Home တၢ်ကစီၣ် Covid-19 အဆၢကတီၢ် KNU တၢ်ပၢဟီၣ်က၀ီၤအပူၤ တၢ်က့ၤမၤဃံးထီၣ်၀ဲတၢ်ဟးထီၣ်က့ၤလီၤ

Covid-19 အဆၢကတီၢ် KNU တၢ်ပၢဟီၣ်က၀ီၤအပူၤ တၢ်က့ၤမၤဃံးထီၣ်၀ဲတၢ်ဟးထီၣ်က့ၤလီၤ

1398
0

လါစဲးပထ့ဘၢၣ် ၉ သီႇ ၂၀၂၀ နံၣ်ႇ နါ၀့ၤဖၠိစၣ်

တကီၢ်ခါ ကီၢ်ပယီၤအပူၤ ၦၤဘၣ်ကူဘၣ်ဂာ် covid တၢ်ဆါတဖၣ် ဟဲအါထီၣ်၀ဲဒၣ်ကိးနံၤဒဲးအဃိ ဒ်သိးတၢ်ကဒီ တဒၢ၀ဲတၢ်ဆါဘၣ်ကူဘၣ်ဂာ်လၢဟီၣ်က၀ီၤပူၤကန့ၢ်အဂီၢ် KNU- ညီဒီကလုာ်စၢဖှိၣ်ကရၢ တၢ်ပၢဟီၣ်က၀ီၤတဖၣ်အပူၤ တၢ်ကက့ၤမၤဃံးထီၣ်ကဒါတၢ်ဟးထီၣ်က့ၤလီၤအဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါတဖၣ် စံးဘၣ်ခ့ၣ်အဲးစံၣ်လီၤႉ

KNU တၢ်ပၢဟီၣ်က၀ီၤအပူၤ လၢအဘၣ်ထွဲကီၢ်ရ့ၣ်တဖၣ်စုာ်စုာ် ဟီၣ်က၀ီၤကိးဘ့ၣ်ဒဲးအပူၤ KNU တကပၤ တၢ် နုာ်လီၤဟးထီၣ်တၢ်သမံသမိးအလီၢ်တဖၣ်ဒီး တၢ်သိၣ်တၢ်သီတဖၣ်အံၤ တၢ်ထုးထီၣ်၀ဲစးထီၣ်လၢခိၣ်ဘံၣ်ကဲထီၣ် သးအခါလံၤလံၤန့ၣ် တၢ်က့ၤထုးကွံာ်၀ဲဒၣ်တၢ်သိၣ်တၢ်သီတဖၣ်တအိၣ်၀ဲဘၣ်အဃိ တုၤလၢအခဲအံၤမူ ဒံး၀ဲဒၣ်လီၤအဂ့ၢ်န့ၣ် KNU တီအူကီၢ်ရ့ၣ်(သုးက့ ၂ ) ပဒိၣ်စီၤအဲၣ်၀ါ စံးဘၣ်ခ့ၣ်အဲးစံၣ်လီၤႉ

အ၀ဲစံး၀ဲလၢ “လၢသုးက့ ၂ ဟီၣ်က၀ီၤပူၤဒု ပထုးထီၣ်ပာ်၀ဲတၢ်သိၣ်တၢ်သီလၢညါလံၤလံၤလံလီၤႉ မၤစ့ၢ်ကီး၀ဲဒၣ် တၢ်သမံသမိးလီၤႉ ဆၢကတီၢ်ခဲအံၤဒု တၢ်ဘၣ်ကူဘၣ်ဂာ်အါထီၣ်၀ဲဒၣ်န့ၣ် ဒ်သုသ့ၣ်ညါဘၣ်အသိးလီၤႉ ဒ်သိးပကတြီဆၢ ပတၢ်လီၢ်ပထံဖိကီၢ်ဖိကသ့အဂီၢ် ဒ်တၢ်ပာ်ပနီၣ်၀ဲတၢ်သိၣ်တၢ်သီအသိးန့ၣ် ပကဘၣ်လူၤပိာ်မၤထွဲလီၤႉ ၀ံၤ ဘျီဆၢကတီၢ်ခဲအံၤန့ၣ် မ့ၢ်လၢမးအံးသၣ်ဟးထီၣ်အဆၢကတီၢ်အဃိ ၦၤလၢတၢ်ချၢ ကဟဲအါ၀ဲႇ တၢ်ကမၤအါ ထီၣ်တၢ်သမံသမိးတၢ်အိၣ်ဆူၣ်အိၣ်ချ့အလီၢ်အဂီၢ် ကမျၢၢ်တဖၣ်ဃ့ထီၣ်အိၣ်၀ဲဒၣ်စ့ၢ်ကီးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါ တၢ်လီၢ်တနီၤန့ၣ် တၢ်သမံသမိးတၢ်အိၣ်ဆူၣ်အိၣ်ချ့လၢတၢ်ကးတံာ်ကွံာ်၀ဲတဖၣ် တၢ်က့ၤအိးထီၣ်၀ဲ ဒီး ၦၤလၢအဟးထီၣ်ဟးလီၤတဖၣ်န့ၣ် တၢ်မၤ၀ဲဒၣ်တၢ်သမံသမိးတၢ်အိၣ်ဆူၣ်အိၣ်ချ့ႇ မၢအကးဘၢနါဒ့ႇ မၢသ့ဃၢၤစုတဖၣ်အသိး တၢ်သမံသမိး၀ဲဒၣ်နီၢ်ကစၢ်တၢ်ဂ့ၢ်တၢ်ကျိၤတဖၣ်အိၣ်၀ဲအဂ့ၢ်န့ၣ် ကီၢ်ရ့ၣ် ၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ

