Home တၢ်ကစီၣ် ဒ်သိးကဟးဆှဲးတၢ်ဖီလာ်တၢ်ခးလိာ်သးကန့ၢ်အဂီၢ် ကညီဖီၣ်စုက၀ဲၤကရူၢ်တဖၣ် ထံၣ်လိာ်ထိၣ်ဃူထိၣ်ဖိး

ဒ်သိးကဟးဆှဲးတၢ်ဖီလာ်တၢ်ခးလိာ်သးကန့ၢ်အဂီၢ် ကညီဖီၣ်စုက၀ဲၤကရူၢ်တဖၣ် ထံၣ်လိာ်ထိၣ်ဃူထိၣ်ဖိး

1737
0
လါစဲးပထ့ဘၢၣ် ၁၆ သီႇ ၂၀၂၀ နံၣ်ႇ စးအဲၣ်ဆူ

ကညီဖီၣ်စုက၀ဲၤကဒဲကဒဲအဘၢၣ်စၢၤ တၢ်ဖီလာ်တၢ်ဘၣ်သဂၢၢ်ခးလိာ်သးတဖၣ် ဒ်သိးတၢ်ကဟးဆှဲး၀ဲကန့ၢ်အဂီၢ် ကညီဒီကလုာ်စၢဖှိၣ်ကရၢ =KNU တီခိၣ်ရိၣ်မဲဒီး ကညီဖီၣ်စုက၀ဲၤကရူၢ် ၂ ဒူၣ် မၤ၀ဲဒၣ်တၢ်ထံၣ်လိာ်အိၣ်သကိးတခါ ဖဲလါစဲးပထ့ဘၢၣ် ၁၄ သီ KNU တၢ်ပၢဟီၣ်က၀ီၤတၢ်လီၢ်တတီၤအပူၤန့ၣ်လီၤႉ

တၢ်ထံၣ်လိာ်သးဘျီ၀ဲန့ၣ် KNU ဖီၣ်စုက၀ဲၤသုးမုၢ်ဒိၣ်လၢအမ့ၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဃုာ်ဒီး ကညီသုးခိးကီၢ်ဆၢ (BGF)˜ တၢ်မုာ်တၢ်ခုၣ်ကီၢ်ကး (KNU/KNLA-PC) ခိၣ်နၢ်ဒိၣ်ထီတဖၣ်ဟဲ ထီၣ်၀ဲန့ၣ်လီၤႉ ဖဲန့ၣ်တၢ်ဖီလာ်တၢ်ဘၣ်သဂၢၢ်ခးလိာ်သးလၢအကဲထီၣ်သးဖဲတယံၤတမီၢ်ဒံးဘၣ်အံၤအဖီခိၣ် တၢ်တၢၣ်ပီၣ်သကိး၀ဲဒီး ဒ်သိးခါဆူညါတၢ်ခးလိာ်သးသုတဟဲအိၣ်ထီၣ်လၢၤတဂ့ၤအဂီၢ်ဒီး ကဒိးန့ၢ်ဘၣ်တၢ်ဃူတၢ်ဖိးအဂီၢ် တၢ်တၢၣ်ပီၣ်တဲသကိး၀ဲအဂ့ၢ်သ့ၣ်ညါဘၣ်လီၤႉ

KNU နဲၣ်ရွဲၣ်(၂)ပဒိၣ်စီၤလၣ်ထိ စံး၀ဲ“ကညီဖီၣ်စုက၀ဲၤသုးကရူၢ်အံၤ လၢဟီၣ်က၀ီၤအပူၤ ဒ်သိးတဒူၣ်ဒီး တဒူၣ်တၢ်ခးလိာ်သးသုတကဲထီၣ်တဂ့ၤအဂီၢ်ႇ တၢ်နၢ်ပၢၢ်လိာ်သးသုတကမၣ်တဂ့ၤအဂီၢ် ပထံၣ်လိာ်သးလီၤႉ လၢခံတခါန့ၣ် ဖဲအပူၤကွံာ်တၢ်ကဲထီၣ်သးလၢ ကျဲလီၢ်လံၤတပၤ တၢ်ခးလိာ်သးကဲထီၣ်၀ဲအဃိ ပကညီထံဖိ ကီၢ်ဖိကမျၢၢ်တဖၣ်အဘၢၣ်စၢၤ တၢ်ကလုၢ်ဟဲထီၣ်၀ဲဒၣ်အကလုာ်ကလုာ်အဖီခိၣ်န့ၣ် တၢ်သ့ၣ်တဖၣ်အံၤဒ်သိး ကအိၣ်၀ဲရှဲရှဲလဲလဲလီၤႉ ဒ်သိးကဒိးန့ၢ်ဘၣ်တၢ်နၢ်ပၢၢ်လိာ်သးကအါထီၣ်အဂီၢ် လိၣ်၀ဲဒၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ဖဲလါအီကူး(၃၀)သီအနံၤ မၠၣ်၀တံၣ်–ကီးတရံး ကျဲလီၢ်လံၤ အလဲၤဘိၤတဲကပၤ ပယီၤသုးလၢအအိၣ်ဖဲ တၢ်ဆဲးကျိးလီၢ် ၂ ဂၤ တၢ်ခးသံ၀ဲဒၣ်ဒီး ခီဖျိလၢၦၤသံအစိၣ်န့ၣ် တၢ်ဒိးလီၤဃာ်၀ဲဒၣ်ဒီးမ့ၣ်ပိၢ်အဃိ မ့ၣ်ပိၢ်ပိၢ်ဖးထီၣ်၀ဲဒၣ်ဒီး ဖဲန့ၣ်ပယီၤသုးကသံၣ်သရၣ် သုးခိၣ်စိ(၁)ဂၤ ဃုာ်ဒီး ပယီၤသုးဖိ ၃ ဂၤ သံကဒီး၀ဲဒၣ်ဒီး ဘၣ်ဒိဘၣ်ထံး၀ဲ ၆ ဂၤ န့ၣ်လီၤႉ

