Home တၢ်ကစီၣ် ပဒိၣ်ဒုးသ့ၣ်ညါ၀ဲ ဖီၣ်စုက၀ဲၤခံဒူၣ် အတၢ်ဂဲၤလိာ်ကွဲဒီးတၢ်တၤကျိၣ်တၤစ့အလီၢ်တနီၤ တၢ်ကဘၣ်ထုးကွံာ်၀ဲ

ပဒိၣ်ဒုးသ့ၣ်ညါ၀ဲ ဖီၣ်စုက၀ဲၤခံဒူၣ် အတၢ်ဂဲၤလိာ်ကွဲဒီးတၢ်တၤကျိၣ်တၤစ့အလီၢ်တနီၤ တၢ်ကဘၣ်ထုးကွံာ်၀ဲ

174
0
မြဝတီနယ်စပ်တစ်နေရာတွင် တွေ့ရသည့် ကာစီနိုရုံတစ်ခု (Photo-Internet)

လါအီးကထိဘၢၣ် ၂၉ သီႇ ၂၀၂၀ နံၣ်ႇ စးအဲၣ်ဆူ

ဖဲကညီကီၢ်စဲၣ်ႇ မၠၣ်၀တံၣ်ကီၢ်ဆၣ်အပူၤ ဖီၣ်စုက၀ဲၤကရူၢ်ခံဒူၣ်အၦၤတဖၣ် တၢ်ဂဲၤလိာ်ကွဲ (game)ကျးလၢအအိးထီၣ်၀ဲတဖၣ်ဒီး တၢ်တၤကျိၣ်တၤစ့အလီၢ်တနီၤန့ၣ် ဖဲတလါအံၤ လါအီးကထိဘၢၣ်လၢာ်အတီၢ်ပူၤ တၢ်ကဘၣ်ထုးကွံာ်၀ဲလၢအ၀ံၤန့ၣ် ကီၢ်စဲၣ် ပဒိၣ်ခၢၣ်စး တၢ်ဘံၣ်တၢ်ဘၢဒီးကီၢ်ဆၢဂ့ၢ်၀ီကိာ်တိာ်အံၤ ဖဲလါအီးကထိဘၢၣ် ၂၀ သီအနံၤန့ၣ် ထီဒါဒုးသ့ၣ်ညါဆှၢထီၣ်၀ဲလံာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ဂဲၤလိာ်ကွဲကျးတဖၣ်ဒီးတၢ်တၤကျိၣ်တၤစ့လီၢ်တဖၣ်အံၤ လၢသ့ၣ်ၦၢ်ဟီၣ်ခိၣ်အ့ရံၣ်ယၣ်အပူၤ တၢ်ဟ့ၣ်အခွဲးတအိၣ်ဘၣ်ဒီးတ့ထီၣ်၀ဲဒၣ်လီၤအဃိ ဖဲတလါအံၤလါလၢာ်န့ၣ် တၢ်ကဘၣ်ထုးကွံာ်၀ဲတုၤလၢအ၀ံၤန့ၣ် ကီၢ်ဆၢဘံၣ်ဘၢကိတိာ် သုးခိၣ်ဒိၣ်စိ မၠိမ့နီၤ ထီဒါဒုးသ့ၣ်ညါ၀ဲဒၣ်န့ၣ်လီၤႉ တၢ်ဂဲၤလိာ်ကွဲ(game)ဒီး တၢ်တၤကျိၣ်တၤစ့အလီၢ်တဖၣ်အံၤ ဖဲမၠၣ်၀တံၣ်ကီၢ်ဆၣ်ႇ ဖလူသ၀ီကရူၢ်ႇ ကၠီးခဲးသ၀ီႇ ကၠီးခဲးပျံၤကွီၤ နီၣ်ဂံၢ်(၃၁)တၢ်လီၢ် သ့ၣ်ၦၢ်ဟီၣ်ခိၣ်အ့ရံၣ်ယၣ်(၃ႉ၀၀)အ့ကၢၣ်အပူၤအံၤ ကျိၣ်ထူဘီသုးကရူၢ်(KKO) သုးခိၣ်ဒိၣ်စိ စဲကၠီၤလၣ်အံၤ အိးထီၣ်၀ဲဒၣ် ကၣ်စံၣ်နိၣ်အမံၤမ့ၢ်(Chongkhaeb Garden Resort) လၢတၢ်ဟ့ၣ်အခွဲးတအိၣ်ဘၣ်အဂ့ၢ်န့ၣ် လံာ်ထီဒါအပူၤပာ်ဖျါ၀ဲဒၣ်န့ၣ်လီၤႉ

