Home တၢ်ကစီၣ် ဒ်သိးတၢ်စုဆူၣ်ခီၣ်တကးကပတုာ်လၢပိာ်မုၣ်အဖီခိၣ်အဂီၢ် ၦၤကိးဂၤဒဲးကဘၣ်ဒိးန့ၢ်ဘၣ်သဲစးတၢ်ဟံးန့ၢ်မူဒါအဂ့ၢ် KWO စံး၀ဲ

ဒ်သိးတၢ်စုဆူၣ်ခီၣ်တကးကပတုာ်လၢပိာ်မုၣ်အဖီခိၣ်အဂီၢ် ၦၤကိးဂၤဒဲးကဘၣ်ဒိးန့ၢ်ဘၣ်သဲစးတၢ်ဟံးန့ၢ်မူဒါအဂ့ၢ် KWO စံး၀ဲ

233
0

လါနိၣ်၀့ဘၢၣ် ၂၆ သီႇ ၂၀၂၀ နံၣ်ႇ စးအဲၣ်ဆူ

ဒ်သိးတၢ်စုဆူၣ်ခီၣ်တကးကပတုာ်လၢပိာ်မုၣ်တဖၣ်အဖီခိၣ်အဂီၢ် ၦၤကိးဂၤဒဲးကဘၣ်ဒိးန့ၢ်ဘၣ်သဲစးတၢ်ဟံးန့ၢ် မူဒါအဂ့ၢ်န့ၣ် လါနိၣ်၀့ဘၢၣ် ၂၅ သီ လၢအလီၤဘၣ်၀ဲ ဟီၣ်ခိၣ်ဒီဘ့ၣ်တၢ်ပတုာ်တၢ်စုဆူၣ်ခီၣ်တကးထီဒါပိာ်မုၣ် မုၢ်နံၤအံၤ ကညီပိာ်မုၣ်ကရၢ -KWO ထုးထီၣ်ပာ်ဖျါစံး၀ဲန့ၣ်လီၤႉ

KWO နဲၣ်ရွဲၣ် နီၢ်ကညီဖီ စံး၀ဲလၢ “လီၤဆီဒၣ်တၢ်န့ၣ် ကမျၢၢ်တဖၣ်မ့ၢ်မၤကမၣ်တၢ်န့ၣ် ဟံးအရ့တၢ်ကီတၢ်ခဲတအိၣ်နီတမံၤဘၣ် ဘၣ်ဆၣ် ခိၣ်နၢ်လၢအအိၣ်ဒီးတၢ်စိတၢ်ကမီၤတဖၣ်မ့ၢ်ဂ့ၤႇ သုးခိၣ်နၢ်တဖၣ်မ့ၢ်ဂ့ၤ မ့ၢ်မၤကမၣ်တၢ်န့ၣ် တၢ်ဟံးအရ့တအိၣ်၀ဲလၢၤဘၣ်ႉ တၢ်ဘျၢသဲစးဒိၣ်စိသနူ တအိၣ်လၢၤဘၣ်ႉ လၢဘၣ်ကီဘၣ်ခဲဒဲက၀ီၤအပူၤမ့ၢ်ဂ့ၤႇ ကညီဒူၣ်ဖိထၢဖိအကျါမ့ၢ်ဂ့ၤ လၢတၢ်ကဟံအရ့ဟံးထီၣ်ဖီၣ်ထီၣ်အ၀ဲသ့ၣ်အဂီၢ် ဘၣ်တဲအ၀ဲသ့ၣ်ကီကီခဲခဲစ့ၢ်ကီးအိၣ်၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

တၢ်သူ၀ဲတၢ်စုဆူၣ်ခီၣ်တကးလၢပိာ်မုၣ်တဖၣ်အဖီခိၣ်အမဲာ်ညါ တၢ်စုဆူၣ်ခီၣ်တကးတခါဂ့ၤတခါဂ့ၤ ဒ်သိးကလီၤမၢ်ကွံာ်အဂီၢ် ခဲလၢာ်ပၣ်ဖှိၣ်သကိးလၢတၢ်သူၣ်ဆူၣ်သးဂဲၤအပူၤအဂ့ၢ်န့ၣ် KWO လံာ်တၢ်ပာ်ဖျါအပူၤ ဆီၣ်တခူဃ့ထီၣ်၀ဲန့ၣ်လီၤႉ

