Home တၢ်ကစီၣ် ကညီလံာ်လဲၢ်ကလဲၤထီၣ်လဲၤထီဒိၣ်ထီၣ်အဂီၢ် ကဟံးထီၣ်ဖီၣ်ထီၣ်မၤ၀ဲအခိၣ်သ့ၣ်လီၤအဂ့ၢ်န့ၣ် ပကိကညီကိတိာ် စံး၀ဲ

ကညီလံာ်လဲၢ်ကလဲၤထီၣ်လဲၤထီဒိၣ်ထီၣ်အဂီၢ် ကဟံးထီၣ်ဖီၣ်ထီၣ်မၤ၀ဲအခိၣ်သ့ၣ်လီၤအဂ့ၢ်န့ၣ် ပကိကညီကိတိာ် စံး၀ဲ

233
0

လါဒံၣ်စ့ဘၢၣ် ၃ သီႇ ၂၀၂၀ နံၣ်ႇ စီၤရှါ

ကညီလံာ်လဲၢ်ဒီးတၢ်ဆဲးတၢ်လၤအံၤ ဒ်သိးကလဲၤထီၣ်လဲၤထီဒိၣ်န့ၢ်ဒံးတၢ် ၅ နံၣ်ခဲအံၤအဂီၢ် မူဒါလၢကဟဲကတီၢ်အံၤ ကဟံးထီၣ်ဖီၣ်မၤ၀ဲအခိၣ်သ့ၣ်လီၤအဂ့ၢ်န့ၣ် ပကိကီၢ်ခီဒိၣ် ကညီကလုာ်ဒူၣ်ကလုာ်ဂ့ၢ်၀ီကိတိာ် နီၢ်ၦဲၤစ့ စံးဘၣ်ခ့ၣ်အဲးစံၣ်န့ၣ်လီၤႉ

ဖဲလါနိၣ်၀့ဘၢၣ် ၈ သီအနံၤန့ၣ် တၢ်ဃုထၢလၢတၢ်မၤ၀ဲ၀ံၤအံၤန့ၣ် ပကိကီၢ်ခီကညီဂ့ၢ်၀ီအဂီၢ် နီၢ်ၦဲၤစ့အံၤ နုာ်လီၤတပြၢ၀ဲဒၣ်လၢ ဒီကလုာ်ဒံၣ်မိၣ်ခြ့ၣ်စံၣ်ကရၢ -NLD ခၢၣ်စးဒီး မ့ၢ်ကိတိာ်လၢမၤနၢၤကဒီးတၢ်ဖးလၢတၢ်ပာ်ဂၢၢ်ပာ်ကျၢၤ၀ဲအအါကတၢၢ်တဂၤစ့ၢ်ကီးန့ၣ်လီၤႉ

“နီၣ်ဂံၢ် ၁န့ၣ် လံာ်လဲၢ်ဒီးတၢ်ဆဲးတၢ်လၤကလဲၤထီၣ်လဲၤထီဒိၣ်န့ၢ်ဒံး တၢ် ၅ နံၣ်အံၤအဂီၢ်ႇ ကဃူတၢ်ဖိးအဂီၢ်ႇ ကဃုထံၣ်သ့ၣ်ညါ၀ံၤဘျီ ကမၤၦဲၤတၢ်လၢအလိၣ်သ့ၣ်တဖၣ်ဒီး ကမၤ၀ဲလၢအဂ့ၤကတၢၢ်လီၤႉ လံာ်လဲၢ်တၢ်ဆဲးတၢ်လၤကရူၢ်မ့ၢ်ဂ့ၤ
ကပာ်ဖှိၣ်ထီၣ်သးခဲလၢာ်ဒီးကဟံးထီၣ်ဖီၣ်ထီၣ်မၤ၀ဲလီၤ” အဂ့ၢ်န့ၣ် ကိတိာ် နီၢ်ၦဲၤစ့ စံးဘၣ်ခ့ၣ်အဲးစံၣ် ဖဲလါဒံၣ်စ့ဘၢၣ်ထီၣ် ၁ သီအနံၤန့ၣ်လီၤႉ