ဘၣ်ထွဲဒီးတၢ်ဂ့ၢ်အံၤန့ၣ် ဒံၣ်မိၣ်ခြ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်(DKBA)အံၤ ထိၣ်ဃူထိၣ်ဖိးဘှါရှဲ၀ဲဒၣ်ဒီး ၦၤဘၣ်မူဘၣ်ဒါလၢအဘၣ်ထွဲတဖၣ်လံအဂ့ၢ်ဒီး တၢ်လီၢ်သ့ၣ်တဖၣ်န့ၣ်တမ့ၢ်၀ဲဒၣ်သ့ၣ်ၦၢ်ဟီၣ်ခိၣ်ဘၣ်ဒီး မ့ၢ်၀ဲဟီၣ်ခိၣ်လၢလီၢ်က၀ီၤသ၀ီဖိတဖၣ်အိၣ်ဆိး၀ဲဒၣ်လီၤအဂ့ၢ်န့ၣ် စံး၀ဲဒၣ်လီၤႉ

DKBA သုးရိၣ်မဲခိၣ်ကျၢၢ်–၂ သုးခိၣ်ကျၢၢ်စိ စီၤစတံ စံး၀ဲလၢ “တၢ်ဂ့ၢ်အံၤန့ၣ် သုးရိၣ်မဲခိၣ်ကျၢၢ်(သုးခိၣ်ကျၢၢ်ဒိၣ်စိ စီၤမိၤရှ့)ဘှါရှဲ၀ဲ၀ံၤလံလီၤႉ ကၠီးခဲးဟီၣ်က၀ီၤအံၤ တၢ်ပာ်ပနီၣ်၀ဲဒၣ်လၢသ့ၣ်ၦၢ်ဟီၣ်ခိၣ်ဘၣ်ဆၣ် အနီၢ်ကီၢ်တခီန့ၣ် ဘၣ်နုာ်လီၤ၀ဲဒၣ်လၢထံလီၢ်ကီၢ်ပူၤတၢ်ပၢ အပူၤလံလီၤႉ ဖဲန့ၣ်ဟံၣ်အိၣ်၀ဲဒၣ်တကယၤဘျဲၣ်ခံကယၤဘျဲၣ်လံလီၤႉ တၢ်အံၤလိၣ်၀ဲဒၣ်လၢတၢ်ပၢ ဆှၢတၢ်တကပၤလီၤႉ ဒူသ၀ီကရူၢ်ခိၣ်တဖၣ်လိၣ်၀ဲလီၤႉ တတီၣ်ထီၣ်၀ဲဒၣ်ဆူထံလီၢ်ကီၢ်ပူၤအအိၣ်ဘၣ်အဃိ ထံလီၢ်ကီၢ်ပူၤတနၢ်ပၢၢ်၀ဲဘၣ်ဒီး တတဲ၀ဲဒၣ်လၢဒူသ၀ီဟီၣ်ခိၣ်ဘၣ်ဒီးတဲက့ၤ၀ဲဒၣ်လၢသ့ၣ်ၦၢ်ဟီၣ်ခိၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါဘၣ်ထွဲဒီးကၣ်စံၣ်နိၣ်တၢ်ဂ့ၢ်အံၤစ့ၢ်ကီး ကၣ်စံၣ်နိၣ်အလီၢ်လၢအိၣ်ထံကီၢ်ဒီဘ့ၣ်အပူၤတဖၣ် လၢအဖိးသဲစးတအိၣ်၀ဲနီတခါဘၣ်ဒီး မၤ၀ဲဒၣ်လၢတၢ်နၢ်ပၢၢ်အဖီခိၣ်လီၤႉ တကီၢ်ခါခဲအံၤစ့ၢ်ကီး ကၠီးခဲး ကၣ်စံၣ်နိၣ်လီၢ်ဖးဒိၣ်တဖၣ်အံၤ အပူၤကွံာ်လါတဖၣ်န့ၣ် ထုးကွံာ်၀ဲခဲလၢာ်လံဒီးႇ အိၣ်တ့ၢ်က့ၤ ထဲတၢ်ဂဲၤလိာ်ကွဲ(game)ကျးဆံးဆံးဖိတဖၣ်လီၤဒီး တၢ်ဂ့ၢ်အံၤစ့ၢ်ကီးန့ၣ် ၦၤဘၣ်မူဘၣ်ဒါလၢအဘၣ်ထွဲတဖၣ် ဟဲကွၢ်၀ဲဒၣ်လၢအနီၢ်ကစၢ်ဒီး ဒိ၀ဲဒၣ်တၢ်ဂီၤတဖၣ်လီၤအဂ့ၢ်န့ၣ် သုးခိၣ်ကျၢၢ်စိစီၤစတံ ဆဲးစံး၀ဲန့ၣ်လီၤႉ