ဖဲတၢ်ကဲထီၣ်သး၀ံၤအလီၢ်ခံ ပယီၤသုး ဒီး သုးခိးကီၢ်ဆၢ (BGF) တဖၣ် လဲၤထီၣ်မၤရှဲလဲ၀ဲဟီၣ်က၀ီၤအဆၢကတီၢ် တၢ်ဒုးကဲထီၣ်၀ဲဒၣ်ဒီးဖီၣ်စုက၀ဲၤသုးကရူၢ်လၢအအိၣ်ဘူး၀ဲဒီးတၢ်လီၢ်ဖဲန့ၣ်တဖၣ် တဆံးတက့ၢ်ဒံးန့ၣ်လီၤႉ

လၢန့ၣ်အမဲာ်ညါ ကညီဖီၣ်စုက၀ဲၤကရူၢ်ခိၣ်နၢ်တဖၣ် တၢ်ထံၣ်လိာ်သးလၢတနံၤအတီၢ်ပူၤအံၤ ကညီဖီၣ်စုက၀ဲၤကရူၢ်ကရၢတဖၣ်အဘၢၣ်စၢၤ တၢ်နၢ်ပၢၢ်ကမၣ်လိာ်သးသုတဟဲအိၣ်ထီၣ်တဂ့ၤအမဲာ်ညါ တၢ်မုာ်တၢ်ခုၣ် တၢ်အိၣ်ဖှိၣ်ဖးဒိၣ် (UPC) ပူၤ တၢ်သးလီၤပလိာ်တၢ်ဂ့ၢ်တၢ်ကျိၤလၢအဒိးန့ၢ်ဘၣ်၀ဲတဖၣ်ဒီး ၂၀၂၀ တလၢ တၢ်မၤဖျါထီၣ်တၢ်မုာ်တၢ်ခုၣ်တဖၣ်န့ၣ် ကညီဖီၣ်စုက၀ဲၤတဖၣ် ဒ်သိးထံရူၢ်ကီၢ်သဲးတၢ်အိၣ်ဆၢထၢၣ်တခါဃီ လဲၤ၀ဲကန့ၢ်အဂီၢ်ႇ ၂၀၂၀ တၢ်ဃုထၢအပူၤ ကညီထံရူၢ်ကီၢ်သဲးပၣ်တံၣ်တဖၣ် ကဒိးန့ၢ်ဘၣ်တၢ်မၤနၢၤအဂီၢ်န့ၣ် ကညီဖီၣ်စုက၀ဲၤကရူၢ်အသနၢၣ်တဖၣ်စ့ၢ်ကီး တၢ်တၢၣ်ပီၣ်တဲသကိး၀ဲဒၣ်အဂ့ၢ်န့ၣ် ပဒိၣ်စီၤလၣ်ထိ ဆဲးစံး၀ဲန့ၣ်လီၤႉ

တၢ်ထံၣ်လိာ်သးဘျီ၀ဲအံၤ KNLA တကပၤ သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤကၠီၤနံၤ ဒီး သုးရိၣ်မဲခိၣ်ကျၢၢ်(၂) သုးခိၣ်ကျၢၢ်စိ စီၤဘီကၠီၤဟဲ ဃုာ်ဒီး KNU တၢ်ဒီတဒၢဒီး ခိၣ်နၢ်ဒိၣ်ထီလၢအဂၤတဖၣ်ႇ လၢ BGF တကပၤ ကညီကီၢ်စဲၣ် သုးခိးကီၢ်ဆၢ နဲၣ်ရွဲၣ်ခိၣ်ကျၢၢ် သုးခိၣ်ဒိၣ်စိ စီၤခၠံၣ်သူၤႇ KNU/KNLA-PC တကပၤ သုးခိၣ်ဒိၣ်စိ စီၤန့ၢ်စိမၠး ဒီး တၢ်ဘူၣ်တၢ်ဘါခိၣ်နၢ်တနီၤ ပၣ်ဃုာ်ဟဲထီၣ်၀ဲဒၣ်န့ၣ်လီၤႉ ကညီဖီၣ်စုက၀ဲၤကရူၢ်တကရူၢ်လၢအအိၣ်တ့ၢ်လၢအမ့ၢ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA) အံၤ ခီဖျိလၢ covid-19 ဆၢကတီၢ် တၢ်ဟးထီၣ်က့ၤလီၤကီခဲ၀ဲအဃိ ဟဲထီၣ်၀ဲဒၣ်တအိၣ်ဘၣ်အဂ့ၢ်န့ၣ် သ့ၣ်ညါဘၣ်လီၤႉ