လါအီကူး ၂၁သီႇ ၂၀၂၀ နံၣ်ႇ စးအဲၣ်ဆူ
မုၢ်တြီၢ်(ဖၣ်ပူၣ်)ကီၢ်ရ့ၣ်ႇ လူၢ်သီကီၢ်ဆၣ် KNU- ညီဒီကလုာ်စၢဖှိၣ်ကရၢ တၢ်ပၢဟီၣ်က၀ီၤအပူၤ ဖဲလါယူၤလံ ၂၀ သီအနံၤန့ၣ် တၢ်ကဲထီၣ်သးလၢတသီအတီၢ်ပူၤ ထွံၣ်ခံဒုအ့ၣ်၀ဲဒၣ် လီၢ်က၀ီၤသ၀ီဖိ(၅)ဂၤအကျါ အခဲအံၤ သံ၀ဲဒၣ်(၂)ဂၤလံအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဖၣ် ပာ်ဂၢၢ်ပာ်ကျၢၤစံး၀ဲဒၣ်လီၤႉ
ဖဲလူၢ်သီကီၢ်ဆၣ်အပူၤ ထွံၣ်လၢအတလီၤဂာ်ဒီးမုၢ်ဆ့ၣ်မုၢ်ဂီၤၦၤဘုၣ်၀ဲဒၣ်လၢဟံၣ်ဘၣ်အံၤ အ့ၣ်၀ဲဒၣ် သ့ၣ်သူခံသ၀ီဖိ(၃)ဂၤ ဒီး တယူၤခံသ၀ီဖိ(၂)ဂၤန့ၣ်လီၤႉ ဖဲသ၀ီ၀ဲန့ၣ်အကျါ ဖဲလါအီကူး ၁၈ သီအနံၤန့ၣ် သ့သူခံသ၀ီ စီၤကီၢ်ရ့ၣ်ထူ သးနံၣ်(၄၅)နံၣ်အံၤ သံ၀ဲဒၣ်ဒီး ဖဲလါအီကူး(၁၂)သီအနံၤ တယူၤခံသ၀ီဖိ စီၤအဲၣ်စၢၤ (၆၀)နံၣ် သံ၀ဲဒၣ်အဂ့ၢ်န့ၣ် မုၢ်တြီၢ်ကီၢ်ရ့ၣ် ကီၢ်ပူၤကညီၦၤလီၢ်အိၣ်ကမှံဖိကမံးတံာ် (Committee for Internally Displaced Karen People-CIDKP) မူဒါခိၣ် နီၢ်ခၠဲၤရံၤ စံး၀ဲန့ၣ်လီၤႉ
အ၀ဲစံး၀ဲလၢ “ၦၤလၢအသံတဖၣ်န့ၣ် အထးခိၣ်ထံယွၤလီၤႇ ကသါဃံးႇ ခိၣ်မူၤႇ မဲာ်မူၤႇ ဘှီးဒီး အ့ၣ်တဃံာ်အမဲ၀ံၤသံ၀ဲဒၣ်လီၤႉ ၦၤလၢအအိၣ်တ့ၢ်တဖၣ်န့ၣ် တဘၣ်နီတမံၤဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
ၦၤလၢအသံ စီၤကီၢ်ရ့ၣ်ထူအံၤ ထွံၣ်အ့ၣ်၀ဲဒၣ်အခီၣ်လ့ၢ်ခိၣ်ဒီး မ့မ့ၢ်စီၤအဲၣ်စၢၤန့ၣ်အ့ၣ်၀ဲဒၣ်အစုႇ အခီၣ်ကံၣ်ဒုၣ်ႇ အခီၣ်ႇ ယီၢ်ဒ့ဒီး အကိာ်ဘိတဖၣ်ဒီး ဖဲန့ၣ်တၢ်ဆဲးန့ၢ်အ၀ဲသ့ၣ် ကသံၣ်တၢ်ဒီသဒၢဘၣ်ဆၣ် သံ၀ဲဒၣ်ခဲအံၤန့ၣ် မ့ၢ်၀ဲဒၣ်ထွံၣ်ပျုၢ်အ့ၣ်သ့၀ဲလီၤအဂ့ၢ်န့ၣ် ၦၤလၢအသ့အဘၣ်တဖၣ် ပာ်ထံနီၤဖး၀ဲဒၣ်လီၤႉ
