Home တၢ်ကစီၣ် လၢၢ်ဒိၣ်ပူၤ KPP ၦၤနီၣ်ဂံၢ်လၢအကထိ မၤ၀ဲဒၣ်တၢ်လီၤကရၢကရိတၢ်ဖး

လၢၢ်ဒိၣ်ပူၤ KPP ၦၤနီၣ်ဂံၢ်လၢအကထိ မၤ၀ဲဒၣ်တၢ်လီၤကရၢကရိတၢ်ဖး

704
0
လါအီးကထိဘၢၣ် ၇ သီႇ ၂၀၂၀ နံၣ်ႇ စီၤထိလ့

ပကိကီၢ်ခီဒိၣ်ႇလၢၢ်ဒိၣ်ကီၢ်ဆၣ်ပူၤ ဖဲမဟါ(လါအီးကထိဘၢၣ် ၆ သီ)အနံၤ ကညီကမျၢၢ်ပၣ်တံၣ် မၤ၀ဲဒၣ်တၢ်လီၤကရၢကရိတၢ်ဖးတၢ်ဟူးတၢ်ဂဲၤလၢ ၦၤနီၣ်ဂံၢ်လၢအပၣ်ဃုာ်၀ဲလၢအကထိအဂ့ၢ်န့ၣ် ကညီကမျၢၢ်ပၣ်တံၣ် -KPP လၢၢ်ဒိၣ်ကီၢ်ဆၣ်ႇ ကမျၢၢ်ဘျီၣ်ဒိၣ်ခၢၣ်စး စီၤသ့အါကျိၣ် စံးဘၣ်ခ့ၣ်အဲးစံၣ်န့ၣ်လီၤႉ

တၢ်ဟးကရၢကရိတၢ်ဖးတၢ်ဟူးတၢ်ဂဲၤအံၤ လၢၢ်ဒိၣ်ကီၢ်ဆၣ် ကညီကမျၢၢ်ပၣ်တံၣ် တီခိၣ်ရိၣ်မဲ၀ဲဒၣ်ဒီး ကီၢ်ခီဒိၣ် တၢ်ဖးဟီၣ်က၀ီၤ နီၣ်ဂံၢ်(၁)တကပၤန့ၣ် လၢၢ်ဒိၣ်=မိ ကျဲမုၢ်ဒီတကျိၤဒီး ကီၢ်ခီဒိၣ် တၢ်ဖးဟီၣ်က၀ီၤ နီၣ်ဂံၢ်(၂)တကပၤန့ၣ် လၢၢ်ဒိၣ်–နၤသါကွ့ ကျဲဒီတကျိၤ ဖဲဂီၤခီ ၇ နၣ်ရံၣ်တခီအဆၢကတီၢ် တၢ်စးထီၣ်ဟးကရၢကရိတၢ်ဖးဒီး ဖဲမုၢ်ဟါလီၤ ၂ နၣ်ရံၣ်အဆၢကတီၢ် ကရူၢ်ခံဒူၣ်က့ၤထံၣ်လိာ်သးဖဲလၢၢ်ဒိၣ်၀့ၢ်ပူၤ၀ံၤအလီၢ်ခံ ထုးကွံာ်၀ဲဒၣ်တၢ်ဟူးတၢ်ဂဲၤတၢ်ရဲၣ်တၢ်ကျဲၤအံၤန့ၣ်လီၤႉ

“တၢ်ဟူးတၢ်ဂဲၤလၢတနံၤအံၤ သိလ့ၣ်ယီၢ်တဖၣ်ဒီးသိလ့ၣ်တဖၣ် တယးကွၢ်ၦၤနီၣ်ဂံၢ်ခဲလၢာ်ဟဲ၀ဲ ၃ႇ၀၀၀ ဃၣ်ဃၣ်ညါလီၤႉ ကျဲဒီတဘိ သ၀ီဖိတဖၣ်ဟ့ၣ်ဂံၢ်ဟ့ၣ်ဘါၦၤဒီး ပကွၢ်န့ၣ်တၢ်အိၣ်သးကဂ့ၤ၀ဲလီၤန့ၣ် ပနာ်၀ဲဒၣ်လီၤ” အဂ့ၢ်န့ၣ် ကမျၢၢ်ဘျီၣ်ဒိၣ်ခၢၣ်စး စီၤသ့အါကျိၣ် စံး၀ဲန့ၣ်လီၤႉ