KNU တၢ်ပၢဟီၣ်က၀ီၤအပူၤ ဒူသ၀ီတဖၣ် ဆၢကတီၢ်ခဲအံၤ တၢ်တြီဃာ်၀ဲဒၣ်တၢ်ဟးထီၣ်က့ၤလီၤအိၣ်၀ဲအသိး တၢ်ဂ့ၢ်အရ့ဒိၣ်မ့ၢ်တအိၣ်ဘၣ်န့ၣ် တဘၣ်ဟးထီၣ်လၢတၢ်ချၢဘၣ်ဒီး မ့ၢ်ဟးထီၣ်လၢတၢ်ချၢန့ၣ် ကဘၣ်ဟံန့ၢ်၀ဲ လံာ်တူၢ်လိာ်၀ံၤ ကဘၣ်လဲၤ၀ဲဒ်တၢ်အိၣ်ဆူၣ်အိၣ်ချ့အတၢ်နဲၣ်ကျဲအသိးလီၤန့ၣ် KNU ထုးထီၣ်ဘိးဘၣ်ရၤလီၤ၀ဲန့ၣ်လီၤႉ

ၦၤလၢအအိၣ် ဒူပျာ်ယာ်ကီၢ်ရ့ၣ် ကၠိၤဒိကီၢ်ဆၣ် နါဖီၣ်အွၤ စံး၀ဲ “ခဲအံၤန့ၣ် ဘှ့ၣ်ဘှီၣ်၀ဲလီၤႉ ၦၤလၢတၢ်ချၢစ့ၢ်ကီး ဟဲလၢသ၀ီတန့ၢ်လၢၤဘၣ်ႉ ၦၤအိၣ််လၢသ၀ီပူၤတဖၣ်စ့ၢ်ကီး ဟးထီၣ်တၢ်ချၢတန့ၢ်ဘၣ်ႇ မ့ၢ်သ့န့ၣ် ပာ်ဖှိၣ်ဃာ်တၢ်အီၣ်တၢ်အီန့ၣ် သ၀ီသးၦၢ်တဖၣ်တဲ၀ဲလီၤႉ ခီဖျိလၢတၢ်သမံသမိး၀ဲဒၣ်တၢ်ဟးထီၣ်က့ၤလီၤအိၣ်အဃိ ၦၤဟးထီၣ်ဟးလီၤတအိၣ်၀ဲအါအါလၢၤဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

KNU တၢ်ပၢဟီၣ်က၀ီၤအပူၤ တၢ်အိၣ်ဆူၣ်အိၣ်ချ့အလီၢ်လၢတၢ်အိးထီၣ်ဃာ်၀ဲတဖၣ်အံၤဒီး ကီၢ်သူလ့ၤတၢ်အိၣ်ဆူၣ်အိၣ်ချ့ဒီးတၢ်တိစၢၤမၤစၢၤ၀ဲၤကျိၤ -KDHW လၢ ကီၢ်ဆၣ်လၢအဘၣ်ထဲအွပူၤ ပာ်ဖှိၣ်ထီၣ်သးဒီး ၦၤလၢအဟးထီၣ်က့ၤလီၤတဖၣ်အံၤ တၢ်မၤ၀ဲဒၣ် တၢ်သမံသမိးတၢ်အိၣ်ဆူၣ်အိၣ်ချ့အိၣ်၀ဲအဂ့ၢ် သ့ၣ်ညါဘၣ်လီၤႉ