Home တၢ်ကစီၣ် ခိ၀ံၣ်အဆၢကတီၢ် KNU မၤစၢၤဆီၣ်ထွဲ၀ဲ ဂံၢ်ခီၣ်ထံးၦၤပတီၢ်မုၢ်ဖိတဖၣ်အဂီၢ် ဟုသး အထၢၣ် ၂၀၀၀ ဃၣ်ဃၣ်

ခိ၀ံၣ်အဆၢကတီၢ် KNU မၤစၢၤဆီၣ်ထွဲ၀ဲ ဂံၢ်ခီၣ်ထံးၦၤပတီၢ်မုၢ်ဖိတဖၣ်အဂီၢ် ဟုသး အထၢၣ် ၂၀၀၀ ဃၣ်ဃၣ်

238
0
လါအီးကထိဘၢၣ် ၁၄ သီႇ ၂၀၂၀ နံၣ်ႇ စီၤမၠၣ်အူသၤ

ဖဲဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ်အပူၤ ခိ၀ံၣ်တၢ်ဆါကဆၢကတီၢ် ဂံၢ်ခီၣ်ထံးၦၤပတီၢ်မုၢ်ဖိလၢအထံၣ်ဘၣ်၀ဲ တၢ်လုၢ်အီၣ်နီၢ်ခိသးသမူကီခဲ၀ဲတဖၣ်အဂီၢ် KNU- ကညီဒီကလုာ်စၢဖှိၣ်ကရၢ စးထီၣ်မၤစၢၤဆီၣ်ထွဲ၀ဲဒၣ် ဟုသး အထၢၣ် ၂၀၀၀ ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢကီၢ်ဆၣ်ၦၤဘၣ်မူဘၣ်ဒါအအိၣ်န့ၣ်လီၤႉ

ခ့ၣ်အဲၣ်ယူၣ်တၢ်ပၢဟီၣ်က၀ီၤ လၢအမ့ၢ် သရိာ်၀ါ(သၤဖၠူၤစယၣ်)ႇ ယ့ႇ ဃိၣ်သၢဖျၢၣ်ႇ ဒူသ၀ီတဖၣ် စးထီၣ်ဖဲလါအီးကထိဘၢၣ်ထီၣ် ၁ သီအနံၤန့ၣ် တၢတဘျီ မၤစၢၤ၀ဲဒၣ် ဟံၣ်ခိၣ်တဖျၢၣ်န့ၣ် ဟုသး ၂ နာ် တထၢၣ်စုာ်စုာ်အဂ့ၢ်န့ၣ် ကညီဒီကလုာ်စၢဖှိၣ်ကရၢတၢ်ထူၣ်ဖျဲးသုးမုၢ်ဒိၣ် -KNLA သုးက့ ၆ႇ သုး၀ဲၤလီၢ်ခိၣ်သ့ၣ် သုးဒ့ ၦၤဘၣ်မူဘၣ်ဒါ သုးခိၣ်စိ စီၤဘိၤဘိၤထိ စံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ “သ၀ီလၢအိၣ်ကလံၤထံးမုၢ်နုၤတကပၤတဖၣ် ဟ့ၣ်လီၤ၀ဲဒၣ်ဟုသး အထၢၣ် ၆၅၀ န့ၣ်လီၤႉ သ၀ီလၢအိၣ် ကလ့ၣ်တိၣ် ဒီး လ့ၣ်ပိၣ်ကရူၢ်တဖၣ် ဟ့ၣ်နီၤလီၤ၀ဲဟုသး အထၢၣ် ၁ႇ၁၀၀ လီၤႉ ဖဲအပူၤကွံာ်တနံၣ်န့ၣ် ထံဒိၣ်ထီၣ်ႇ တနံၣ်အံၤစ့ၢ်ကီး တၢ်ဆါကဲထီၣ်အဃိ ကမျၢၢ်သ့ၣ်တဖၣ်တၢ်ကီတၢ်ခဲအိၣ်၀ဲဒၣ်လီၤႉ ကညီသ၀ီမ့ၢ်ဂ့ၤႇ မိၣ်သ၀ီမ့ၢ်ဂ့ၤ ပတနီၤဖး၀ဲကလုာ်ဘၣ်ဒီး ဟ့ၣ်နီၤလီၤ၀ဲဒၣ်ခဲလၢာ်လီၤႉ ကမၤစၢၤလၢလၢၦဲၤၦဲၤအဂီၢ်ဒု မၤစၢၤတန့ၢ်ဒံးဘၣ်လီၤ” အဂ့ၢ်န့ၣ် စံး၀ဲဒၣ် ဖဲလါအီးကထိဘၢၣ် ၁၀ သီအနံၤန့ၣ်လီၤႉ

