လါအီးကထိဘၢၣ် ၂၆ သီႇ ၂၀၂၀ နံၣ်ႇ စီၤရှါ
လၢကဟဲ လါနိၣ်၀့ဘၢၣ် ၈ သီ တၢ်ကမၤ၀ဲ ၂၀၂၀ တၢ်ဃုထၢဖးဒိၣ် တၢ်ဟးကရၢကရိတၢ်ဖးအတီၢ်ပူၤ လၢကညီကီၢ်စဲၣ်အပူၤ ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ် -KNDP ဒီး ကလုာ်ဒံၣ်မိၣ်ခြ့ၣ်စံၣ်ကရၢစိ = NLD ပၣ်တံၣ်တဖၣ် တၢ်ဟးကရၢကရိတၢ်အဂံၢ်အဘါဂ့ၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကညီကီၢ်စဲၣ်အပူၤ တၢ်ဃုထၢခဲအံၤအဂီၢ် ပၣ်တံၣ် ၁၄ ပၣ်တံၣ် ဒီး ခၢၣ်စးလၢ ကနုာ်ဒိးဃုထၢသးလၢနီၢ်တဂၤတဖၣ် ကနုာ်လီၤဒိးတပြၢသးန့ၣ်လီၤႉ လၢတကီၢ်ခါဆၢကတီၢ်ခဲအံၤ KNDP ဒီး NLD ပၣ်တံၣ်တဖၣ်န့ၣ် တၢ်ဟးကရၢကရိတၢ်အဂံၢ်အဘါဖျါအါန့ၢ်ဒံး ထံရူၢ်ကီၢ်သဲးပၣ်တံၣ်လၢအဂၤတဖၣ်လီၤအဂ့ၢ်န့ၣ် ၦၤဟ့ၣ်တၢ်ဖးဖိကမျၢၢ်တဖၣ် စံး၀ဲဒၣ်န့ၣ်လီၤႉ
တၢ်ဂ့ၢ်အံၤအဖီခိၣ် ခိၤအီၤမၠ့ၣ်မၠၣ် လၢအမ့ၢ်တ့ၢ် ကညီကီၢ်စဲၣ်ႇ ပအိၣ်ကလုာ်ဒူၣ်ဂ့ၢ်၀ီ ဘျီၣ်ဒိၣ်ပတြီာ်ခၢၣ်စးတဂၤစံး၀ဲလၢ “ကညီကီၢ်စဲၣ်အပူၤန့ၣ် NLD စ့ၢ်ကီးအဂံၢ်အဘါဂ့ၤ၀ဲလီၤႉ ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ်စ့ၢ်ကီး အဂံၢ်အဘါဂ့ၤ၀ဲလီၤႉ ယထံၣ်ထဲတၢ် ၂ ခါအံၤလီၤႉ ပၣ်တံၣ်လၢအအိၣ်တ့ၢ်သ့ၣ်တဖၣ်ဒု ယတန့ၢ်ဂံၢ်န့ၢ်ဘါထဲန့ၣ်ဘၣ်” အဂ့ၢ်န့ၣ် စံး၀ဲ ဖဲလါအီးကထိဘၢၣ် ၂၃ သီအနံၤန့ၣ်လီၤႉ
ကညီကီၢ်စဲၣ်ပၣ်တံၣ်တဖၣ်ပာ်ဖှိၣ်ထီၣ်သးဒီး KNDP ဟဲအိၣ်ထီၣ်၀ဲအဃိဒီး ထူလံၤကလုာ်ဒူၣ်တဖၣ်အံၤ ဒ်သိးကဒိးန့ၢ်ဘၣ်တၢ်ခွဲးတၢ်ယာ်လၢအဆှူကွံာ်၀ဲတဖၣ်အဂီၢ် လၢတၢ်သူၣ်ဆူၣ်သးဂဲၤတၢ်မုၢ်လၢ်ကွၢ်စိတဖၣ်အဃိ လီၢ်က၀ီၤတဖၣ်ဟ့ၣ်ဂံၢ်ဟ့ၣ်ဘါဆီၣ်ထွဲဒိၣ်၀ဲလၢ KNDP ပၣ်တံၣ်လီၤအဂ့ၢ်န့ၣ် KNDP ဖၣ်အၣ်ကီၢ်ဆၣ် ဒီကလုာ်ဘျီၣ်ဒိၣ်ပတြီာ်ခၢၣ်စး နါလၣ်ယ့ၤမ့ၤ စံး၀ဲန့ၣ်လီၤႉ
