Home တၢ်ကစီၣ် အ့ၣ်ယၣ်၀တံၣ်ကညီဂ့ၢ်၀ီအဂီၢ် NLD ဂၣ်မိမၠၣ်မၠၣ်သူၤ မၤနၢၤ၀ဲတၢ်ဖးအအါကတၢၢ်

အ့ၣ်ယၣ်၀တံၣ်ကညီဂ့ၢ်၀ီအဂီၢ် NLD ဂၣ်မိမၠၣ်မၠၣ်သူၤ မၤနၢၤ၀ဲတၢ်ဖးအအါကတၢၢ်

156
0

လါနိၣ်၀့ဘၢၣ် ၁၆ သီႇ ၂၀၂၀ နံၣ်ႇ စးဖါရှီ

အ့ၣ်ယၣ်၀တံၣ်ကီၢ်ခီဒိၣ် ဘျီၣ်ဒိၣ် ကညီကလုာ်ဒူၣ်ကလုာ် တၢ်ဖးဟီၣ်က၀ီၤအဂီၢ် NLD ဂၣ်မိမၠၣ်မၠၣ်သူၤအံၤ မ့ၢ်ကီခီဒိၣ်ဘျီၣ်ဒိၣ်ပတြီာ်ခၢၣ်စးလၢ န့ၢ်၀ဲတၢ်ဖး ၄၆၀ႇ၃၅၉ ဖျၢၣ်ဒီးဒိးန့ၢ်၀ဲတၢ်ဖးလၢတၢ်ပာ်ဂၢၢ်ပာ်ကျၢၤ ၀ဲအအါကတၢၢ်လီၤအဂ့ၢ်န့ၣ် ဖဲလါနိၣ်၀့ဘၢၣ် ၁၃ သီအနံၤ အ့ၣ်ယၣ်၀တံၣ်ကီၢ်ခီဒိၣ် တၢ်ဃုထၢခီၣ်မံရှၢၣ်ကရူၢ်အဒ့အံၤ ထုးထီၣ်ဘိးဘၣ်ရၤလီၤ၀ဲဒၣ်န့ၣ်လီၤႉ

ဂၣ်မိမၠၣ်မၠၣ်သူၤအံၤ ဖဲအပူၤကွံာ် ၂၀၁၅ နံၣ် တၢ်ဃုထၢ၀ံၤန့ၣ် အ၀ဲမ့ၢ်ၦၤတဂၤလၢဟံးတ့ၢ်၀ဲမူဒါလၢ အ့ၣ်ယၣ်၀တံၣ်ကီၢ်ခီဒိၣ် ကညီဂ့ၢ်၀ီကိတိာ်အမဲာ်ညါႇ တနံၣ်အံၤ ၂၀၂၀ တၢ်ဃုထၢအံၤ မၤနၢၤ၀ဲတၢ်ဖးလၢအနီၣ်ဂံၢ်အါကတၢၢ်အသိး ကဘၣ်က့ၤဟံးထီၣ်ဖီၣ်ထီၣ်ကဒီးမူဒါခံဘျီတဘျီလၢ ကညီဂ့ၢ်၀ီကိတိာ်အလီၢ်စ့ၢ်ကီးန့ၣ်လီၤႉ

ဒ်အ့ၣ်ယၣ်၀တံၣ်ကီၢ်ခီဒိၣ်ႇ တၢ်ဃုထၢခီၣ်မံရှၢၣ်ကရူၢ်အဒ့ ထုးထီၣ်ပာ်ဖျါ၀ဲတၢ်ကစီၣ်အသိး ၂၀၂၀ တၢ်ဃုထၢအံၤ အ့ၣ်ယၣ်၀တံၣ် ကီၢ်ခီဒိၣ်ဘျီၣ်ဒိၣ်ႇ ကညီကလုာ်ဒူၣ်ကလုာ် တၢ်ဖးဟီၣ်က၀ီၤအဂီၢ် ၦၤခွဲးအိၣ်လၢဟ့ၣ်တၢ်ဖးအိၣ်၀ဲ(၁ႇ၀၂၉ႇ၆၈၅)ဂၤအကျါ ၦၤဟဲထၢနုာ်တၢ်ဖးအိၣ်၀ဲ(၇၇၃ႇ၃၁၂)ဂၤဒီး တၢ်ဖးလၢတၢ်ပာ်ဂၢၢ်ပာ်ကျၢၤအီၤအိၣ်၀ဲ(၇၃၈ႇ၄၃၇)ဖျၢၣ်လီၤအဂ့ၢ်န့ၣ် ထုးထီၣ်ဘိးဘၣ်ရၤလီၤ၀ဲန့ၣ်လီၤႉ

