Home တၢ်ကစီၣ် ဖၣ်အၣ်ပူၤ ၦၤသူၣ်က့သးၦၢ်လၢအသးနံၣ်အိၣ် ၆၀ ဆူဖီခိၣ်တဖၣ် စးထီၣ်ဟ့ၣ်ဆိတၢ်ဖး

ဖၣ်အၣ်ပူၤ ၦၤသူၣ်က့သးၦၢ်လၢအသးနံၣ်အိၣ် ၆၀ ဆူဖီခိၣ်တဖၣ် စးထီၣ်ဟ့ၣ်ဆိတၢ်ဖး

127
0

လါအီးကထိဘၢၣ် ၃၀ သီႇ ၂၀၂၀ နံၣ်ႇ စီၤရှါ

ၦၤသူၣ်က့သးၦၢ်လၢအသးနံၣ်အိၣ် ၆၀ ဆူဖီခိၣ်လၢအအိၣ်ဖၣ်အၣ်ပူၤတဖၣ် ၂၀၂၀ ပၣ်တံၣ်ဖှိၣ်ဒံၣ်မိၣ်ခြ့ၣ်စံၣ်တၢ်ဃုထၢအဂီၢ် ဖဲလါအီးကထိဘၢၣ် ၂၉ သီအနံၤန့ၣ် က၀ီၤဒ့တၢ်ဖးလီၢ်လၢအဘၣ်ထွဲတဖၣ်စုာ်စုာ် တၢ်စးထီၣ်ဟ့ၣ်ဆိ၀ဲတၢ်ဖးလံန့ၣ်လီၤႉ

စးထီၣ် ဖဲလါအီးကထိဘၢၣ် ၂၉ သီ တုၤလၢ လါနိၣ်၀့ဘၢၣ် ၅ သီအနံၤတစု ထံကီၢ်ဒီဘ့ၣ် သူၣ်က့သးၦၢ်တဖၣ်ႇ ၦၤမိၢ်ဒၢတဖၣ်ႇ ၦၤက့ၦၤကွဲၣ်တဖၣ် ဘၣ်ထွဲဒီးတၢ်ရဲၣ်တၢ်ကျဲၤလၢတၢ်ကဟ့ၣ်ဆိတၢ်ဖးအံၤ ဖၣ်အၣ်၀့ၢ်ႇ နီၣ်ဂံၢ်(၆)က၀ီၤဒ့ႇ တၢ်ဃုထၢခီၣ်မံရှၢၣ် ၦၤပၢၤလီၢ်ဆ့ၣ်နီၤ အူကၠံၤလ့ စံး၀ဲဒ်အံၤန့ၣ်လီၤႉ

“ခီဖျိလၢတၢ်ဆါတၢ်အိၣ်သးအဃိ လၢသးၦၢ်အဂီၢ်က့ၤမၤလီၤဆီ၀ဲ ၈ သီန့ၣ်လီၤႉ တၢ်ကတံာ်ကတူာ်တအိၣ် လဲၤဟ့ၣ်ဘၣ်ဘျ့ဘျ့ဆှီဆှီဒီး လၢပကစၢ်က၀ီၤဒ့၀ဲၤဒၢးဒၣ်၀ဲဟဲထၢနုာ်ကန့ၢ်အဂီၢ် တၢ်မၤဃာ်၀ဲဒၣ်အဃိ ဖံဖုလၢကဘၣ်ဟ့ၣ်တၢ်ဖးတဖၣ် ဟဲထၢနုာ်တၢ်ဖးမ့ၢ်ကဲဒု ဂ့ၤ၀ဲဒိၣ်မးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ဒ်အပူၤကွံာ် ၂၀၁၀ ဒီး ၂၀၁၅ တၢ်ဃုထၢအတၢ်လဲၤခီဖျိအသိး ၦၤလၢအသးၦၢ်တဖၣ်ႇ ၦၤက့ၦၤကွဲၣ်တဖၣ်ႇ ၦၤမိၢ်ဒၢတဖၣ်အဂီၢ် မုၢ်နံၤမုၢ်သီလၢတၢ်ဟ့ၣ်ဆိတၢ်ဖးဒ်အံၤတအိၣ်၀ဲဘၣ်အဂ့ၢ်န့ၣ် အူကၠံၤလ့ ဆဲးစံး၀ဲန့ၣ်လီၤႉ

နီၣ်ဂံၢ်(၆)က၀ီၤဒ့ရူပူၤ ၦၤလၢအဟဲထၢနုာ်တၢ်ဖး နါခ့ၤမၠၣ် ၇၃ နံၣ် စံး၀ဲ “အပူၤကွံာ် ၂ ဘျီဃုာ်ဒီးခဲအံၤတဘျီ ၃ ဘျီလၢာ် ဟဲဟ့ၣ်တၢ်ဖးလီၤႉ ထံဖိကီၢ်ဖိကမျၢၢ်တဖၣ်အဂီၢ် ဒ်သိးကဂုၤထီၣ်ပသီထီၣ်အဂီၢ် မုၢ်လၢ်ဒီးဟဲထၢနုာ်တၢ်ဖးလီၤ” အဂ့ၢ်န့ၣ် စံး၀ဲန့ၣ်လီၤႉ

ၦၤလၢအဟဲထၢနုာ်တၢ်ဖး စီၤမၠၣ်စိ ၇၄ နံၣ်အံၤစ့ၢ်ကီး စံး၀ဲလၢ “ဟဲထၢနုာ်တၢ်ဖးကိးဘျီဒဲးလီၤႉ ဘျီၣ်ဒိၣ်ခၢၣ်စးတဂၤအံၤ ကသ့ၣ်ညါ၀ဲအမူအဒါဒီး လၢကမျၢၢ်အဂီၢ် ဒ်သိးကဂုာ်ကျဲးစၢးဖံးမၤတၢ်ကန့ၢ်အဂီၢ် မုၢ်လၢ်ဒီး ဟဲထၢနုာ်တၢ်ဖးလီၤႉ အပူၤကွံာ်ခၢၣ်စးတဖၣ်န့ၣ် တန့ၢ်ဂံၢ်န့ၢ်ဘါဘၣ်ႉ တၢ်ဂုာ်ကျဲးစၢးစှၤ၀ဲလီၤႉ ခဲအံၤတဘျီန့ၣ် ဆၢလၢကဂုာ်ကျဲးစၢးအါထီၣ်လီၤ” အဂ့ၢ်န့ၣ် စံး၀ဲန့ၣ်လီၤႉ

ဖဲလါနိၣ်၀့ဘၢၣ် ၆ သီ ဒီး ၇ သီန့ၣ် တၢ်ဖးလီၢ်ၦၤမၤတၢ်ဖိတဖၣ်ႇ တၢ်ဘံၣ်တၢ်ဘၢၦၤမၤတၢ်ဖိတဖၣ်ႇ ကဘၣ်ဟ့ၣ်၀ဲတၢ်ဖးအသိး ဖဲလါနိၣ်၀့ဘၢၣ် ၈ သီ မုၢ်နံၤလၢတၢ်ကမၤ၀ဲဒၣ်တၢ်ဃုထၢအံၤ ၦၤလၢအလဲၤလၢထံဂုၤကီၢ်ဂၤတဖၣ်စ့ၢ်ကီး ကဘၣ်ထၢနုာ်ဆိတၢ်ဖးန့ၣ်လီၤႉ