“မ့ၢ်ဘၣ်ကွၢ်လၢ သးစၢ်အတၢ်ဟ့ၣ်ဂံၢ်ဟ့ၣ်ဘါဆီၣ်ထွဲအံၤန့ၣ် KNDP န့ၣ် အဂံၢ်အဘါဂ့ၤဒိၣ်၀ဲလီၤႉ မၠၣ်၀တံၣ်ႇ ကၠၤအ့စ့ၣ်ကၠံႇ လဲဘွဲတဖၣ်န့ၣ် ၦၤဟ့ၣ်ဂံၢ်ဟ့ၣ်ဘါဆီၣ်ထွဲအနီၣ်ဂံၢ်အိၣ်၀ဲဒၣ်လၢ အကထိအကလးညါလီၤႉ ဖၣ်အၣ်စ့ၢ်ကီး လၢအတၢ်လီၢ်တၢ်ကျဲဒၣ်၀ဲန့ၣ် ဟးဟ့ၣ်ဂံၢ်ဟ့ၣ်ဘါဆီၣ်ထွဲ၀ဲဒၣ်လီၤ ” အဂ့ၢ်န့ၣ် နါလၣ်ယ့ၤမ့ၤ စံးဘၣ်ခ့ၣ်အဲးစံၣ်န့ၣ်လီၤႉ
တၢ်တပြၢလိာ်သးတၢ်ပညိၣ်လၢအဂ့ၤတကပၤန့ၣ် ကီၢ်စဲၣ်အဂီၢ် တၢ်အစၢလၢအလုၢ်အၦ့ၤအိၣ်ကဟဲဖျါထီၣ်၀ဲအဃိ NLD ဒီး ကလုာ်ဒူၣ်ပၣ်တံၣ်တဖၣ် အတၢ်ဟးကရၢကရိအဂံၢ်အဘါဂ့ၤ၀ဲအဖီခိၣ်အံၤ သူၣ်မံသးမံ၀ဲဒၣ်လီၤအဂ့ၢ်န့ၣ် NLD ကၠၤအ့စ့ၢ်ကၠံကီၢ်ဆၣ်ႇ ဒီကလုာ်ဘျီၣ်ဒိၣ်ပတြီာ်ခၢၣ်စး စီၤရှါဖီၤအွၤ စံး၀ဲန့ၣ်လီၤႉ
“ထံဖိကီၢ်ဖိကမျၢၢ်တဖၣ် တၢ်ဆီတလဲတဖၣ်အံၤ ဒိးန့ၢ််ဘၣ်၀ဲတနီၤလံလီၤႉ ဒံၣ်မိၣ်ခြ့ၣ်စံၣ်အကဒုကယီၢ်စ့ၢ်ကီး တူၢ်ဘၣ်ထီၣ်၀ဲဒၣ်ဒီး တၢ်ပျံၤတၢ်ဖုးစ့ၢ််ကီးပူၤဖျဲးထီၣ်၀ဲလီၤႉ ဒ်သိးဒံၣ်မိၣ်ခြ့ၣ်စံၣ်ကဂ့ၤဒိၣ်ထီၣ်အဂီၢ် ၦၤလၢတူၢ်လိာ်ဟ့ၣ်ဂံၢ်ဟ့ၣ်ဘါဆီၣ်ထွဲ၀ဲ NLD တဖၣ်အါထီၣ်၀ဲဒၣ်လီၤန့ၣ် ယအဲၣ်ဒိးတဲယဲလီၤ” အဂ့ၢ်န့ၣ် စံး၀ဲန့ၣ်လီၤႉ
တၢ်ဟးကရၢကရိတၢ်ဖးအဆၢကတီၢ် စးထီၣ် ဖဲလါစဲးပထ့ဘၢၣ် တုၤလၢ လါအီးကထိဘၢၣ် ၂၃ သီအနံၤတစု ကညီကီၢ်စဲၣ်အပူၤ ၦၤလၢအတူၢ်လိာ်၀ဲဒၣ် KNDP ဒီး NLD ပၣ်တံၣ်တဖၣ်န့ၣ် လၢကီၢ်ဆၣ်ဒၣ်၀ဲန့ၣ် ဟးကရၢကရိဟးဆှၣ်တၢ်ဒီး သိလ့ၣ်ႇ သိလ့ၣ်ယီၢ်တဖၣ်ႇ တၢ်ဟးကရၢကရိစံၣ်တဲၤတဲလီၤတၢ်တဖၣ်န့ၣ်လီၤႉ