ဒ်န့ၣ်အသိး ဘၣ်ထွဲဟီၣ်ခိၣ်ဒီဘ့ၣ် တၢ်ပတုာ်တၢ်စုဆူၣ်ခီၣ်တကးထီဒါပိာ်မုၣ်မုၢ်နံၤအံၤ ကညီၦၤဂ့ၢ်၀ီခွဲးယာ်ကရူၢ် (KHRG) လံာ်တၢ်ပာ်ဖျါအပူၤစ့ၢ်ကီးပာ်ဖျါ၀ဲလၢ ဖဲပိာ်မုၣ်တဖၣ်ကျဲး စၢးဒ်သိးကဒိးန့ၢ်၀ဲတၢ်တြီတၢ်တြၢ်အခါ အ၀ဲသ့ၣ်ထံၣ်ဘၣ်၀ဲလၢသဲစးသနူတဖၣ် တၢ်မၤကဲလိၣ်ထီၣ်အီၤလၢအတဒံးသိးလိာ်အသးႇ တအိၣ်ဒီးတၢ်သ့ဟံးမူဒါလၢၦဲၤႇ တၢ်ပၣ်ဃုာ်ပၣ်ဂီၢ်တအိၣ်ဒီး မ့ၢ်သနူလၢအဘၣ်တၢ်ဒိၣ်စိအီၤလၢပိာ်ခွါတဖၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ ကီၢ်ပယီၤအပူၤ ၦၤလၢအမၤကမၣ်တၢ််တဖၣ်အံၤ ပူၤဖျဲးထီၣ်၀ဲဒၣ်လၢတၢ်ကမၣ်အပူၤဒီး ခီဖျိလၢလုၢ်လၢ်အဃိ သူ၀ဲတၢ်စုဆူၣ်ခီၣ်တကးလၢပိာ်မုၣ်တဖၣ်အဖီခိၣ်ဟဲအါထီၣ်၀ဲဒၣ်န့ၣ်လီၤႉ သုးမုၢ်ဒိၣ်မၤကမၣ်၀ဲကွီၢ်မ့ၣ်တဖၣ်အဖီခိၣ် တၢ်တဟံးအရ့နီတမံၤဘၣ်အံၤ တၢ်ကဘၣ်မၤကတၢၢ်ကွံာ်၀ဲအမဲာ်ညါႇ တၢ်ကဘၣ်ဟံးအရ့ဟံးထီၣ်ဖီၣ်ထီၣ်အီၤလၢကမျၢၢ်ကွီၢ်ဘျီၣ်တဖၣ်လီၤအဂ့ၢ်န့ၣ် KHRG ဆီၣ်တခူဃ့ထီၣ်၀ဲန့ၣ်လီၤႉ

ဒ်ကိးနံၣ်ဒဲးၦၤဂ့ၢ်၀ီခွဲးယာ်ကရူၢ်တဖၣ် ထုးထီၣ်ပာ်ဖျါ၀ဲလံာ်တၢ်ပာ်ဖျါအသိး ကီၢ်ပယီၤအပူၤ လၢပိာ်မုၣ်ဒီးဖိသၣ်ပိာ်မုၣ်တဖၣ်အဖီခိၣ် တၢ်စုဆူၣ်ခီၣ်တကးတၢ်အိၣ်သးတဖၣ်ကဲထီၣ်သးအိၣ်၀ဲကိးနံၣ်ဒဲးဒီး ဖဲန့ၣ်အကျါ ကီၢ်ဆၢလၢတၢ်ဒုးတၢ်သဘံၣ်သဘုၣ်ကဲထီၣ်အလီၢ်ဒီး ကလုာ်ဒူၣ်ဟီၣ်က၀ီၤတဖၣ်အပူၤ တူၢ်ဘၣ်၀ဲတၢ်သ့ၣ်တဖၣ်အံၤအါတစဲးအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ဟီၣ်ခိၣ်ဒီဘ့ၣ်တၢ်ပတုာ်တၢ်စုဆူၣ်ခီၣ်တကးထီဒါပိာ်မုၣ်မုၢ်နံၤ လၢအလီၤဘၣ်ဖဲ လါနိၣ်၀့ဘၢၣ် ၂၅သီအနံၤအံၤ တၢ်မၤ၀ဲတၢ်ကပတုာ်တၢ်သူတၢ်စုဆူၣ်ခီၣ်တကးလၢပိာ်မုၣ်အဂီၢ် အတၢ်ဟူးတၢ်ဂဲၤလၢဘၣ်တၢ်မၤအီၤယံၤ၀ဲလၢ ၁၆ သီအတီၢ်ပူၤအံၤ KWO တီခိၣ်ရိၣ်မဲ၀ဲဒီးအိးထီၣ်၀ဲတၢ်ရဲၣ်တၢ်ကျဲၤ ဖဲကီၢ်ကၠီၣ်တဲၣ် မဲၢ်ဆီး၀့ၢ်ႇ မဲၢ်တီတၢ်ဆါဟံၣ်န့ၣ်လီၤႉ

ဖဲ ၁၉၉၉ နံၣ်ႇ လါဒံၣ်စ့ဘၢၣ် ၁၇ သီအနံၤန့ၣ် ဒ်တၢ်မၤ၀ဲဘီမုၢ်စၢဖှိၣ်ကရၢတၢ်အိၣ်ဖှိၣ်ဖးဒိၣ်အတၢ်ဆၢတဲာ် နီၣ်ဂံၢ်(၅၄/၁၃၄)အသိး လါနိၣ်၀့ဘၢၣ် ၂၅ သီအနံၤန့ၣ် တၢ်ပာ်ပနီၣ်ဘိးဘၣ်ရၤလီၤ၀ဲလၢအမ့ၢ် ဟီၣ်ခိၣ်ဒီဘ့ၣ် တၢ်ပတုာ်တၢ်စုဆူၣ်ခီၣ်တကးထီဒါပိာ်မုၣ်မုၢ်နံၤန့ၣ်လီၤႉ