လါအီကူး ၂၈ သီႇ ၂၀၂၀ နံၣ်ႇ စးဖါရှီ
၀့ၢ်တကူၣ်အပူၤ ဖဲအပူၤကွံာ်နံၣ်တၢ်မၤ၀ဲဒၣ် ၆၉ ၀ီတ၀ီ ကညီမၤထူရၤမုၢ်နံၤအံၤ ခီဖျိလၢဒီၣ်စ့ၣ်ထွ့ ဟဲဟ့ၣ်ဂံၢ်ဟ့ၣ်ဘါဆီၣ်ထွဲ၀ဲအဃိ တၢ်လိာ်ဘၢလိာ်ကွီၢ်အီၤလၢ တၢ်ထုးဖှိၣ်သးလၢတၢ်မုာ်တၢ်ခုၣ်တၢ်ဘျၢသဲစး အဆၢဒိၣ် ၁၉ ဒီး လၢတၢ်ဘျၢသဲစးအံၤအပူၤ ဖဲလါအီကူး ၂၇ သီအနံၤန့ၣ် ကၠီၣ်တတါကီၢ်ဆၣ် ကွီၢ်ဘျီၣ်ရူ တၢ်စံၣ်ညီၣ်ဆၢတဲာ်လၢကဘၣ်အိၣ်ဃိာ်ပူၤ ၁၅ သီန့ၣ်လီၤႉ
ဒ်န့ၣ်အသိး ဖဲတနံၣ်အံၤတၢ်မၤ၀ဲ နံၣ် ၇၀ ၦဲၤ ကညီမၤထူရၤမုၢ်နံၤအံၤန့ၣ် ၦၤလၢဘၣ် တၢ်လိာ်ဘၢလိာ်ကွီၢ်၀ဲဒၣ်လၢအမ့ၢ် စးသ့စီၣ်မ့ ဒီး စီၤဆၣ်ကွၢ်လၢ်တဖၣ်အံၤစ့ၢ်ကီး တၢ်က့ၤသ့ၣ်နံၤဖးသီက့ၤအ၀ဲသ့ၣ် ဖဲလါစဲးပထ့ဘၢၣ် ၁ သီဒီး တၢ်ကဆဲးသမံသမိး၀ဲဒၣ်န့ၣ်လီၤႉ
ဒီၣ်စ့ၣ်ထွ့အံၤစ့ၢ်ကီး ခီဖျိလၢတၢ်ဆဲးလိာ်ဘၢလိာ်ကွီၢ်အီၤလၢ တၢ်ထုးဖှိၣ်သးလၢတၢ်မုာ်တၢ်ခုၣ်တၢ်ဘျၢသဲစး အဆၢဒိၣ် ၂၀ အံၤအဃိ ကဆဲးသဂၢၢ်တၢ်မူးတၢ်ရၢ်ဒီး စးသ့စီၣ်မ့ႇစီၤဆၣ်ကွၢ်လၢ်တဖၣ်အံၤအဂ့ၢ်န့ၣ် သ့ၣ်ညါဘၣ်လီၤႉ
ၦၤသၢဂၤလၢတၢ်လိာ်ဘၢလိာ်ကွီၢ်၀ဲလၢ တၢ်ထုးဖှိၣ်ရိၣ်ဖှိၣ်ထီၣ်သးလၢတၢ်မုာ်တၢ်ခုၣ်ဒီး တၢ်ဟးဒုးနဲၣ်တၢ်ပာ်ဖျါထီၣ် တၢ်ဘၣ်သးတၢ်ဘျၢသဲစး အဆၢဒိၣ်(၂၀) ၦၤသ့ၣ်တဖၣ်အံၤန့ၣ် တၢ်စးထီၣ်လိာ်ဘၢလိာ်ကွီၢ်အ၀ဲသ့ၣ် ဖဲလါအီကူး ၂၄ သီဒီး ကၠီၣ်တတါကီၢ်ဆၣ် ကွီၢ်ဘျီၣ်ရူ ဖဲလါအီကူး ၂၇ သီအနံၤန့ၣ် တၢ်စးထီၣ်သမံသမိး၀ဲဒၣ်န့ၣ်လီၤႉ
“တနံၤအံၤန့ၣ် တၢ်စံၣ်ညီၣ်ဆၢတဲာ်လီၤ၀ဲဒီၣ်စ့ၣ်ထွ့ လၢတၢတခါကွီၢ်မ့ၣ်န့ၣ်လီၤႉ ၀ံၤဘျီ တၢ်သမံသမိး၀ဲဒၣ် ၦၤလိာ်ကွီၢ်တၢ်ဖိ ၁ ဂၤဒီး ၦၤအုၣ်အသး ၄ ဂၤ ၀ံၤအလီၢ်ခံ တၢ်က့ၤသ့ၣ်ဆၢဖးကတီၢ်ကဒါတနွံမီၤႉ လၢခံတနွံရူသ့ၣ်ဆၢဖးကတီၢ်န့ၣ် ၦၤလၢတၢ်လိာ်ဘၢလိာ်ကွီၢ်အ၀ဲသ့ၣ်တကပၤန့ၣ် တၢ်ကက့ၤသမံသမိး၀ဲလီၤန့ၣ် သ့ၣ်ညါဘၣ်လီၤ” အဂ့ၢ်န့ၣ် တၢ်ဖီၣ်၀ဲဒၣ်တၢ်မၤလၤကပီၤ ကညီမၤထူရၤမုၢ်နံၤလၢအတတီတတြၢ်ဘၣ်အံၤအဂီၢ် တၢ်မၤဖျါထီၣ်တၢ်ထဲသိးတုၤသိးကရူၢ်လၢအမ့ၢ် နီၢ်ဆၢဆၢ စံး၀ဲဒၣ်လီၤႉ
ဖဲအပူၤကွံာ်နံၣ် ၀့ၢ်တကူၣ်ပူၤ တၢ်မၤ၀ဲဒၣ် ၆၉ ၀ီတ၀ီ ကညီမၤထူရၤမုၢ်နံၤမူးတၢ်ရဲၣ်တၢ်ကျဲၤအဃိ တၢ်လိာ်ဘၢလိာ်ကွီၢ်၀ဲဒၣ် နီၢ်အိလၣ် ဃုာ်ဒီးကညီသးစၢ်ခံဂၤလၢအမ့ၢ် စီၤအဲလ်ဘၢၣ်ခၠိၤဒီး စးသ့စီၣ်မ့တဖၣ်လၢ တၢ်ထုးဖှိၣ်ရိၣ်ဖှိၣ်သးလၢတၢ်မုာ်တၢ်ခုၣ် တၢ်ဘျၢသဲစး အဆၢဒိၣ်(၂၀)၀ံၤအလီၢ်ခံ ကၠီၣ်တတါကီၢ်ဆၣ် ကွီၣ်ဘျီၣ်ရူ အ၀ဲသ့ၣ်သၢဂၤအံၤ တၢ်စံၣ်ညီၣ်၀ဲလၢဘၣ်အိၣ်ဃိာ်ပူၤ ၁၅ သီစုာ်စုာ်န့ၣ်လီၤႉ
