လါအီကူာ် ၈ သီႇ ၂၀၂၀ နံၣ်ႇ စးအဲၣ်ဆူ
ဖဲအ့ၣ်ယၣ်၀တံၣ်ကီၢ်ခီဒိၣ် တၢ်လီၢ်တနီၤန့ၣ် ဖဲတသီခံသီအံၤအတီၢ်ပူၤ ခီဖျိလၢတၢ်စူၤအါ၀ဲအဃိ ပါတနီၣ်ကီၢ်ဆၣ် တီကၠီဒူသ၀ီကရူၢ်အပူၤ တဘျုၣ်ကျီးလၢတၢ်သူၣ်၀ဲသ့ၣ်တဖၣ် လီၤဘျၢ၀ဲဒီးဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်လီၤႉ
စးထီၣ်ဖဲလါအီကူာ်ထီၣ်သီအကတီၢ်န့ၣ် ဖဲဒူသ၀ီကရူၢ်ပူၤ လၢအတစှၤန့ၢ်ဒံး သ၀ီ ၁၅ ဖျၢၣ် သဂၢၢ်ဘၣ်၀ဲဒၣ်ဒီးထံဒိၣ်ထီၣ်တၢ်အိၣ်သးတဖၣ်အဃိ တဘျုၣ်လၢတၢ်သူၣ်လီၤဃာ်၀ဲအနီၣ်ဂံၢ်တဖၣ် ဟးဂီၤ၀ဲဒၣ်တ၀ာ်ညါအဂ့ၢ်န့ၣ် ၦၤသူၣ်တဘျုၣ်ဖိတဖၣ် စံး၀ဲလီၤႉ
တီကၠီသ၀ီ မါမၠၣ်အီၤ စံး၀ဲ “ခဲအံၤ ထံန့ၣ်ဟဲနုာ်လီၤ၀ဲဒၣ်ချ့သဒံးတၢ်အိၣ်သးအဃိ လီၤဘျၢ၀ဲဒၣ်တဘျီဃီလီၤမီၤႉ မ့မ့ၢ်ၦၤသူၣ်၀ဲဒၣ်လၢတၢ်ပၢၤခိၣ်တဖၣ်ဒု တၢ်တအိၣ်နီတမံၤလၢၤဘၣ်ႉ ဒီးလၢၦၤသူၣ်၀ဲလၢမၤပူၣ်ထီၣ်ဟီၣ်ခိၣ်တဖၣ်ဒု အိၣ်တ့ၢ်ဒံးတစဲးတမှဲးဒံးလီၤႉ တီကၠီကရူၢ်ဒု ဘၣ်ထံး၀ဲဒၣ်ခဲလၢာ်ဃၣ်ဃၣ်ညါလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
ဒ်လီၢ်က၀ီၤဖိစံး၀ဲဒၣ်အသိး တဘျုၣ်ကျီးလၢအဟးဂီၤ၀ဲဒၣ် ၇၅ မျးကယၤအံၤ သ၀ီလၢတဘျုၣ် ကျီးလီၤဘျၢတဖၣ်မ့ၢ်၀ဲ တီကၠီသ၀ီဃုာ်ဒီး ကၠီတီၤလ့ႇ နကၣ်ယိႇ အီၤဘီဒံၣ်ႇ ပၠံၣ်တိကလ့ႇ ပီၣ်ခၠီႇ နကၣ်ႇ ၀ၣ်လၤတီႇ ထ့ၤကိႇ မုၢ်ထီၣ် ယ့တိႇ မုၢ်နုာ် ယ့တိႇ တီကၠီ အထဲၣ်ကွ့ႇ ကၠိတ့ၣ် သ့ၣ်တဖၣ်လီၤအဂ့ၢ်န့ၣ် သ့ၣ်ညါဘၣ်လီၤႉ
လၢန့ၣ်အမဲာ်ညါ ကိးနံၣ်ဒဲးသဂၢၢ်ဘၣ်၀ဲဒၣ်ဒီးထံဒိၣ်ထီၣ်အံၤအဃိ တဘျုၣ်ကျီးဆှူ၀ဲဒၣ်တၢ်အိၣ်သးအံၤန့ၣ် တနံၣ်အံၤသဂၢၢ်ဘၣ်၀ဲနးနးကျံၤကျံၤဒိၣ်ဒိၣ်မုၢ်မုၢ်သ့၀ဲဒၣ်ဒီး ဒိးသန့ၤထီၣ်သးလၢတၢ်သူၣ်၀ဲအအါအစှၤဒီး သဂၢၢ်ဘၣ်တၢ်အဆှူတၢ်ဘၣ်ဒိဘၣ်ထံးသ့၀ဲဒၣ်စ့ၢ်ကီးန့ၣ် ၦၤသူၣ်တဘျုၣ်ဖိတဖၣ် ပဲာ်ထံနီၤဖး၀ဲန့ၣ်လီၤႉ
ဒ်တၢ်ဆါတၢ်ၦ့ၤဒီး လီၢ်က၀ီၤတၢ်လီၢ်တၢ်အိၣ်သးအသိး ပါတနီၣ်ကီၢ်ဆၣ်အပူၤ အါဒၣ်တက့ၢ်တၢ်လီၢ်တဖၣ်န့ၣ် တၢ်သူၣ်ဖျး၀ဲဒၣ်ထဲတဘျုၣ်တခါလီၤဒီး ကရၢၢ်လၢတၢ်သူၣ်တဘျုၣ်တၢၣ်တြီၢ်လၢ(၈ ကထိ)တဖၣ်ဒီး အအါကတၢၢ် (၃ ကလး)တဖၣ် သူၣ်ဖျး၀ဲဒၣ်လၢမုၢ်ကျိၤ၀ဲၤကွာ်တဖၣ်အဂီၢ်န့ၣ်လီၤႉ
တီကၠီသ၀ီကရူၢ်အပူၤ သ၀ီခဲလၢာ်အိၣ်၀ဲ ၁၈ ဖျၢၣ်အံၤ လီၢ်က၀ီၤဖိတဖၣ် ဒ်တၢ်ဆါတၢ်ၦ့ၤဒီး လီၢ်က၀ီၤတၢ်လီၢ်တၢ်အိၣ်သးအသိး သူၣ်၀ဲဒၣ်တဘျုၣ်ဒီး လုၢ်အီၣ်၀ဲဒၣ်နီၢ်ခိသးသမူတၢ်သူၣ်တၢ်ဖျးတၢ်ဖံးတၢ်မၤတခါအံၤ လီၤစၢၤ၀ဲဒၣ်တဆီဘၣ်တဆီန့ၣ်လီၤႉ