ဒ်န့ၣ်အသိး ဖဲမၠၣ်၀တံၣ်၀့ၢ်ႇ နီၣ်ဂံၢ်(၃)က၀ီၤဒ့ႇသ့ၣ်ၦၢ်ဟီၣ်ခိၣ်အ့ရံၣ်ယၣ်တဖၣ်အပူၤန့ၣ် သုးခိးကီၢ်ဆၢ သုးလီၢ်က၀ီၤနီၣ်ဂံၢ်(၄) သုးခိၣ် ခၠ့လိၤအံၤ အိးထီၣ်၀ဲဒၣ်(သစ္စာမဂ္ဂင်)တၢ်လိာ်ကွဲအလီၢ်အဂ့ၢ်ႇ သုးခိးကီၢ်ဆၢ သုးလီၢ်နီၣ်ဂံၢ်(၄) သုးစကီၤ မီၤငဲၤအံၤ အိးထီၣ်၀ဲဒၣ် LUCKY 888 ကၣ်စံၣ်နိၣ်အဂ့ၢ်ဒီး သုးခိးကီၢ်ဆၢ သုးလီၢ်က၀ီၤနီၣ်ဂံၢ် (၂) သုးခိၣ် စီၣ်ထိအံၤ အိးထီၣ်၀ဲဒၣ် UK ကၣ်စံၣ်နိၣ်တဖၣ်အံၤ တၢ်ဟ့ၣ်အခွဲးတအိၣ်ဘၣ်သူၣ်ထီၣ်၀ဲဒၣ်အဂ့ၢ်န့ၣ် ထံလီၢ်ကီၢ်ပူၤကိတိာ်အံၤ ဖဲလါအီးကထိဘၢၣ် ၂၀ သီအနံၤန့ၣ် ထီဒါဒုးသ့ၣ်ညါ၀ဲန့ၣ်လီၤႉ

တၢ်မၤ၀ဲဒၣ်ဒ်အံၤအဖီခိၣ်န့ၣ် သုးခိးကီၢ်ဆၢအံၤ တၢ်ဂဲၤလိာ်ကွဲ((game)လီၢ်ဒီး ကၣ်စံၣ်နိၣ်လီၢ်တဖၣ်အံၤ ဖဲတလါအံၤလါလၢာ်န့ၣ် တၢ်ကထုးကွံာ်၀ဲလၢအ၀ံၤဒီး ၦၤလၢအဟံးထီၣ်ဖီၣ်ထီၣ်တၢ်မၤလၢ အတဖိးသဲစးတဖၣ်အံၤ ဒ်တၢ်သိၣ်တၢ်သီအိၣ်အသိး တၢ်ဟံးအရ့ကန့ၢ်အဂီၢ်ကဟ့ၣ်လီၤ၀ဲဆူ ကီၢ်ပယီၤ ပၢၤကီၢ်သုးလၢအဘၣ်ထွဲတဖၣ်အအိၣ်အဂီၢ်စ့ၢ်ကီး ထီဒါဒုးသ့ၣ်ညါဃာ်၀ဲန့ၣ်လီၤႉ

ဒ်န့ၣ်အသိး မၠၣ်၀တံၣ်ကီၢ်ဆၣ်အပူၤ ကၣ်စံၣ်နိၣ်(Casino)တၢ်တၤကျိၣ်တၤစ့အလီၢ်(၂၇)ဖျၢၣ်ဒီး တၢ်ဂဲၤလိာ်ကွဲ(game)အကျး ၂၇ ဖျၢၣ် လၢတၢ်အိးထီၣ်၀ဲဒၣ်လၢအတဖိးသဲစးတဖၣ်အံၤ ဖဲအပူၤကွံာ် လါမ့ၤ ၂၆ သီအနံၤန့ၣ် ဒ်ကီၢ်စဲၣ်ပဒိၣ် အတၢ်နဲၣ်လီၤအသိး မၠၣ်၀တံၣ်ကီၢ်ရ့ၣ် ပၢၤကီၢ်သုးကရူၢ်တီခိၣ်ရိၣ်မဲ၀ဲ တၢ်တြီဆၢပၢၤဃာ်ကရူၢ်အံၤ ကမၤ၀ဲဒၣ်တၢ်သမံသမိးဒီးကဟံးအရ့တဖၣ်လီၤန့ၣ် တၢ်ကစီၣ်ဟူထီၣ်သါလီၤ၀ဲဒၣ်န့ၣ်လီၤႉ

မၠၣ်၀တံၣ်ကီၢ်ဆၣ်အပူၤ သူမှဲကျိကၢၢ်ခိၣ်န့ၣ် တၢ်အိးထီၣ်ဃာ် ကၣ်စံၣ်နိၣ်တၢ်တၤကျိၣ်တၤစ့လီၢ်လၢအဘျးစဲ ဖီၣ်စုက၀ဲၤတၢ်ကရၢကရိတဖၣ်အိၣ်၀ဲအါအါဂီၢ်ဂီၢ်ဒီး တကီၢ်ခါ ရွ့ၣ်ကိၣ်ကိၤ၀့ၢ်သီတၢ်တိာ်ကျဲၤအလီၢ်လၢအမံၤဟူထီၣ်၀ဲဒၣ်အံၤစ့ၢ်ကီး တၢ်တၤကျိၣ်တၤစ့အလီၢ်တဖၣ်ဒီး (online game)တဖၣ်အိၣ်၀ဲအါမးလီၤအဂ့ၢ်န့ၣ် မၠၣ်၀တံၣ်လီၢ်က၀ီၤဖိတဖၣ် စံး၀ဲန့ၣ်လီၤႉ