ကိတိာ် နီၢ်ၦဲစ့အံၤ တၢ်လၢအမၤ၀ဲသ့တကပၤဟူးဂဲၤမၤ၀ဲအဃိ တၢ်ဘျုးဒိၣ်မးအဂ့ၢ်ဒီး မူဒါလၢကဟဲခါဆူညါအံၤ ကညီတၢ်အိၣ်မူကလဲၤထီၣ်လဲၤထီအဂီၢ် ဆၢမုၢ်လၢ်လၢကဟူးဂဲၤမၤအါထီၣ်အဂ့ၢ်န့ၣ် ပကိကီၢ်ခီဒိၣ် ကညီလံာ်လဲၢ်ဒီးတၢ်ဆဲးတၢ်လၤကမံးတံာ် ၦၤပၢၤစ့ စီၤကၠီၤအီၤ စံးဘၣ်ခ့ၣ်အဲးစံၣ်ဒ်အံၤလီၤႉ

အ၀ဲစံး၀ဲလၢ “ကညီတၢ်အိၣ်မူကလဲၤထီၣ်လဲၤထီအဂီၢ် ဒ်သိးကဒိးန့ၢ်ဘၣ်တၢ်ကူၣ်ဘၣ်ကူၣ်သ့ဒီးတၢ်ဖံးတၢ်မၤအဂီၢ်ႇ တၢ်သူၣ်တၢ်ဖျး တၢ်ဘုၣ်ဆၣ်ဖိကီၢ်ဖိသနၢၣ်တဖၣ်ႇ ဒ်သိးကဒိးန့ၢ်ဘၣ်စ့ဟ့ၣ်လိၢ်အဂီၢ် ဒ်ကိတိာ်တဂၤအသိး အဲၣ်ဒိးလၢကမၤဟ့ၣ်လီၤႉ ခဲအံၤခိ၀ံၣ်အဆၢကတီၢ် ကၠိကးတံၢ်အသးဘၣ်ဆၣ် သရၣ်လၢအသိၣ်လိကညီလံာ်လၢတနံၤဂီၢ်တဖၣ် ဒ်သိးသုတလီၤဘၣ်တၢ်ကီတၢ်ခဲတဂ့ၤအဂီၢ်လီၤႉ ၀ံၤဘျီ ပကိကညီလံာ်လဲၢ်တၢ်ဆဲးတၢ်လၤကမံးတံာ်ဒီး သးစၢ်ဂ့ၢ်၀ီကရူၢ်တဖၣ်အံၤ အဲၣ်ဒိးလၢကဒုးအိၣ်ထီၣ်၀ဲဃံးဃီၣ်ဒီၣ်လီၤ” အဂ့ၢ်န့ၣ် စံး၀ဲန့ၣ်လီၤႉ

ကညီကိတိာ် နီၢ်ၦဲၤစ့အံၤ ဖဲအပူၤကွံာ် ၂၀၁၉ နံၣ်န့ၣ် ဒဲၣ်အူကီၢ်ဆၣ် နီၢ်သီသွဲၣ်ထူ လၢအဘၣ်သဂၢၢ်၀ဲတၢ်ဖီၣ်စ့တကလးကၠးအယီၤဘျၣ်(အတု)တၢ်မူးတၢ်ရၢ်အံၤ ပူၤဖျဲးထီၣ်၀ဲအမဲာ်ညါ လီၢ်က၀ီၤတၢ်ဂုၤထီၣ်ပသီထီၣ်တၢ်ဖံးတၢ်မၤလၢအဂၤတဖၣ်စ့ၢ်ကီး တီခိၣ်ရိၣ်မဲဟူးဂဲၤမၤစၢၤ၀ဲအဃိ ဘၣ်တၢ်ဃုထၢထီၣ်ကဒီးအီၤတသီတဘျီဒ်အံၤလီၤအဂ့ၢ်န့ၣ် တၢ်ပဲာ်ထံနီၤဖးအိၣ်၀ဲန့ၣ်လီၤႉ

မိၣ်ကီၢ်စဲၣ်ႇ တနီသရံၣ်ႇ ပကိႇ အ့ၣ်ယၣ်၀တံၣ် ဒီး ၀့ၢ်တကူၣ်ကီၢ်ခီဒိၣ်တဖၣ် ကညီကလုာ်ဒူၣ်ဂ့ၢ်၀ီကိတိာ် အိၣ်၀ဲ ၅ ဂၤဒီး ၂၀၁၅ တၢ်ဃုထၢဒီး ၂၀၂၀ တၢ်ဃုထၢ ခံဘျီဆဲးတဲး ကညီကိတိာ်ခဲလၢာ်လၢတၢ်ဃုထၢ၀ဲတဖၣ်န့ၣ် မ့ၢ်၀ဲဒၣ် NLD ပၣ်တံၣ်ဖိတဖၣ်န့ၣ်လီၤႉ