လါစဲးပထ့ဘၢၣ် ၇ သီႇ ၂၀၂၀ နံၣ်ႇ စးအဲၣ်ဆူ
ဖဲအ့ၣ်ယၣ်၀တံၣ်ကီၢ်ခီဒိၣ်အပူၤ လၢကဟဲ ၂၀၂၀ တၢ်ဃုထၢဖးဒိၣ်အံၤ ထံရူၢ်ကီၢ်သဲးပၣ်တံၣ် အခၢၣ်စးတဖၣ်ဒီး ခၢၣ်စးလၢကဒိးဃုထၢသးလၢနီၢ်တဂၤတဖၣ် ခၢၣ်စးအနီၣ်ဂံၢ်နီၣ်ဒွးပာ်ဖှိၣ်ခဲလၢာ် ၅၄၂ ဂၤ ကနုာ်လီၤဒိးဃုထၢ တပြၢသးအဂ့ၢ်န့ၣ် သ့ၣ်ညါဘၣ်လၢ ကီၢ်ခီဒိၣ်တၢ်ဃုထၢခီၣ်မံရှၢၣ်ကရူၢ်အဒ့အအိၣ်န့ၣ်လီၤႉ
ဖဲအပူၤကွံာ် ၂၀၁၅ နံၣ် တၢ်ဃုထၢဖးဒိၣ်န့ၣ် အ့ၣ်ယၣ်၀တံၣ်ကီၢ်ခီဒိၣ်အပူၤ ကီၢ်ခီဒိၣ်ဘျီၣ်ဒိၣ်ႇ ကလုာ်ဘျီၣ်ဒိၣ် ဒီးကမျၢၢ်ဘျီၣ်ဒိၣ် တၢ်လီၢ်တဖၣ်အဂီၢ် ခၢၣ်စးလၢအနုာ်လီၤတပြၢတၢ်န့ၣ်အိၣ်ထဲ ၅၀၃ ဂၤန့ၣ်လီၤႉ
“၂၀၂၀ တၢ်ဃုထၢအဂီၢ်ဒု ဖဲအ့ၣ်ယၣ်၀တံၣ်ကီၢ်ခီဒိၣ်အပူၤန့ၣ် ခၢၣ်စးပာ်ဖှိၣ်ခဲလၢာ် ၅၄၄ ဂၤ တီၣ်ထီၣ် ၀ဲအမံၤစ&ီန့ၣ်လီၤႉ ဘၣ်ဆၣ် လၢကမျၢၢ်ဘျီၣ်ဒိၣ်န့ၣ် တၢ်ထူးသံကွံာ်၀ဲ ၂ ဂၤဒီး အိၣ်တ့ၢ်က့ၤ၀ဲ ၅၄၂ ဂၤလီၤႉ အါန့ၢ်ဒံးအပူၤကွံာ် ဖဲ၂၀၁၅ နံၣ်ဒီး ၂၀၂၀န့ၣ် ခၢၣ်စးလၢကဒိးဃုထၢသးဟဲအါထီၣ်၀ဲဒၣ် ၃၉ ဂၤလီၤ” အဂ့ၢ်န့ၣ် အ့ၣ်ယၣ်၀တံၣ်ကီၢ်ခီဒိၣ် တၢ်ဃုထၢခီၣ်မံရှၢၣ်ကရူၢ်အဒ့ နဲၣ်ရွဲၣ် အူမၠ့ၣ်နဲၤ စံးဘၣ်ခ့ၣ်အဲးစံၣ်လီၤႉ
