ၦၤတဒူၣ်လၢအမၤသံ၀ဲဒၣ်ၦၤကညီခံဂၤအံၤ တၢ်ကဟံအရ့ဒ်ကီၢ်သူလ့ၤသဲစးသနူအသိး

လါစဲးပထ့ဘၢၣ် ၃၀ သီႇ ၂၀၂၀ နံၣ်ႇ စးအဲၣ်ဆူ

ဖဲလါစဲးပထ့ဘၢၣ်ထီၣ်သီအခါန့ၣ် တၢ်ကဲထီၣ်သး ဖဲကညီကီၢ်စဲဲၣ်ႇ ဖၣ်အၣ်ကီၢ်ရ့ၣ်ႇ ပဲၤကၠိၤ(တၢ်ကြဲၢ်)ကီၢ်ဆၣ်ႇ ၦၤတဒူၣ်လၢအအိၣ်သ့ၣ်မီၤကၣ်အံၤ လၢအမ့ၢ်၀ဲၦၤတဒူၣ်လၢအမၤသံ၀ဲဒၣ်ၦၤကညီခံဂၤအံၤန့ၣ် တၢ်ကဟံးအရ့ဒ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သူလ့ၤသဲစးသနူအသိးအဂီၢ် တၢ်ရဲၣ်ကျဲၤ၀ဲအဂ့ၢ်န့ၣ် KNU တကပၤ စံး၀ဲန့ၣ်လီၤႉ

ဖဲအပူၤကွံာ် လါစဲးပထ့ဘၢၣ် ၁ သီအနံၤန့ၣ် မဲၢ်ပျၤခံသ၀ီဖိလၢအဟဲဆှၢတူၢ်ငါကျီၢ်ခံဂၤအံၤ ဖဲအဟဲတုၤလၢလၢၢ်ကဆီတၢ်လီၢ်အဆၢကတီၢ် ၦၤတဒူၣ်အံၤဖီၣ်ဆၢဃာ်၀ဲဒၣ်ဒီး မၤသံ၀ဲတုၤလၢအသံတစုအဃိ ၦၤလၢအမၤကမၣ်တၢ်ဃုာ်ဒီးၦၤနဲၣ်လီၤတၢ်ဖိအံၤ KNU တကပၤ ဖီၣ်ဃာ်၀ဲဒၣ်ဒီး ကဟံးအရ့အဂီၢ်ဟံးထီၣ်ဖီၣ်ထီၣ်၀ဲလံအဂ့ၢ်န့ၣ် KNU နဲၣ်ရွဲၣ်(၂) ပဒိၣ်စီၤလၣ်ထိ စံး၀ဲန့ၣ်လီၤႉ

အ၀ဲစံး၀ဲလၢ “တၢ်ဂ့ၢ်အ၀ဲအံၤ မ့ၢ်၀ဲဒၣ်တၢ်မၤကမၣ်သဲစးအဃိ တၢ်မူးတၢ်ရၢ်လၢအဘၣ်ထွဲတဖၣ် ဒ်သိးတၢ်မ့ၢ်တၢ်တီကအိၣ်ထီၣ်အဂီၢ်တခီန့ၣ် ဟ့ၣ်လီၤ၀ဲမူဒါဆူ KNPF (ကညီဒီကလုာ်ပၢၤကီၢ်သုးကရူၢ်)အစုပူၤန့ၣ်လီၤႉ ခီဖျိလၢမ့ၢ်၀ဲဒၣ် ဖၣ်အၣ်ကီၢ်ရ့ၣ်ႇ သုးက့(၇)တကပၤအဃိ ကီၢ်ရ့ၣ်ၦၤပၢဆှၢတၢ်တကပၤမ့ၢ်ဂ့ၤ သုးက့တကပၤမ့ၢ်ဂ့ၤ ပာ်ဖှိၣ်ဟံးမူဒါဖံးမၤ၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

တၢ်မၤသံမၤ၀ီတၢ်ဂ့ၢ်အံၤ ၦၤလၢအမၤကမၣ်တၢ်အခိၣ်သ့ၣ်န့ၣ် မ့ၢ်၀ဲဒၣ် ၃ ဂၤဒီး ၦၤလၢအပၣ်ဃုာ်ပၣ်ဂီၢ်တဖၣ်ဒီးၦၤလၢအနဲၣ်လီၤမၢတၢ်အံၤ မ့ၢ်၀ဲဒၣ်ဖုအ့းသ့းတၢ်ဘူၣ်တၢ်ဘါခိၣ်နၢ်တဂၤဒီး ပာ်ဖှိၣ်ခဲလၢာ်အိၣ်၀ဲ(၁၆)ဂၤန့ၣ်လီၤႉ ဒီးၦၤသ့ၣ်တဖၣ်အံၤ ဒ်ကီၢ်ရ့ၣ်အပတီၢ် ကညီဒီကလုာ်ပၢၤကီၢ်သုးကရူၢ် KNPF သမံသမိး၀ဲအသိး အ၀ဲသ့ၣ်အၢၣ်လီၤအတၢ်ကမၣ်အဂ့ၢ်န့ၣ် သ့ၣ်ညါဘၣ်လၢ KNU သုးက့(၇)ၦၤဘၣ်မူဘၣ်ဒါအအိၣ်န့ၣ်လီၤႉ

