Home တၢ်ကစီၣ် ရွှ့ၣ်ကိၣ်ကိၤတၢ်တိာ်ကျဲၤပူၤ သုးပဒိၣ်အတၢ်ပၣ်ဃုာ်အသနၢၣ်အံၤ အလီၢ်အိၣ်လၢတၢ်ကဘၣ်ဃိထံ၀ဲအဂ့ၢ် KPSN စံး၀ဲ

ရွှ့ၣ်ကိၣ်ကိၤတၢ်တိာ်ကျဲၤပူၤ သုးပဒိၣ်အတၢ်ပၣ်ဃုာ်အသနၢၣ်အံၤ အလီၢ်အိၣ်လၢတၢ်ကဘၣ်ဃိထံ၀ဲအဂ့ၢ် KPSN စံး၀ဲ

224
0

လါစဲးပထ့ဘၢၣ် ၄ သီႇ ၂၀၂၀ နံၣ်ႇ စးအဲၣ်ဆူ

ဖဲတၢ်နုာ်လီၤဃိထံ၀ဲ မၠၣ်၀တံၣ်ကီၢ်ဆၣ်အပူၤ ရွှ့ၣ်ကိၣ်ကိၤတၢ်တိာ်ကျဲၤအဖီခိၣ် လၢတၢ်တိာ်ကျဲၤအပူၤ သုးပဒိၣ်အတၢ်ပၣ်ဃုာ်အသနၢၣ်တဖၣ်အံၤ အလီၢ်အိၣ်လၢတၢ်ကဘၣ်ဃုသ့ၣ်ညါသမံသမိး၀ဲအဂ့ၢ်န့ၣ် ကညီတၢ်တိစၢၤမၤစၢၤတၢ်မုာ်တၢ်ခုၣ်ၦာ်ဘျးစဲ -KPSN လၢအိၣ်ခိးကွၢ်ဃုသ့ၣ်ညါ၀ဲဘၣ်ထွဲတၢ်တိာ်ကျဲၤအံၤ ဖဲလါစဲးပထ့ဘၢၣ် ၃ သီအနံၤန့ၣ် ထုးထီၣ်၀ဲဒၣ်လံာ်တၢ်ပာ်ဖျါန့ၣ်လီၤႉ

“သုးပဒိၣ်အတၢ်ပၣ်ဃုာ်ပၣ်ဂီၢ်အံၤ ပ၀ဲသ့ၣ်တဖၣ်မၤဖျါထီၣ်မ့န့ၢ်မး တၢ်ဂ့ၢ်ကီလၢအကဲထီၣ်သးလၢကီၢ်ဆၢတဖၣ်အံၤ ကဘှါဆှဲအီၤဖျိဖျိဖျါဖျါကန့ၢ်၀ဲဒၣ်လီၤႉ သုးပဒိၣ်အတၢ်ပၣ်ဃုာ်ပၣ်ဂီၢ်အံၤ တၢ်ဂ့ၢ်လၢအတဖိးသဲစးတဖၣ် တၢ်မ့ၢ်တမၤဖျါထီၣ်အီၤဖျိဖျိဖျါဖျါဘၣ်န့ၣ် တၢ်ဂ့ၢ်အံၤပတုာ်အသးတန့ၢ်၀ဲလၢၤဘၣ်” အဂ့ၢ်န့ၣ် KPSN ၦၤကတိၤတၢ်ပၢ စီၤကပီၤ စံးဘၣ်ခ့ၣ်အဲးစံၣ်လီၤႉ

တရူးမီၢ်သီ လံာ်တၢ်ပာ်ဖျါအပူၤ တၢ်တၤကျိၣ်တၤစ့လၢအခီတဲာ်၀ဲကီၢ်ဆၢတဖၣ်လၢ အဘၣ်ထွဲတရူးအတၢ်အိၣ်ဆၢထၢၣ်ဒီး ကီၢ်ပယီၤပဒိၣ် အတၢ်ဃိထံသမံသမိးအံၤ တရူးပဒိၣ်ဟ့ၣ်ဂံၢ်တူၢ်လိာ်၀ဲဒၣ်အဖီခိၣ် KPSN သဂၢၢ်တူၢ်လိာ်၀ဲဘၣ်ဆၣ် တၢ်မ့ၢ်တမၤဖျါထီၣ် သုးပဒိၣ်အတၢ်ဖီၣ်ပျံၤတဖၣ်ဘၣ်န့ၣ် တၢ်ဃိထံသမံသမိးတဖၣ်ကကဲထီၣ်၀ဲဒၣ်တၢ်ကလီကလီလီၤအဂ့ၢ်န့ၣ် KPSN လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ဒ်န့ၣ်အသိး တကီၢ်ခါဆၢကတီၢ်ခဲအံၤ လီၢ်ခၢၣ်သးပဒိၣ်အံၤ ဒုးအိၣ်ထီၣ်၀ဲဒၣ် တၢ်ဃိထံသမံသမိးကွီၢ်ဘျီၣ်ကရူၢ်ဘၣ်ဆၣ် ခီဖျိလၢခိၣ်ဘံၣ်–၁၉ တၢ်ဆါအဃိ ကီၢ်ဆၢတၢ်လီၢ်တဖၣ် တၢ်မၤဃံးထီၣ်၀ဲဒၣ်တၢ်ဟးထီၣ်ဟးလီၤအတီၢ်ပူၤ တၢ်ဆဲးမၤဒံး၀ဲဒၣ်တၢ်သူၣ်ထီၣ်တၢ်ဖံးတၢ်မၤတဖၣ်ဒီး ကၣ်စံၣ်နိၣ်တၢ်ဖံးတၢ်မၤတဖၣ်အဂ့ၢ်န့ၣ် KPSN စံး၀ဲလီၤႉ