၂၀၂၀ တၢ်ဃုထၢဖးဒိၣ်အံၤ လၢအ့ၣ်ယၣ်၀တံၣ်ကီၢ်ခီဒိၣ်အပူၤ ထံရူၢ်ကီၢ်သဲးပၣ်တံၣ် ၂၂ ပၣ်တံၣ်ဃုာ်ဒီး ခၢၣ်စးလၢကဒိးဃုထၢသးလၢနီၢ်တဂၤတဖၣ် လၢကလုာ်ဘျီၣ်ဒိၣ် တၢ်လီၢ် ၁၂ တီၤအဂီၢ် ခၢၣ်စးလၢကဒိးဃုထၢသးလၢနီၢ်တဂၤအိၣ် ၅၆ ဂၤႇ ကမျၢၢ်ဘျီၣ်ဒိၣ် တၢ်လီၢ်၂၆ တီၤအဂီၢ်အိၣ် ၁၅၁ ဂၤဒီး ကီၢ်ခီဒိၣ်ဘျီၣ်ဒိၣ် တၢ်လီၢ် ၅၂ တီၤအဂီၢ် ၃၃၅ ဂၤ ကနုာ်လီၤဃုထၢတပြၢသးအဂ့ၢ်န့ၣ် သ့ၣ်ညါဘၣ်လၢ ကီၢ်ခီဒိၣ် ခီၣ်မံရှၢၣ်ကရူၢ်အဒ့အအိၣ်န့ၣ်လီၤႉ
ဖဲအကျါန့ၣ် ခၢၣ်စးလၢကနုာ်လီၤဃုထၢတပြၢသးလၢနီၢ်တဂၤန့ၣ်အိၣ်၀ဲဒၣ် ၁၆ ဂၤဒီး လၢကီၢ်ခီဒိၣ်ဘျီၣ်ဒိၣ် ကလုာ်ဒူၣ်ကလုာ်ခၢၣ်စးအဂီၢ် ကညီကလုာ်ဒူၣ်ဂ့ၢ်၀ီ ကိတိာ်အလီၢ် ၆ ဂၤဒီး လၢရၢၣ်ခၢၣ်ကလုာ်ဒူၣ်ဂ့ၢ်၀ီအလီၢ်အဂီၢ် ပၣ်ဃုာ်၀ဲဒၣ် ၅ ဂၤလီၤအဂ့ၢ်န့ၣ် ကီၢ်ခီဒိၣ် ခီၣ်မံရှၢၣ်ကရူၢ်အဒ့ နဲၣ်ရွဲၣ် စံး၀ဲဒၣ်လီၤႉ
ဖဲအ့ၣ်ယၣ်၀တံၣ်ကီၢ်ခီဒိၣ်အပူၤ ကီၢ်ဆၣ် ၂၆ ဘ့ၣ်အံၤ က၀ီၤဒ့ဒီးဒူသ၀ီခဲလၢာ်ပာ်ဖှိၣ် ၂ႇ၂၂၂ခါ ႇ တၢ်ဖးအလီၢ်ပာ်ဖှိၣ်အိၣ်၀ဲ ၅ႇ၇၄၁ တီၤဒီး ၦၤဟ့ၣ်တၢ်ဖးဖိ နီၣ်ဂံၢ်ခဲလၢာ်အိၣ်၀ဲ ၄ႇ၄၄၁ႇ၆၉၆ ဂၤအဂ့ၢ်န့ၣ် ကီၢ်ခီဒိၣ် တၢ်ဃုထၢခီၣ်မံရှၢၣ်ကရူၢ်အဒ့စရီတဖၣ်အသိး သ့ၣ်ညါဘၣ်လီၤႉ
ဒ်ကီၢ်စၢဖှိၣ်တၢ်ဃုထၢခီၣ်မံရှၢၣ် အလံာ်တၢ်ပာ်ဖျါအပူၤအသိး ဖဲလါနိၣ်၀့ဘၢၣ် ၈ သီအနံၤ တၢ်ကမၤ၀ဲ တၢ်ဃုထၢဖးဒိၣ်အံၤ လၢထံကီၢ်ဒီဘ့ၣ်အပတီၢ် ကမျၢၢ်ဘျီၣ်ဒိၣ်အလီၢ်အဂီၢ်န့ၣ် ထံရူၢ်ကီၢ်သဲးပၣ်တံၣ် အခၢၣ်စး ၁ႇ၈၆၃ ဂၤဒီး ခၢၣ်စးလၢကဒိးဃုထၢသးလၢနီၢ်တဂၤအိၣ် ၇၁ ဂၤ ပာ်ဖှိၣ်ခဲလၢာ်အိၣ်၀ဲ ၁ႇ၉၃၄ ဂၤလီၤအဂ့ၢ်န့ၣ် သ့ၣ်ညါဘၣ်လီၤႉ