ဖဲအကျါန့ၣ် ကလုာ်ဒံၣ်မိၣ်ခြ့ၣ်စံၣ်ကရၢ -NLD ခၢၣ်စး ဂၣ်မိမၠၣ်မၠၣ်သူၤအံၤ ဖဲတၢ်ဃုထၢခဲအံၤန့ၣ် ဒိးန့ၢ်၀ဲတၢ်ဖးလၢတၢ်ပာ်ဂၢၢ်ပာ်ကျၢၤအအါကတၢၢ်(၄၆၀ႇ၃၅၉)ဖျၢၣ် ၆၂ႉ၃၄ မျးကယၤဒီး USDP စီၤလ့ခဲၤ ဒိးန့ၢ်၀ဲတၢ်ဖး(၁၅၇ႇ၆၈၂)ဖျၢၣ် ၂၁ႉ၃၅ မျးကယၤလၢနီၣ်ဂံၢ်ခံတၢ်ဖးအအါကတၢၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါ အ့ၣ်ယၣ်၀တံၣ်ကီၢ်ခီဒိၣ် ဘျီၣ်ဒိၣ် ကညီကလုာ်ဒူၣ်ကလုာ် တၢ်ဖးဟီၣ်က၀ီၤအဂီၢ် ၦၤလၢအနုာ်လီၤတပြၢတၢ်လၢအမ့ၢ် ကညီကမျၢၢ်ပၣ်တံၣ် -KPP နၣ်ခ့ၤအ့အူ ဒိးန့ၢ်၀ဲတၢ်ဖး(၇၉ႇ၃၀၆)ဖျၢၣ် ၁၀ႉ၇၄ မျးကယၤႇ ကညီကလုာ်ပၣ်တံၣ် -KNP မါမ့ယဲထွ့ ဒိးန့ၢ်၀ဲတၢ်ဖး(၂၈ႇ၆၉၇)ဖျၢၣ် ၃ႉ၈၉ မျးကယၤ ဒီး UBP ပၣ်တံၣ် စီၤအဲၣ်လ့မူ ဒိးန့ၢ်၀ဲတၢ်ဖး(၁၂ႇ၃၉၃)ဖျၢၣ် ၁ႉ၆၈ မျးကယၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ် ၂၀၁၅ တၢ်ဃုထၢဖးဒိၣ်အခါန့ၣ် အ့ၣ်ယၣ်၀တံၣ်ကီၢ်ခီဒိၣ်ဘျီၣ်ဒိၣ် ကညီကလုာ်ဒူၣ်ကလုာ် တၢ်ဖးဟီၣ်က၀ီၤအဂီၢ် ၦၤဟ့ၣ်တၢ်ဖးဖိအနီၣ်ဂံၢ်အိၣ်၀ဲ(၇၂၄ႇ၅၄၇)ဂၤဒီး တၢ်ဖးလၢတၢ်ပာ်ဂၢၢ်ပာ်ကျၢၤအီၤအိၣ်၀ဲ ၆၈၇ႇ၉၃၆ ဖျၢၣ်ဒီး ဖဲအကျါန့ၣ် ဂၣ်မိမၠၣ်မၠၣ်သူၤအံၤ မၤနၢၤ၀ဲတၢ်ဖးအနီၣ်ဂံၢ်အအါကတၢၢ်လၢ ၃၅၉ႇ၆၀၉ ဖျၢၣ်န့ၣ်လီၤႉ