Home တၢ်ကစီၣ် ကီးတရံး၀့ၢ်ပူၤ တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးဒီး BGF တဖၣ် မၤ၀ဲဟီၣ်က၀ီၤတၢ်ဒိၣ်စိ

ကီးတရံး၀့ၢ်ပူၤ တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးဒီး BGF တဖၣ် မၤ၀ဲဟီၣ်က၀ီၤတၢ်ဒိၣ်စိ

1195
0

လါစဲးပထ့ဘၢၣ် ၉ သီႇ ၂၀၂၀ နံၣ်ႇ န့ၣ်နီၣ်

ကညီကီၢ်စဲၣ် ကီးတရံး၀့ၢ်ပူၤ ဖဲအပူၤကွံာ် လါစဲးပထ့ဘၢၣ် ၄ သီအနံၤန့ၣ် တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးဒီး (BGF) သုးကရူၢ်တဖၣ်ပာ်ဖှိၣ်ထီၣ်သးဒီး ဟံးထီၣ်ဖီၣ်၀ဲဟီၣ်က၀ီၤတၢ်ဒိၣ်စိအဂ့ၢ်န့ၣ် သ့ၣ်ညါဘၣ်လီၤႉ

ဖဲလါအီကူး ၃၀ သီအနံၤ မၠၣ်၀တံၣ်–ကီးတရံး ကျဲလီၢ်လံၤ တၢ်ဆဲးကျိးလီၢ် ပယီၤသုး ၂ ဂၤ ဘၣ်တၢ်ခးသံ၀ဲဒၣ်ဒီး ခီဖျိလၢၦၤသံအစိၣ်အဖီလာ်တၢ်ဒိးလီၤဃာ်၀ဲဒၣ်ဒီးမ့ၣ်ပိၢ်ဒီး မ့ၣ်ပိၢ်အံၤပိၢ်ဖးထီၣ်၀ဲဒၣ်အဃိ ပယီၤသုးလၢအဂၤ ၃ ဂၤ သံကဒီး၀ဲဒၣ်ဒီး ဘၣ်ဒိဘၣ်ထံး၀ဲဒၣ် ၆ ဂၤ န့ၣ်လီၤႉ

တၢ်ဂ့ၢ်ကဲထီၣ်သး၀ံၤအလီၢ်ခံ ပယီၤသုးဒီးသုးခိးကီၢ်ဆၢ (BGF) သုးကရူၢ်တဖၣ် ဖဲမၤရှဲလဲ၀ဲဟီၣ်က၀ီၤအဆၢကတီၢ် တၢ်ခးလိာ်သးကဲထီၣ်၀ဲဒၣ်တဆံးတက့ၢ်ဒီး ၦၤဖီၣ်စုက၀ဲၤသုးကရူၢ်လၢအအိၣ်ဘူးဖဲသ၀ီဖဲန့ၣ်တဖၣ်န့ၣ်လီၤႉ

တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးႇ သုးခိးကီၢ်ဆၢ (BGF) ဃုာ်ဒီးပၢၤကီၢ်သုးတဖၣ်ဒီး လီၢ်က၀ီၤၦၤဘၣ်မူဘၣ်ဒါတဖၣ် စးထီၣ်ဖဲလါစဲးပထ့ဘၢၣ် ၅ သီအနံၤန့ၣ် ဖဲကီးတရံး၀့ၢ်ပူၤ တၢ်ဟးဆှၣ်ကွၢ်၀ဲတၢ်ကိးမုၢ်နၤဒဲးအိၣ်၀ဲအသိး လၢမုၢ်ဆါခီစ့ၢ်ကီး ဟီၣ်က၀ီၤတၢ်ဒိၣ်စိအဂီၢ် တၢ်ဆီလီၤ၀ဲဒၣ် တၢ်ဘံၣ်တၢ်ဘၢအိၣ်၀ဲအဂ့ၢ်န့ၣ် ကညီကီၢ်စဲၣ် သုးခိးကီၢ်ဆၢ (BGF) ကရူၢ် သုးခိၣ်ဒိၣ်ဖိ ခ့ၤမီၤ၀့ စံး၀ဲဒ်အံၤလီၤႉ