ဖဲန့ၣ် လၢကလုာ်ဘျီၣ်ဒိၣ်အလီၢ်အဂီၢ်န့ၣ် ထံရူၢ်ကီၢ်သဲးပၣ်တံၣ် အခၢၣ်စး ၉၄၇ ဂၤဒီး ခၢၣ်စးလၢကဒိးဃုထၢသးလၢနီၢ်တဂၤန့ၣ် ၂၉ ဂၤ ပာ်ဖှိၣ်ခဲလၢာ်အိၣ်၀ဲ ၉၇၆ ဂၤလီၤႉ ကီၢ်ခီဒိၣ် မ့တမ့ၢ် ကီၢ်စဲၣ်ဘျီၣ်ဒိၣ်အလီၢ်အဂီၢ်န့ၣ် ထံရူၢ်ကီၢ်သဲးပၣ်တံၣ်တဖၣ်န့ၣ် ၃ႇ၇၀၀ ဂၤဒီး ခၢၣ်စးလၢကဒိးဃုထၢသးလၢနီၢ်တဂၤအိၣ် ၁၄၇ ဂၤ ပာ်ဖှိၣ်ခဲလၢာ်အိၣ်၀ဲ ၃ႇ၈၄၇ ဂၤလီၤအဂ့ၢ်န့ၣ် သ့ၣ်ညါဘၣ်လီၤႉ
လၢန့ၣ်အမဲာ်ညါ ကီၢ်ခီဒိၣ်ႇ ကီၢ်စဲၣ်ဘျီၣ်ဒိၣ် ကလုာ်ဒူၣ်ကလုာ်ခၢၣ်စးအလီၢ်အဂီၢ်န့ၣ် ထံရူၢ်ကီၢ်သဲးပၣ်တံၣ်တဖၣ် ၁၇၉ ဂၤဒီး ခၢၣ်စးလၢကဒိးဃုထၢသးလၢနီၢ်တဂၤ ၃၃ ဂၤ ကနုာ်လီၤတပြၢ၀ဲဒၣ်အဃိ ပာ်ဖှိၣ်ခဲလၢာ်အိၣ်၀ဲဒၣ် ၂၁၂ ဂၤ အဂ့ၢ်န့ၣ် သ့ၣ်ညါဘၣ်လီၤႉ
လၢကဟဲ ၂၀၂၀ တၢ်ဃုထၢအံၤ လၢထံကီၢ်ဒီတဘ့ၣ်အပတီၢ် ဘျီၣ်ဒိၣ်(၃)တီၤအလီၢ်အဂီၢ်န့ၣ် ထံရူၢ်ကီၢ်သဲးပၣ်တံၣ်ခၢၣ်စး ခၢၣ်စးလၢကဒိးဃုထၢသးအိၣ်၀ဲ ၆ႇ၆၈၉ ဂၤဒီး ခၢၣ်စးလၢကဒိးဃုထၢသးလၢနီၢ်တဂၤအိၣ်၀ဲ ၂၈၀ ဂၤ ဖဲန့ၣ်ခၢၣ်စးခဲလၢာ်ပာ်ဖှိၣ်အိၣ်၀ဲ ၆ႇ၉၆၉ ဂၤ ကနုာ်လီၤတပြၢ၀ဲအဂ့ၢ်န့ၣ် ကီၢ်စၢဖှိၣ်တၢ်ဃုထၢခီၣ်မံရှၢၣ် လံာ်တၢ်ပာ်ဖျါတဖၣ်အသိး သ့ၣ်ညါဘၣ်လီၤႉ