တၢ်ဂ့ၢ်အ၀ဲအံၤ ခီဖျိလၢ ကီၣ်ရ့ၣ်အပတီၢ် ဘှါရှဲဟံးထီၣ်ဖီၣ်ထီၣ်၀ဲအဃိ ပၢၤကီၢ်သုးအတၢ်ဃိထံသ့ၣ်ညါတဖၣ်အံၤ တသ့ၣ်ညါဘၣ်လီၤတံၢ်လီၤဆဲးဘၣ်အဃိ ဘၣ်ဃးဒီးတၢ်စံၣ်ညီၣ်တဲာ်တကပၤအံၤ ကတဲအီၤလၢလီၤတံၢ်လီၤဆဲးအဂီၢ် ကီခဲ၀ဲအဂ့ၢ်န့ၣ် KNU လီၢ်ခၢၣ်သး စံၣ်ညီကွီၢ်ခိၣ် ပဒိၣ်နီၢ်မၠဲၤဖိ စံး၀ဲန့ၣ်လီၤႉ

ပဒိၣ်နီၢ်မၠဲၤဖိစံး၀ဲလၢ “အ၀ဲသ့ၣ်တဲ၀ဲလၢ တၢ်မၤသံမၤ၀ီလီၤဘၣ်ဆၣ် တၢ်မၤသံမၤ၀ီတၢ်မူးတၢ်ရၢ်အံၤ တၢ်စံၣ်ညီၣ်ဆၢတဲာ်လီၤအိၣ်၀ဲဒၣ်အကလုာ်ကလုာ်လီၤမီၤႉ တနီၤန့ၣ် အနံၣ်တဆံဧါ တဆံယဲၢ်နံၣ်ဧါန့ၣ် ဒုးလီၤလၢဃိာ်ပူၤန့ၢ်၀ဲလီၤႉ ဒိးသန့ၤထီၣ်အသးလၢ ပၢၤကီၢ်သုးတဖၣ်သမံသမိးဃိထံသ့ၣ်ညါ၀ဲအဖီခိၣ်ဒီး ဒ်အ၀ဲသ့ၣ်တီၣ်ထီၣ်တၢ်မူးတၢ်ရၢ်အကူာ်တဖၣ်အသိးန့ၣ် ကဘၣ်ဆၢတဲာ်စံၣ်ညီၣ်၀ဲလီၤမီၤႉ လီၤဘၣ်တၢ်ကမၣ်တစိၤသးႇ တုၤလၢတၢ်သံအပတီၢ်တစုစ့ၢ်ကီး တုၤ၀ဲန့ၢ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ဖဲအပူၤကွံာ် လါစဲးပထ့ဘၢၣ်(၉)သီအနံၤန့ၣ် လၢ(social media)အပူၤ ဒ်တၢ်ဂီၤမူဟဲဖျါထီၣ်၀ဲဒၣ်တခါအသိး ပထံၣ်ဘၣ်လၢ တၢ်ဆၢတံၢ်ဃာ်၀ဲဒၣ်ၦၤခံဂၤအံၤအစုလၢအလီၢ်ခံဒီး ၦၤတဒူၣ်အံၤတီၢ်၀ဲမၤဒၢၣ်၀ဲႇ အခိၣ်ႇ ကိာ်ဘိဒီး အဂုာ်ဃံကပၤတဖၣ် တၢ်ဆဲး၀ဲဒီးဒီအဘျီတဖၣ်အဘျီန့ၣ်လီၤႉ

ဘၣ်ထွဲတၢ်မူးတၢ်ရၢ်၀ဲအံၤန့ၣ် ဒ်သိးတၢ်ကမၤဖျါထီၣ်၀ဲအဂီၢ် တၢ်ဒုးအိၣ်ထီၣ်၀ဲ တၢ်ဃိထံ သ့ၣ်ညါကရူၢ်တကရူၢ် လၢအပၣ်ဃုာ်၀ဲဒၣ်ဒီး ခ့ၣ်အဲၣ်ယူၣ် လီၢ်ခၢၣ်သးပၢဆှၢတၢ်ကမံးတံာ်တဖၣ်ႇ ဖၣ်အၣ်ကီၢ်ရ့ၣ် ၦၤပၢၤလီၢ်ဆ့ၣ်နီၤႇ နဲၣ်ရွဲၣ် ကရူၢ်ဖိတဖၣ် ဃုာ်ဒီး ဟီၣ်က၀ီၤ ၦၤဘၣ်မူဘၣ်ဒါတဖၣ်အံၤန့ၣ်လီၤႉ