ကညီကီၢ်စဲၣ်အဘူၣ်အတီၢ် ဒ်သိးကတုၤလၢပကီၢ်စဲၣ်အစုပူၤအဂီၢ် ဟ့ၣ် KNDP တၢ်ဖးန့ၣ် နါစ့ၤအွၤစံး၀ဲ

လါစဲးပထ့ဘၢၣ် ၁၁ သီႇ ၂၀၂၀ နံၣ်ႇ စီၤရှါ

ကညီကီၢ်စဲၣ်အဘူၣ်အတီၢ်ႇ တၢ်စံၣ်ညီၣ်ပၢလီၤသးခဲွးယာ်တဖၣ်အံၤ ဒ်သိးကတုၤလၢကီၢ်စဲၣ်ဖိအစုပူၤအဂီၢ် ဟ့ၣ်ကညီကလုာ်ဒံၣ်မိၣ်ကရဲၣ်တ့ၣ်ပၣ်တံၣ် -KNDP တၢ်ဖးအဂ့ၢ် ကီၢ်စဲၣ်ဘျီၣ်ဒိၣ်ခၢၣ်စး နါစ့ၤအွၤ စံး၀ဲန့ၣ်လီၤႉ

ဖဲလါစဲးပထ့ဘၢၣ် ၁၀ သီအနံၤ ဖၣ်အၣ်ကီၢ်ဆၣ် မုၢ်ထီၣ်တၢ်လီၢ်ႇ နၣ်ထ့ၣ်ဒူသ၀ီကရူၢ်ႇ နီၤတဲၤသ၀ီအပူၤ KNDP မၤ၀ဲဒၣ်တၢတဘျီတၢ်လီၤကရၢကရိတၢ်ဖး တၢ်ရဲၣ်တၢ်ကျဲၤအပူၤ အ၀ဲစံးလီၤ၀ဲဒၣ်န့ၣ်လီၤႉ

“ပပၣ်တံၣ်မီထိၣ် လၢအမ့ၢ် ‘တၢ်တုၤသိးထဲသိးကလဲၤထီၣ်လဲၤထီအဂီၢ် ဟ့ၣ် KNDP တၢ်ဖးတက့ၢ်’ စံးတၢ်န့ၣ် တၢ်လၢဖဲၣ်ဒရၢၣ်လၢအမ့ၢ် ပကစၢ်ပဘူၣ်ပတီၢ်ဒၣ်၀ဲပဒုးအိၣ်ထီၣ်ကန့ၢ်အဂီၢ်ႇ လၢပကီၢ်စဲၣ်ႇပတၢ်လီၢ်ဟီၣ်က၀ီၤအပူၤ ပအိၣ်ဒီးပ ပဒိၣ်ပၦၢ်ဒီး ဒ်သိးကိးကပၤဒဲးကဂုၤထီၣ်ပသီထီၣ်အဂီၢ် ကအိၣ်ဒီးတၢ်ခဲွးတၢ်ယာ်လၢ ကဆၢတဲာ်လီၤ၀ဲ န့ၣ်လီၤႉ” အဂ့ၢ်န့ၣ် တၢ်ရဲၣ်တၢ်ကျဲၤ၀ံၤ စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါ ပဒိၣ်လၢကဟဲထီၣ်တဖၣ်အံၤ သူၣ်အိၣ်သးအိၣ်လၢတၢ်မၤဖျါထီၣ်ဒံၣ်မိၣ်ခြ့ၣ်စံၣ်ဒီး ကလုာ်ဒူၣ်တဖၣ်ႇ ကလုာ်ဒူၣ်ပၣ်တံၣ်တဖၣ် မ့ၢ်ပာ်ဖှိၣ်ဟံးထီၣ်ဖီၣ်ထီၣ်မး ကီၢ်စဲၣ်တၢ်လီၢ်တဖၣ်အတၢ်မုာ်တၢ်ခုၣ်ႇ ဖဲၣ်ဒရၢၣ်တၢ်ဂ့ၢ်ႇ တၢ်ဂုၤထီၣ်ပသီထီၣ်တဖၣ်အဂီၢ် တီခိၣ်ရိၣ်မဲ၀ဲဒၣ်ကသ့လီၤအဂ့ၢ်န့ၣ် နါစ့ၤအွၤ ဆဲးစံး၀ဲလီၤႉ

