Home တၢ်ကစီၣ် ကၠၤအ့စ့ၣ်ကၠံကီၢ်ဆၣ် တၢ်ဖးလီၢ်တတီၤအပူၤ ၦၤအခွဲးလၢဟ့ၣ်တၢ်ဖးအိၣ် ၅၀၀ ဘျဲၣ်ဘၣ်ဆၣ် ၦၤဟဲထၢနုာ်တၢ်ဖးတအိၣ်၀ဲနီတဂၤဘၣ်

ကၠၤအ့စ့ၣ်ကၠံကီၢ်ဆၣ် တၢ်ဖးလီၢ်တတီၤအပူၤ ၦၤအခွဲးလၢဟ့ၣ်တၢ်ဖးအိၣ် ၅၀၀ ဘျဲၣ်ဘၣ်ဆၣ် ၦၤဟဲထၢနုာ်တၢ်ဖးတအိၣ်၀ဲနီတဂၤဘၣ်

130
0

လါနိၣ်၀့ဘၢၣ် ၁၂ သီႇ ၂၀၂၀ နံၣ်ႇ စီၤမၠၣ်အူသၣ်

ကညီကီၢ်စဲၣ်ႇ ကၠၤအ့စ့ၣ်ကၠံကီၢ်ဆၣ် တၢ်ဖးဟီၣ်က၀ီၤနီၣ်ဂံၢ်(၁)အံၤ တီၣ်ကလ့ဒူသ၀ီကရူၢ်အပူၤ ၦၤထၢနုာ်တၢ်ဖးအိၣ်၀ဲဒၣ်စှၤဂၤလီၤဒီး မ့မ့ၢ်လၢတီၣ်ကလ့တၢ်ဖးလီၢ် ၃ န့ၣ် ၦၤဟဲထၢနုာ်တၢ်ဖးတအိၣ်၀ဲဒၣ်နီတဂၤဘၣ်အဂ့ၢ်န့ၣ် သ့ၣ်ညါဘၣ်လၢတၢ်ဖးလီၢ် ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ

တီၤကလ့ၤကရူၢ်လၢအဘူးလိာ်သးဒီး ကၠဲၤဒိႇ ကၠီၣ်ထၣ်တၢ်လီၢ်အံၤ အါဒၣ်တက့ၢ်န့ၣ် ကညီကလုာ်ဒူၣ်တဖၣ်အိၣ်ဆိး၀ဲဒၣ်ဒီး ကွံၤလိတဲၤႇ သပၠူၣ်ႇ ထံတဘျုၣ်ခံႇ လီၤပးခံႇ ဒူပီၤႇ တီၣ်ကလ့ႇ ယွၤကတီၤႇ မီၤတလွၤႇ ကယၣ်ကၠၣ်သဲသ၀ီ သ၀ီပာ်ဖှိၣ်ခဲလၢာ်အိၣ်၀ဲ အဖျၢၣ် ၂၀ ဃၣ်ဃၣ်ဒီး ၦၤခွဲးအိၣ်လၢဟ့ၣ်တၢ်ဖးအိၣ်၀ဲအဂၤ ၁ႇ၀၀၀ ဘျဲၣ်န့ၣ်လီၤႉ ဒူသ၀ီတဖၣ်အါဒၣ်တက့ၢ်န့ၣ် အိၣ်ယံၤ၀ဲဒၣ်ဒီးတၢ်လီၢ်လၢတၢ်ဖးလီၢ်အိၣ်ဆီလီၤသးအမဲာ်ညါ ခီဖျိကျဲတၢ်လဲၤတၢ်က့ၤကီခဲအိၣ်၀ဲအဃိ အါဒၣ်တက့ၢ်န့ၣ်တဟဲထၢနုာ်၀ဲတၢ်ဖးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ

တီၣ်ကလ့ကရူၢ် တၢ်ဖးလီၢ်မူဒါခိၣ် စီၤလ့ထူ စံး၀ဲလၢ “ပ၀ဲတၢ်ဖးလီၢ် ၃ အံၤ ၦၤခွဲးအိၣ်လၢဟ့ၣ်တၢ်ဖးအိၣ်၀ဲ ၅၂၅ ဂၤလီၤႉ ဖဲလါနိၣ်၀့ဘၢၣ် ၄ သီအနံၤန့ၣ် ၦၤဟ့ၣ်ဆိတၢ်ဖးအိၣ်ထဲ ၁ ဂၤလီၤႉ တၢ်ဖးအ၀ဲန့ၣ်စ့ၢ်ကီး မ့ၢ်၀ဲဒၣ်ၦၤလၢအလီၤဘၣ်မူဒါဖဲတၢ်ဖးလီၢ်အံၤတဂၤ ထၢနုာ်၀ဲဒၣ်လီၤႉ သ၀ီဖိတဖၣ် ဟဲထၢနုာ် တၢ်ဖးတအိၣ်နီတဂၤဘၣ်ႉ ယံၤ၀ဲဒၣ်ဒီးအ၀ဲသ့ၣ်သ၀ီန့ၣ်ပၣ်၀ဲလီၤႉ ကျဲတၢ်လဲၤတၢ်က့ၤတဂ့ၤဘၣ်စ့ၢ်ကီးပၣ်၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ် ဖဲလါနိၣ်၀့ဘၢၣ် ၁၁ သီအနံၤန့ၣ်လီၤႉ