လၢတၢ်ဟးကရၢကရိတၢ်ဟ့ၣ်တၢ်ဖးအဂီၢ် တီၣ်ထီၣ်ဆိ၀ဲဒၣ်အခွဲးသၢသီလၢတၢ်ဃုထၢခီၣ်မံရှၢၣ်အအိၣ်ဒီး ပဘၣ်ပာ်ပနီၣ်ဃာ်ၦၤနီၣ်ဂံၢ်အဂီၢ် ရဲၣ်ကျဲၤဆိပာ်၀ဲဘၣ်ဆၣ် တၢ်အိၣ်သးအိၣ်၀ဲလၢ ၦၤဟဲဟ့ၣ်ဂံၢ်ဟ့ၣ်ဘါဆီၣ်ထွဲတၢ်တဖၣ်အါ၀ဲအဂ့ၢ်န့ၣ် KPP ခၢၣ်စးတဖၣ် စံး၀ဲန့ၣ်လီၤႉ

ပကိကီၢ်ခီဒိၣ်ႇ လၢၢ်ဒိၣ်ကီၢ်ဆၣ်ပူၤ ကညီကမျၢၢ်ပၣ်တံၣ်အံၤ ကမျၢၢ်ဘျီၣ်ဒိၣ်တၢ်ဖးဟီၣ်က၀ီၤပူၤ စီၤသ့အါကျိၣ်ႇ ကီၢ်ခီဒိၣ် နီၣ်ဂံၢ်–၁ စဲမ့အီၤႇ ကီၢ်ခီဒိၣ် နီၣ်ဂံၢ်–၂ စီၤနိၤဘၢၤ ဒီး ကညီကလုာ်ဒူၣ်ကလုာ်ဂ့ၢ်၀ီအလီၢ်န့ၣ် စီၤသ့၀့ၤတဖၣ် ကနုာ်လီၤဒိးတပြၢသးစုာ်စုာ်န့ၣ်လီၤႉ

“လၢလၢၢ်ဒိၣ်န့ၣ် တၢ်လီၢ်လၢၦၤပၢဆှၢကျဲၣ်ကျီဃုာ်တၢ်အိၣ်၀ဲလီၤႉ ပ၀ဲဒၣ် လၢပကစၢ်ကလုာ်ဒူၣ်အဂီၢ် အိၣ်ဆၢထၢၣ်၀ဲဒၣ်အံၤန့ၣ် ၦၤအါဂၤဟဲသ့ၣ်ညါထီၣ်၀ဲလံလီၤ” အဂ့ၢ်န့ၣ် ကီၢ်ခီဒိၣ် နီၣ်ဂံၢ်–၂ ခၢၣ်စး စီၤနိၤဘၢၤ စံး၀ဲန့ၣ်လီၤႉ

လၢၢ်ဒိၣ်ကီၢ်ဆၣ်ႇ တၢ်လီၢ်လၢပဒိၣ်ပၢပြးတၢ်အလီၢ်န့ၣ် ၦၤနီၣ်ဂံၢ်ပာ်ဖှိၣ်ခဲလၢာ် ၁၂၀ႇ၀၀၀ ဘျဲၣ် အိၣ်၀ဲအကျါ ပယီၤကလုာ်အိၣ်၀ဲဒၣ် ၆၈ႇ၆၂၁ ဂၤ ၅၅ မျးကယၤ ဒီး ကညီကလုာ်ပာ်ဖှိၣ်ခဲလၢာ်အိၣ်၀ဲ ၅၂ႇ၂၈၂ ဂၤ ၄၂ မျးကယၤဒီး ယိၤဒိၣ်ကလုာ် ၂ႇ၀၆၉ ဂၤ အိၣ်ဆိး၀ဲအဂ့ၢ်န့ၣ် သ့ၣ်ညါဘၣ်လၢ ကီၢ်ဆၣ်ပၢပြး၀ဲၤကျိၤ ၂၀၁၉ နံၣ် စရီတဖၣ်အပူၤန့ၣ်လီၤႉ

လၢၢ်ဒိၣ်ကီၢ်ဆၣ်ပူၤ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢႇ သုးက့(၃)တၢ်ပၢဟီၣ်က၀ီၤတဖၣ်ဒီး တၢ်လီၢ်လၢၦၤပၢကျဲၣ်ကျီ၀ဲခံခီခံကပၤစ့ၢ်ကီးအိၣ်၀ဲန့ၣ်လီၤႉ လၢခ့ၣ်အဲၣ်ယူၣ် တၢ်ပၢဟီၣ်က၀ီၤတဖၣ်အပူၤ တၢ်အိးထီၣ်၀ဲတၢ်ဖးလီၢ်အဂီၢ် တၢ်အိၣ်သးတအိၣ်၀ဲဒံးဘၣ်လီၤအဂ့ၢ်န့ၣ် သ့ၣ်ညါဘၣ်လၢခၢၣ်စးတဖၣ်အအိၣ်န့ၣ်လီၤႉ