ရွှ့ၣ်ကိၣ်ကိၤတၢ်တိာ်ကျဲၤအပူၤ တၢ်မၤ၀ဲဒၣ်ကၣ်စံၣ်နိၣ်တၢ်တၤကျိၣ်တၤစ့အလီၢ်တဖၣ်လၢ တၢ်တဟ့ၣ်အခွဲးလၢအဖိးသဲစး အိၣ်ႇတအိၣ် တၢ်ကဃိထံသမံသမိးအီၤအဂီၢ် လီၢ်ခၢၣ်သးပဒိၣ် ဒုးအိၣ်ထီၣ်၀ဲတၢ်ဃိထံသမံသမိးကွီၢ်ဘျီၣ်အဂ့ၢ် ဖဲအပူၤကွံာ် လါယူၤန့ၣ် စံးဘၣ်ၦၤမၤတၢ်ကစီၣ်ဖိတဖၣ်ဒီး တကီၢ်ခါခိၤဘံၣ်တၢ်ဆါအတီၢ်ပူၤ နုာ်လီၤဃိထံသမံသမိးတၢ်တသ့ဒံးဘၣ်အဂ့ၢ်န့ၣ် ဖဲအပူၤကွံာ် လါယူၤန့ၣ် ကီၢ်စၢဖှိၣ် ပဒိၣ်ကရူၢ်၀ဲၤဒၢးကိတိာ်၀ဲၤကျိၤ ကိတိာ်(၂) အူတ့ၤမၠ့ၣ် စံးတ့ၢ်ပာ်၀ဲလီၤႉ

လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံး၀ဲ“ခဲအံၤ ဖဲအံၤတၢ်သူၣ်ထီၣ်တဖၣ်န့ၣ် ပထံၣ်ဘၣ်လၢ တၢ်သူၣ်ထီၣ်ဒံး၀ဲဒၣ်လီၤႉ မ့ၢ်တမၤတၢ်ဖံးတၢ်မၤန့ၣ် တၢ်အီၣ်တၢ်အီလၢကအီၣ်အဂီၢ်ကအိၣ်၀ဲလဲၣ်ႉ နၢ်ဟူလၢ အ၀ဲသ့ၣ်တၢ်လိာ်ကွွဲတၤကျိၣ်တၤစ့အလီၢ်စ့ၢ်ကီး အိးထီၣ်၀ဲလီၤႉ ဘၣ်ဆၣ် ပလဲၤနုာ်လီၤတန့ၢ်ဘၣ်ႉ နၢ်ဟူဘၣ်လၢခဲအံၤ တရူးတဖၣ် ပျံၤထီၣ်တၢ်တစဲးလီၤႉ နၢ်ဟူ၀ဲဒၣ်လၢၦၤကနီဟးထီၣ်အ၀ဲသ့ၣ်ဒီး တၢ်အဃိန့ၣ် သူၣ်ထီၣ်က့ၤ၀ဲဒၣ်အတၢ်သူၣ်ထီၣ်တဖၣ်ကဘဲးကဘဲးန့ၣ်လီၤႉ လၢညါအပူၤကွံာ် ဟံၣ်တဖျၢၣ်န့ၣ်တ့၀ဲတစိၢ်ဖိဒီး၀ံၤ၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ရွှ့ၣ်ကိၣ်ကိၤ၀့ၢ်သီတၢ်တိာ်ကျဲၤအံၤ အိၣ်သူၣ်လီၤအသး ဖဲကညီကီၢ်စဲၣ်ႇ မၠၣ်၀တံၣ်ကီၢ်ဆၣ် ကီၢ်ပယီၤ–ကီၢ်ကၠီၣ်တဲၣ် ကီၢ်ဆၢ သူမှဲကျိအ၀ဲတကပၤန့ၣ်လီၤႉ ဖဲန့ၣ်တရူးၦၤမၤပနံာ်တၢ်ကၤဖိတဖၣ်ဒီး သုးခိးကီၢ်ဆၢ (BGF) အမုၢ်ကျိၤ၀ဲၤကွာ် ကူၣ်ပနံၣ်တဖၣ်အံၤ တူၢ်လၢာ်အသးလၢစ့ဒီလၣ် ၁၅ ဘံၣ်လံၣ်ယၣ်ဘျဲၣ်ဒီး သူၣ်ထီၣ်၀ဲဒၣ်၀့ၢ်သီတၢ်တိာ်ကျဲၤအံၤန့ၣ်လီၤႉ