ဒူသ၀ီဖဲန့ၣ်တဖၣ်န့ၣ် တၢ်ပာ်လီၤ၀ဲဒၣ်တၢ်ဖးလီၢ် ၃ ခါဒီး လၢတၢ်ဖးလီၢ် နီၣ်ဂံၢ် ၁ န့ၣ် ၦၤဟဲထၢနုာ်တၢ်ဖးအိၣ်၀ဲ ၁၀၀ ဘျဲၣ်ႇ တၢ်ဖးလီၢ် နီၣ်ဂံၢ် ၂ န့ၣ် အိၣ်၀ဲ ၂၀ ဘျဲၣ် ဒီး တၢ်ဖးလီၢ်နီၣ်ဂံၢ် ၃ န့ၣ် ၦၤလၢအလီၤ ဘၣ်မူဒါၦၤမၤတၢ်ဖိတဂၤ ထၢနုာ်၀ဲ ၁ ဖျၢၣ်လီၤဒီး ဒူသ၀ီပာ်ဖှိၣ်အဖျၢၣ် ၂၀ ဃၣ်ဃၣ်အံၤ ၦၤခွဲးအိၣ်လၢဟ့ၣ်တၢ်ဖးအိၣ်၀ဲ ၁ႇ၀၀၀ ဘျဲၣ်ဘၣ်ဆၣ် ၦၤဟဲထၢနုာ်တၢ်ဖးအနီၣ်ဂံၢ်အိၣ်ထဲ ၂၀၀ ဘျဲၣ်န့ၣ်လီၤႉ ၦၤထၢနုာ်တၢ်ဖးဖိတဖၣ်အါဒၣ်တက့ၢ်န့ၣ် ထၢနုာ်၀ဲတၢ်ဖးလၢ ကညီကလုာ်ဒံၣ်မိၣ်ကရဲၣ်တ့ၣ်ပၣ်တံၣ် -KNDP˜ ၦၤလၢနုာ်လီၤဒိးဃုထၢသးလၢနီၢ်တဂၤ စီၤရှါ၀ီၤမ့ ဒီး ကီၢ်စၢဖှိၣ်သွံၣ်ဃူဖိးဒီးတၢ်ဂုၤထီၣ်ပသီထီၣ်ပၣ်တံၣ်(USDP) ဘျီၣ်ဒိၣ်ခၢၣ်စးတဖၣ်လီၤအဂ့ၢ်န့ၣ် သ့ၣ်ညါဘၣ်လၢ တၢ်ဖးလီၢ်ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ

တီၣ်ကလ့ဒူသ၀ီကရူၢ်လၢ တၢ်ဒုးအိၣ်ထီၣ်၀ဲလၢဒူသ၀ီပာ်ဖှိၣ်အဖျၢၣ် ၂၀ ဃၣ်ဃၣ်အံၤ ဖဲအပူၤကွံာ် ၂၀၁၀ႇ ၂၀၁၅ နံၣ် တၢ်ဃုထၢဖးဒိၣ်အံၤန့ၣ် တၢ်မၤ၀ဲတၢ်ဃုထၢတအိၣ်၀ဲဒၣ်နီတဘျီဘၣ်ဒီး ဖဲလါနိၣ်၀့ဘၢၣ် ၈ သီ တၢ်မၤ၀ဲတၢ်ဃုထၢအံၤ တၢတဘျီအခွဲးအိၣ်လၢထၢနုာ်တၢ်ဖးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကၠၤအ့ဆ့ၣ်ကၠံကီၢ်ဆၣ်အပူၤ ထံရူၢ်ကီၢ်သဲးပၣ်တံၣ် ၅ ပၣ်အံၤ နုာ်လီၤတပြၢ၀ဲဒၣ်တၢ်ဃုထၢဒီးႇ တၢ်ဖးဟီၣ်က၀ီၤ(၁)ဒီး တၢ်ဖးဟီၣ်က၀ီၤ(၂)ခံတီၤလၢာ်န့ၣ် ကလုာ်ဒံၣ်မိၣ်ခြ့ၣ်စံၣ်ကရၢပၣ်တံၣ်(NLD) ဘျီၣ်ဒိၣ်ပတြီာ်ခၢၣ်စးတဖၣ် တၢ်ဖးအနီၣ်ဂံၢ်အါ၀ဲဒီးမၤနၢၤ၀ဲတၢ်အဂ့ၢ်န့ၣ် သ့ၣ်ညါဘၣ်လၢ ထံရူၢ်ကီၢ်သဲးပၣ်တံၣ် ၦၤဘၣ်မူဘၣ်ဒါအအိၣ်န့ၣ်လီၤႉ