ကညီဆူၣ်ချ့မၤစၢၤ၀ဲၤကျိၤ -KDHW မူဒါခိၣ် ပဒိၣ်စီၤဒဲမိခ့ၤ စံး၀ဲ “ကသံၣ်သရၣ်တဂၤ ပဲာ်ထံနီၤဖးပၠး၀ဲလၢ ထွံၣ်လၢအအ့ၣ်တၢ်အက့ၢ်အဂီၤန့ၣ် တဒ်သိးလိာ်သးဒီးမုၢ်ဆ့ၣ်မုၢ်ဂီၤထွံၣ်ဘၣ်ႉ ၦၤသံအဆိကတၢၢ်တဂၤန့ၣ် သံ၀ဲဒၣ်ဒ်လဲၣ်န့ၣ်တသ့ၣ်ညါ၀ဲဘၣ်ဆၣ်ႇ ဒ်တၢ်ဆါအတၢ်ပနီၣ်အသိးသံ၀ဲဒၣ်အံၤ မ့ၢ်၀ဲဒၣ်ထွံၣ်ပျုၢ်အတၢ်ပနီၣ်န့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
လၢန့ၣ်အမဲာ်ညါ တကီၢ်ခါ ၦၤသံ၀ဲဒၣ်တုၤလၢခံဂၤလံဒီး ၦၤသံတၢ်ဆါအတၢ်ပနီၣ်သ့ၣ်တဖၣ်စ့ၢ်ကီး တၢ်ပာ်ဂၢၢ်ပာ် ကျၢၤ၀ဲဒၣ်လၢထွံၣ်ပျုၢ်တၢ်ဆါအတၢ်ပနီၣ်န့ၢ်၀ဲအဃိ လၢတၢ်ဂ့ၢ်တဖၣ်အဖီခိၣ် ၦၤလၢအအိၣ်တ့ၢ်တဖၣ်အဂီၢ် တၢ်ကတၢၣ်ပီၣ်ဃုအစၢဒီးဟံးထီၣ်ဖီၣ်ထီၣ်၀ဲလီၤအဂ့ၢ်န့ၣ် ပဒိၣ်စီၤဒဲမိခ့ၤ စံး၀ဲလီၤႉ
တကီၢ်ခါခဲအံၤ ၦၤလၢထွံၣ်အ့ၣ်၀ဲတဖၣ်အကျါ အိၣ်တ့ၢ်က့ၤ၀ဲ ၃ ဂၤဒီး ၦၤသ့ၣ်တဖၣ်အံၤမ့ၢ်၀ဲ သ့သူခံလီၢ်က၀ီၤဖိ နီၢ်ဘူကၠၤ(၄၂)နံၣ်ႇ စီၤကီၢ်၀ါထူ(၅၀)နံၣ်ဒီး တယူခံသ၀ီဖိ စီၤကီၢ်သူ(၁၆)နံၣ်တဖၣ်အဂ့ၢ်န့ၣ် သ့ၣ်ညါဘၣ်လီၤႉ
ထွံၣ်လၢအအ့ၣ်တၢ်ခံဒုအကျါ တၢ်ခးသံန့ၢ်၀ဲဒၣ်တဒုဘၣ်ဆၣ် လၢအအိၣ်တ့ၢ်တဒုန့ၣ် ပူၤဖျဲး၀ဲဒၣ်အဖၢမုၢ်လီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဖၣ် စံး၀ဲဒၣ်လီၤႉ ထွံၣ်လၢသုခးသံဖီၣ်အီၤန့ၣ် တမ့ၢ်ထွံၣ်လၢဒူသ၀ီပူၤဘၣ်ဒီး မ့ၢ်ထွံၣ်လၢၦၤဟဲက့ၤစိာ်၀ဲဒၣ်လၢတၢ်လီၢ်လၢအဂၤအဂ့ၢ်န့ၣ် လီၢ်က၀ီၤဖိတဖၣ် ပာ်ဂၢၢ်ပာ်ကျၢၤ၀ဲဒၣ်လီၤႉ
လၢန့ၣ်အမဲာ်ညါ လၢတၢ်ကဲထီၣ်သးအကပိၤကပၤန့ၣ် ပယီၤသုးကလၢၤ အိၣ်ဆီလီၤအသးအိၣ်၀ဲအသိး အပူၤကွံာ်စ့ၢ်ကီး ပယီၤသုးအံၤမ့ၢ်လဲၤလၢတၢ်မဲာ်ညါန့ၣ် ဟဲစိာ်ဃုာ်၀ဲဒၣ်ထွံၣ်ပျုၢ်တဖၣ်ဒီး တၢ်လီၢ်လၢတၢ်သဘံၣ်သဘုၣ်ကဲထီၣ်အလီၢ်န့ၣ် ဟဲပျၢ်လီၤ၀ဲထွံၣ်ပျုၢ်အိၣ်၀ဲအဂ့ၢ်န့ၣ် ဖဲအပူၤကွံာ်တလါ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုး၀ဲၤလီၢ်ခိၣ်သ့ၣ် ထုးထီၣ်ဘိးဘၣ်ရၤလီၤပာ် တၢ်ကစီၣ်အိၣ်၀ဲန့ၣ်လီၤႉ
