Home တၢ်ကစီၣ် ဒူသ၀ီၦၤဘၣ်မူဘၣ်ဒါတဖၣ်ဃ့ထီၣ် KNU လၢကကွၢ်ထံသမံသမိး ၦၤလၢတလူၤပိာ်ထွဲခိ၀ံၣ်တၢ်သိၣ်တၢ်သီတဖၣ်

ဒူသ၀ီၦၤဘၣ်မူဘၣ်ဒါတဖၣ်ဃ့ထီၣ် KNU လၢကကွၢ်ထံသမံသမိး ၦၤလၢတလူၤပိာ်ထွဲခိ၀ံၣ်တၢ်သိၣ်တၢ်သီတဖၣ်

302
0

လါဒံၣ်စ့ဘၢၣ် ၂၂ သီႇ ၂၀၂၀ နံၣ်ႇ စီၤမၠၣ်အူသၣ်

ကညီဒီကလုာ်စၢဖှိၣ်ကရၢ -KNU ၀ီၢ်ရီကီၢ်ဆၣ် ဒူသ၀ီတဖၣ်စုာ်စုာ်အပူၤ ၦၤလၢအနုာ်လီၤ Quarantine တဖၣ်အံၤ ခီဖျိလူၤပိာ်မၤထွဲတၢ်သိၣ်တၢ်သီတအိၣ်၀ဲဘၣ်အဃိ ဒူသ၀ီၦၤဘၣ်မူဘၣ်ဒါတဖၣ်ဃ့ထီၣ် KNU လၢကကွၢ်ထံသမံသမိး၀ဲဒၣ်န့ၣ်လီၤႉ

ၦၤလၢအအိၣ်ဟဲက့ၤလၢ ကီၢ်ပူၤႇ ကီၢ်ချၢသ့ၣ်တဖၣ် အိၣ်ဆိး၀ဲဒ်တၢ်ပာ်ပနီၣ် Quarantine အလီၢ်သ့ၣ်တဖၣ်ဘၣ်ဆၣ် တနီၤန့ၣ်ခီဖျိလၢလူၤပိာ်မၤထွဲတၢ်သိၣ်တၢ်သီတအိၣ်ဘၣ်အဃိ လီၢ်က၀ီၤဖိတဖၣ်တၢ်ဘၣ်ယိၣ်ဘၣ်ဘှီဟဲအိၣ်ထီၣ်၀ဲဒၣ်ဒီး ဖဲလါဒံၣ်စ့ဘၢၣ် ၁၈ သီအနံၤ တၢ်မၤ၀ဲ KNU တၢ်တြီဆၢခိ၀ံၣ်ကရူၢ်ဒီးဒူသ၀ီသးၦၢ်တဖၣ် တၢ်ထံၣ်လိာ်တၢၣ်ပီၣ်တဲသကိးအပူၤ ဆီၣ်တခူဃ့ထီၣ်၀ဲန့ၣ်လီၤႉ

ချၢၣ်သ၀ီကရူၢ် သ၀ီသးၦၢ် မါဆါညိၣ်မီၤ စံး၀ဲလၢ “ၦၤလၢအဟဲက့ၤနုာ်လီၤလၢသ၀ီတဖၣ် မ့ၢ်ကဘၣ်ပာ် လၢတၢ်အိၣ်ခိးကွၢ်အလီၢ်ဧါႇ ဘၣ်ဒုးအိၣ်အ၀ဲသ့ၣ်လၢအဟံၣ်ဧါႇ မ့ၢ်ဘၣ်မၢက့ၤကဒါဧါ တၢ်သ့ၣ်တဖၣ်အံၤသမံသမိးအီၤလီၤတံၢ်လီၤဆဲးဒီးဆၢတဲာ်၀ဲန့ၢ်ဘၣ်ဆၣ်သနာ်က့ မ့မ့ၢ်ၦၤလၢအအိၣ်ဟဲက့ၤလၢ မလ့ရှါႇ ကီၢ်ကၠီၣ်တဲၣ်ႇ ကီၢ်ပူၤတနီၤန့ၣ် ဟးထီၣ်ဟုၣ်၀ဲဒၣ်လၢတၢ်ချၢႇ ဟးအီသံးဒီးၦၤတၢ်ချၢတဖၣ်အိၣ်၀ဲဒီး လဲၤတဲ၀ဲတဘျီခံဘျီလံဘၣ်ဆၣ် တဲတန့ၢ်ဘၣ်အိၣ်၀ဲစ့ၢ်ကီးလီၤႉ လၢကဟံးအရ့အဂီၢ်စ့ၢ်ကီး လၢကဘၣ်လဲၤထီၣ်က့ၤလီၤအဂီၢ် ကိၢ်သးလၢတၢ်ဖံးတၢ်မၤကအါထီၣ်လီၤႉ အဲၣ်ဒိးဃ့ထီၣ်လၢ ကကွၢ်ထံသမံသမိးအီၤန့ၣ်လီၤ” အဂ့ၢ်န့ၣ် စံး၀ဲဒၣ်န့ၣ်လီၤႉ