ဖၣ်အၣ်ကီၢ်ဆၣ်ပူၤ KNDP မၤ၀ဲဒၣ်တၢ်လီၤကရၢကရိတၢ်ဟ့ၣ်တၢ်ဖးတၢ်ရဲၣ်တၢ်ကျဲၤအံၤ လၢဂီၤခီန့ၣ် လဲၤ၀ဲဒၣ် ဖဲနၣ်ထ့ၣ်သ၀ီကရူၢ်ႇ ခလီၣ်ထီၤသ၀ီကရူၢ်ဒီး ဖဲမုၢ်ထူၣ်န့ၣ် လဲၤ၀ဲဒၣ် ဖဲထီၤကလၣ်သ၀ီကရူၢ်တဖၣ်အပူၤ နီၤဖးလီၤ၀ဲတၢ်လီၢ် ၃ တီၤဒီး မၤ၀ဲဒၣ်ဒ် Covid-19 တၢ်အိၣ်ဆူၣ်အိၣ်ချ့အတၢ်နဲၣ်ကျဲအသိးန့ၣ်လီၤႉ

လၢတၢ်လီၤကရၢကရိတၢ်ဘျီ၀ဲအံၤန့ၣ် KNDP လၢကနုာ်လီၤတပြၢ၀ဲဖဲဖၣ်အၣ်ကီၢ်ဆၣ်ပူၤလၢအမ့ၢ် ကမျၢၢ်ဘျီၣ်ဒိၣ်ခၢၣ်စးလၢကဒိးဃုထၢသး စီၤမ့စီၣ်အူႇ ကလုာ်ဘျီၣ်ဒိၣ်ခၢၣ်စးလၢကဒိးဃုထၢသး တၢ်ဖးလီၢ်က၀ီၤ နီၣ်ဂံၢ်(၆)နါလၣ်ယ့ၤမ့ၤႇ ကီၢ်စဲၣ်ဘျီၣ်ဒိၣ်ခၢၣ်စးလၢကဒိးဃုထၢသး တၢ်ဖးလီၢ်က၀ီၤနီၣ်ဂံၢ်(၂)နါစ့ၤအွၤဒီး ပၣ်တံၣ်ဖိတဖၣ်ႇ ဒူသ၀ီကရူၢ်ပူၤ သ၀ီတဖျၢၣ်စုာ်စုာ်ကမျၢၢ်တဖၣ်ဒီး သစၢ်ကရူၢ်တဖၣ်ဟဲထီၣ်၀ဲဒၣ်န့ၣ်လီၤႉ

ၦၤလၢအဟဲထီၣ်တၢ်လီၤကရၢကရိတၢ်ဟ့ၣ်တၢ်ဖး လၢအမ့ၢ် နၣ်ထ့ၣ်သ၀ီကရူၢ်ႇ လၤခၠီၣ်သ၀ီ စီၤမီၤဒ့ စံး၀ဲလၢ “ကဟ့ၣ်တၢ်ဖးလၢကညီပၣ်တံၣ်လီၤႉ ထၢနုာ်လီၤတၢ်ဖးလၢကညီပၣ်တံၣ်အံၤ မ့ၢ်မၤနၢၤတၢ်ဘၣ်ဖုးန့ၣ် ကညီကလုာ်တဖၣ် ဒ်သိးၦၤကူၣ်ဘၣ်ကူၣ်သ့တဖၣ်ကဟဲအိၣ်အါထီၣ်အဂီၢ်ႇ တၢ်ကူၣ်ဘၣ်ကူၣ်သ့က လဲၤထီၣ်လဲၤထီအဂီၢ် မုၢ်လၢ်လၢကဟံးထီၣ်ဖီၣ်၀ဲလီၤႉ

တၢ်လၢကညီကလုာ်န့ၣ် မ့ၢ်ဘၣ်ထိၣ်သတြီၤဒီးၦၤအဂၤန့ၣ် ၦၤကူၣ်ဘၣ်ကူၣ်သ့အိၣ်စှၤဒံး၀ဲလီၤႉ ၀ံၤဘျီ ကညီလံာ်လဲၢ်ဒီးတၢ်ဆဲးတၢ်လၤတဖၣ် လၢဒူသ၀ီလီၢ်က၀ီၤအဂီၢ် ကျဲတိၤႇ ကိးကပၤဒဲးကလဲၤထီၣ်လဲၤထီအဂီၢ်စ့ၢ်ကီး မိၣ်န့ၢ်သးလီ၀ဲလီၤ” အဂ့ၢ်န့ၣ် စံး၀ဲလီၤႉ

ဖဲဖၣ်အၣ်ႇ ကီၢ်စဲၣ်ဘျီၣ်ဒိၣ် နီၣ်ဂံၢ်(၂) တၢ်ဖးဟီၣ်က၀ီၤပူၤ KNDP တကပၤလၢအမ့ၢ် နါစ့ၤအွၤဃုာ်ဒီး ခၢၣ်စးလၢကဒိးဃုထၢသး ၉ ဂၤ ကပၣ်ဃုာ်တပြၢ၀ဲဒၣ်အသိး လၢအကျါန့ၣ် တကီၢ်ခါ ကီၢ်စဲၣ်ကိတိာ်ခိၣ် နါခ့ၤထွ့မၠ့ၣ်စ့ၢ်ကီး ပၣ်ဃုာ်၀ဲတဂၤန့ၣ်လီၤႉ