KNU ၀ီၢ်ရီကီၢ်ဆၣ်အပူၤ covid-19 တၢ်ဆါအကတီၢ် ၦၤလၢအအိၣ်ဟဲလၢတၢ်လီၢ်လၢအယံၤတဖၣ် ဒူသ၀ီအါဒၣ်တက့ၢ်န့ၣ် တၢ်တြီဃာ်၀ဲဒၣ်တၢ်ဟးထီၣ်နုာ်လီၤဒီး လီၢ်က၀ီၤဖိတဖၣ် တၢ်လုၢ်အီၣ်နီၣ်ခိသးသမူလၢအမၤညီနုၢ်၀ဲတဖၣ်တနီၤန့ၣ် အိၣ်ပတုာ်သးအိၣ်၀ဲအဃိ ထံၣ်ဘၣ်၀ဲဒၣ်ဒီးတၢ်လုၢ်အီၣ်နီၢ်ခိသးသမူတၢ်ကီတၢ်ခဲတဖၣ်လီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ

ကလ့ၣ်တိၣ်သ၀ီဖိ စီၤမၠ့ၣ်အူ စံး၀ဲလၢ “ခဲအံၤ ဘၣ်ကျီဆါအီၣ်၀ဲ သ့ၣ်တဖၣ်ႇ၀ၣ်တဖၣ်လီၤႉ တၢ်တြီဃာ်၀ဲဒၣ် တၢ်ဟးထီၣ်ဟးလီၤအဃိ ကဲထီၣ်တၢ်ကီတၢ်ခဲဒီဒူၣ်ညါလီၤႉ ခိ၀ံၣ်တၢ်ဆါအကတီၢ် ဒ့ၣ်ကမၢ်ထီၣ်အဃိ ဆၢကတီၢ်ခဲအံၤတၢ်လုၢ်အီၣ်နီၢ်ခိသးသမူအဂီၢ်ကီခဲ၀ဲဒၣ်လီၤႉ KNU အံၤ ဒ်တၢ်သ့အိၣ်ဒီးအ၀ဲသ့ၣ်အသိး ဟဲမၤစၢၤဆီၣ်ထွဲ၀ဲဒၣ်ဟုသးအံၤန့ၣ် ပသးခု၀ဲဒၣ်ဒိၣ်မးလီၤ” အဂ့ၢ်န့ၣ် စံး၀ဲလီၤႉ

၀ီၢ်ရီကီၢ်ဆၣ် ဒူသ၀ီတဖျၢၣ်စုာ်စုာ်လၢအအိၣ်လၢ မုၢ်နုာ်တပၤ ဒူသ၀ီတဖၣ်ဒီး မုၢ်ထီၣ်တပၤ သဘၤ၀ၣ်ႇ မဲၢ်ကသးႇ စ့ၤတဲသ၀ီကရူၢ်အပူၤတဖၣ်အံၤ ဒူပျာ်ယာ်ကီၢ်ရ့ၣ် ၀ဲၤကျိၤၦၤဘၣ်မူဘၣ်ဒါတဖၣ်ဒီး KNLA သုးရ့ၣ် ၁၆ အၦၤဘၣ်မူဘၣ်ဒါတဖၣ်ပာ်ဖှိၣ်ထီၣ်သးဒီး မၤစၢၤဆီၣ်ထွဲ၀ဲဒၣ် ဟုသးႇ သိအီၣ်ႇ အံသၣ်သ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