“ဖဲအပူၤကွံာ်စှၤသီန့ၣ် တၢ်ခးလိာ်သးကဲထီၣ်၀ဲဒၣ်ဒီး ကမျၢၢ်ထံဖိကီၢ်ဖိတဖၣ်တၢ်ဘၣ်ယိၣ်ဘၣ်ဘှီဟဲအိၣ်ထီၣ်၀ဲလီၤႉ တၢ်အဃိန့ၣ် ဒ်သိးကမျၢၢ်တဖၣ်သူၣ်သးကခုၣ်ဒီးမံ၀ဲဒၣ်မုာ်မုာ်ခုၣ်ခုၣ်အန့ၢ်အဂီၢ်ႇ တၢ်သူၣ်ပျံၤသးဖုး သုတအိၣ်တဂ့ၤ အဂီၢ် ပ၀ဲဒၣ် ပယီၤသုးႇ ပၢၤကီၢ်သုးဒီး သုးခိးကီၢ်ဆၢတဖၣ်ပာ်ဖှိၣ်ထီၣ်သးဒီး ကိးမုၢ်နၤဒဲး ၈ နၣ်ရံၣ် တုၤလၢ မုၢ်ဟဲ၀ါထီၣ်တစု ကိးနံၤဒဲးပကဟံးထီၣ်ဖီၣ်ထီၣ်၀ဲဒၣ်လီၤ” အဂ့ၢ်န့ၣ် စံး၀ဲလီၤႉ

၀့ၢ်ပူၤတၢ်ဟံးထီၣ်ဖီၣ်ထီၣ်၀ဲဒၣ်တၢ်ဘံၣ်တၢ်ဘၢအမဲာ်ညါ ဟီၣ်က၀ီၤတၢ်ဒိၣ်စိအဂီၢ် ဖဲကီးတရံး၀့ၢ် ထံဖိဆၣ်သ၀ီႇ ကီၢ်မူသ၀ီႇ ယၤကိၣ်သ၀ီဒီး ပၠါပ့ၤကိဒူသ၀ီတဖၣ်တကပၤန့ၣ် ပယီၤသုးဒီးသုးခိးကီၢ်ဆၢ (BGF) ကရူၢ်တဖၣ် ဟီၣ်က၀ီၤတၢ်ဒိၣ်စိအဂီၢ် ဆီလီၤ၀ဲဒၣ်သုးကလၢၤတဖၣ်ဒီး မၤရှဲလဲ၀ဲဒၣ်ဟီၣ်က၀ီၤအိၣ်၀ဲအဂ့ၢ်န့ၣ် သုးခိးကီၢ်ဆၢ ၦၤဘၣ်မူဘၣ်ဒါတဖၣ် စံး၀ဲလီၤႉ

ကီၢ်မူသ၀ီ သ၀ီဖိတဂၤစံး၀ဲ “တၢ်ဟဲရှဲလဲတၢ်ဒ်န့ၣ်ဂ့ၤ၀ဲဒၣ်လီၤႉ ပ၀ဲဒၣ်သ၀ီဖိတဖၣ်တပၤ တၢ်ဘၣ်ယိၣ်ဘၣ်ဘှီအိၣ်ဒံး၀ဲဒၣ်ဘၣ်ဆၣ် တၢ်ဒုးဒိၣ်ဒိၣ်မုၢ်မုၢ်တအိၣ်လၢၤ ဒ်အပူၤကွံာ် ၂၀၁၂–၁၃–၁၄ အခါလၢၤဘၣ်အဃိ သးခုၣ်လီၤ၀ဲဒၣ်တဆဲးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ခီဖျိလၢတၢ်မၤရှဲလဲ၀ဲဟီၣ်က၀ီၤအဃိ ကီးတရံး–မၠၣ်၀တံၣ် ကျဲလီၢ်လံၤ ကညီဖီၣ်စုက၀ဲၤကရူၢ်တနီၤ အသုးကလၢၤတနီၤလၢအဆီလီၤသးတစိၢ်တလီၢ်တဖၣ်န့ၣ် ပယီၤသုးဒီးသုးခိးကီၢ်ဆၢ (BGF) ကရူၢ်တဖၣ်ပာ်ဖှိၣ်ထီၣ်သးဒီး ဒွဲၣ်အူမၤရှဲလဲထုးကွံာ်၀ဲဒၣ်အိၣ်၀ဲအဂ့ၢ်န့ၣ် ၦၤဖီၣ်စုက၀ဲၤကရူၢ်တပၤ စံး၀ဲလီၤႉ