣ်သူၤအံၤ တၢ်ဖီၣ်ဒုးဃာ်အီၤလၢလီၢ်ခၢၣ်သး၀ဲၤလီၢ်ခိၣ်သ့ၣ်သုးကလၢၤဒီး ဒ်သုးတၢ်သိၣ်တၢ်သီအိၣ်၀ဲအသိး တၢ်ကဟံးအရ့တုၤလီၤတီၤလီၤအဂ့ၢ်န့ၣ် DKBA လီၢ်ခၢၣ်သး၀ဲၤလီၢ်ခိၣ်သ့ၣ် သုးခိၣ်ဒိၣ်စိ ထိထိ စံးဘၣ်တၢ်ကစီၣ်တဖၣ် ဖဲလါအီကူာ် ၁၅ သီ ဂီၤခီန့ၣ်လီၤႉ

ဒ်အူမၠိ၀့စံး၀ဲအသိး DKBA အၦၤ ထဲၣ်မၠဲၣ်သူၤအံၤ ဆဲးကျိးအ၀ဲလၢလီတဲစိဒီး မၢအ၀ဲဟဲလၢ မၠၣ်၀တံၣ်၀့ၢ်ႇ နီၣ်ဂံၢ်(၅)က၀ီၤဒ့ႇ ကျဲတၢ်ရ့လိာ်မုာ်လိာ် အီၤစဘူၤလ့ဟိၤထဲမဲာ်ညါဒီး ဖဲအ၀ဲလဲၤတုၤအခါ ဒံၣ်ခ့ၣ်ဘံၣ်အ့ၣ် သုးခိၣ် ထဲၣ်မၠဲၣ်သူၤႇ နဲၣ်လ့ႇ အူမၠဲၣ်မၤ ၦၤသ့ၣ်တဖၣ်အံၤ အိၣ်ခိးပာ်၀ဲဒၣ်ယၤဒီး ကါ (ALPHARD) အ၀ါတခိၣ်ဒီး ကးဘၢ၀ဲအ၀ဲမဲာ်သၣ်ချံဒီးတၢ်ကူတၢ်ကၤ၀ံၤ လဲၤကိးအ၀ဲဆူတၢ်လီၢ်လၢ တၢ်တသ့ၣ်ညါအီၤတတီၤန့ၣ်လီၤႉ

ဖဲလၢတၢ်ဖီၣ်အီၤ၀ံၤအလီၢ်ခံ မၢအ၀ဲဆ့ၣ်နီၤချံးလီၤခီၣ်ဒီး 9 DRAGON တၢ်လိာ်ကွဲတၤကျိၣ်တၤစ့အလီၢ် လၢအအိၣ်ဖဲ မၠၣ်၀တံၣ်၀့ၢ်ႇ နီၣ်ဂံၢ်(၃)က၀ီၤဒ့ တၢ်ဂ့ၢ်တၢ်ကျိၤ ၦၤကဲွးဖျါထီၣ်လၢ Social Media အပူၤ တၢ်ကစီၣ်အံၤ ၦၤလၢအကွဲးတၢ် Oo Lu Chaw (facebook account) ကစၢ်န့ၣ် နၤတမ့ၢ်ဧါ သံဒိးသံကွၢ်၀ဲဒီး ဟံ၀ဲဒၣ်အ၀ဲလီတဲစိဒီးသမံသမိးကွၢ်၀ဲအဂ့ၢ်ႇ သံကွၢ်အ၀ဲလၢ နသ့ၣ်ညါ (account) ကစၢ်တဂၤအံၤစ့ၢ်ဧါႇ ခးပိၢ်ထီၣ်၀ဲဒၣ်ကျိဒီးမၤဒၢၣ်အီၤအဂ့ၢ်ႇ ဒီးတဲပျံၤတဲဖုးစ့ၢ်ကီး၀ဲဒၣ် ၦၤမၤတၢ်ကစီၣ်ဖိတဖၣ်အဂ့ၢ်န့ၣ် ရှဲလဲတဲပၠး၀ဲဒၣ်န့ၣ်လီၤႉ

ဖဲတၢ်တနၤန့ၣ် ၁၁ နၣ်ရံၣ်တခီအဆၢကတီၢ်န့ၣ် ဟဲက့ၤဆှၢက့ၤအီၤ ဖဲမၠၣ်၀တံၣ်၀့ၢ်ႇ နီၣ်ဂံၢ်(၄)က၀ီၤဒ့ႇ ကျဲမုၢ်ဖးဒိၣ်ဖီခိၣ်ကပၤ ရွ့ၣ်ကဘၣ်ဟိၤထဲအဃၢၤလီၤအဂ့ၢ်န့ၣ် ၦၤလၢဘၣ်တၢ်ဖီၣ်အီၤအူမၠိ၀့စံး၀ဲန့ၣ်လီၤႉ

ဘၣ်ထွဲဒီးတၢ်ကဲထီၣ်သးတၢ်ဂ့ၢ်အံၤန့ၣ် DKBA ကရူၢ် (၉၀၇)သုးရ့ၣ် သုးဖိ(၃)ဂၤ အကျါ သုးခိၣ်ထဲၣ်မၠဲၣ်သူၤအံၤ လၢသုး၀ဲၤလီၢ်ခိၣ်သ့ၣ်အပူၤ ဒ်သုးတၢ်သိၣ်တၢ်သီအိၣ်၀ဲအသိး ကဘၣ်အိၣ်လၢဃိာ်ပူၤ(၁)လါႇ တၢ်တီၢ်၀ဲဒီးနီၣ်ဖျ့(၃၀)ထံၣ် အမဲာ်ညါ တၢ်ကထုးထီၣ်ကွံာ်အီၤလၢသုးကရူၢ်ပူၤအဂ့ၢ်န့ၣ် DKBA လီၢ်ခၢၣ်သးသုး၀ဲၤလီၢ်ခိၣ်သ့ၣ် သုးခိၣ်ဒိၣ်စိ ထိထိ စံးဘၣ်ၦၤမၤတၢ်ကစီၣ်ဖိတဖၣ်န့ၣ်လီၤႉ