ကၠၤအ့စ့ၣ်ကၠံကီၢ်ဆၣ် ၀ီၢ်ရီဟီၣ်က၀ီၤအပူၤ မူၣ်ဒိၤႇ မီၣ်လမၠဲၣ်ႇ ၀့ၢ်တကူၣ်ကျဲမုၢ်ႇ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ဃိၣ်သၢဖျၢၣ်ႇ မၠၣ်၀တံၣ်ကီၢ်ဆၢကျဲမုၢ်အကျိၤတဖၣ်အံၤ ၦၤဟးထီၣ်က့ၤလီၤတအိၣ်၀ဲဘၣ်အသိး ၦၤလၢအိၣ်ဟဲက့ၤလၢမလ့ရှါဒီးကီၢ်ကၠီၣ်တဲၣ်တဖၣ်စ့ၢ်ကီးအိၣ်၀ဲလီၤႉ တၢ်အဃိန့ၣ် လၢသ၀ီတဖျၢၣ်စုာ်စုာ်အပူၤ တၢ်ပာ်လီၤ၀ဲဒၣ် Quarantine အိၣ်၀ဲဘၣ်ဆၣ် ၦၤလၢအအိၣ်လၢတၢ်အိၣ်ခိးကွၢ်အလီၢ်တနီၤန့ၣ် လူၤပိာ်မၤထွဲတၢ်သိၣ်တၢ်သီအိၣ်စှၤ၀ဲအဃိ တၢ်ဘၣ်ယိၣ်ဘၣ်ဘှီအိၣ်၀ဲဒ်အံၤလီၤအဂ့ၢ်န့ၣ် သ့ၣ်ညါဘၣ်လၢ ဒူသ၀ီၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ

KNU ၀ီၢ်ရီကီၢ်ဆၣ် တၢ်တြီဆၢခိ၀ံၣ်ၦၤဘၣ်မူဘၣ်ဒါ သရၣ်လါထီၣ်သီ စံး၀ဲလၢ“ဒ်သိးပကမျၢၢ်ဖိ တဖၣ်တၢ်ဟးထီၣ်က့ၤလီၤမၤအီၣ်မၤအီကဘၣ်ဂီၢ်ဖိးဒ့အဂီၢ် တဲသကိးတၢ်ဒီးဒူသ၀ီၦၤဘၣ်မူဘၣ်ဒါတဖၣ်လီၤႉ လၢတၢ်မၤအီၣ်မၤအီအဂီၢ်တၢ်တြီဃာ်တအိၣ်၀ဲဘၣ်ဆၣ် ကဘၣ်လဲၤထီၣ်က့ၤလီၤဒ် တၢ်အိၣ်ဆူၣ်အိၣ်ချ့တၢ်သိၣ်တၢ်သီအသိးလီၤမီၤႉ ၦၤလၢတလူၤပိာ်မၤထွဲတၢ်သိၣ်တၢ်သီတဖၣ်န့ၣ် ကကိးထံၣ်အ၀ဲသ့ၣ်ဒီးရှဲပၠးတဲနၢ်ပၢၢ်အီၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

KNU တၢ်တြီဆၢခိ၀ံၣ်တၢ်ဆါကရူၢ်ဒီးဒူသ၀ီသးၦၢ်တၢ်တဖၣ် တၢ်ထံၣ်လိာ်တၢၣ်ပီၣ်တဲသကိးအပူၤ လၢကီၢ်ဆၣ်အပူၤလီၢ်က၀ီၤဖိတဖၣ်ဟးထီၣ်ဟးလီၤလၢသဘျ့ႇ တၢ်သမံသမိးခိ၀ံၣ်အလီၢ်တဖၣ် တၢ်ကပာ်၀ဲတုၤလၢလါဒံၣ်စ့ဘၢၣ်ဒီး တၢ်ဒီသဒၢအကျိၤအကျဲဘၣ်ဃးတၢ်အိၣ်ဆူၣ်အိၣ်ချ့တဖၣ် လၢလီၢ်က၀ီၤအပူၤကဟ့ၣ်၀ဲပီညါဒီး တၢ်ဟးထီၣ်က့ၤလီၤမုၢ်နံၤမုၢ်သီမ့ၢ်တလၢဒီး တၢ်ဂ့ၢ်တၢ်ကျိၤလီၤတံၢ်လီၤဆဲးမ့ၢ်တအိၣ်ဘၣ်တဖၣ််န့ၣ် တဘၣ်ဟ့ၣ်အခွဲးလၢကဟးထီၣ်ဟးလီၤဘၣ်တဖၣ် ဆၢတဲာ်လီၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