ကညီကီၢ်စဲၣ်ပူၤပအိၣ်တဖၣ် တဘၣ်သးပ့ၤနီၣ်လုၢ်လၢ်တၢ်ဆဲးတၢ်လၤဒီးမုၢ်နံၤဒိၣ်မုၢ်နံၤထီတဖၣ်ဘၣ်အဂ့ၢ် လံာ်လဲၢ်ဒီးတၢ်ဆဲးတၢ်လၤၦၤပၢၤလီၢ်ဆ့ၣ်နီၤဆီၣ်တခူထီၣ်၀ဲ

လါဒံၣ်စ့ဘၢၣ် ၁၆ သီႇ ၂၀၂၀ နံၣ်ႇ စီၤရှါ

ပအိၣ်ကလုာ်ဒူၣ်လၢအအိၣ်ဖဲကညီကီၢ်စဲၣ်အပူၤတဖၣ် တဘၣ်သးပ့ၤနီၣ်ပလုၢ်လၢ်ထူသနူတၢ်ဆဲးတၢ်လၤႇ မုၢ်နံၤဒိၣ်မုၢ်နံၤထီတဖၣ်ဘၣ်ဒီး ကပၢၤဃာ်စိာ်ကဖီထီၣ်ထီဘိအဂ့ၢ်န့ၣ် ကီၢ်စဲၣ်ႇ ပအိၣ်လံာ်လဲၢ်ဒီး တၢ်ဆဲးတၢ်လၤကရၢ ၦၤပၢၤလီၢ်ဆ့ၣ်နီၤ ဆီၣ်တခူထီၣ်ဒီးစံး၀ဲဖဲလါဒံၣ်စ့ဘၢၣ် ၁၅ သီအနံၤန့ၣ်လီၤႉ

ဖဲလါဒံၣ်စ့ဘၢၣ် ၁၅ သီႇ လါပျုၤထီၣ် ၁ သီအနံၤ လၢအလီၤဘၣ်၀ဲ(၂၇၁၂)နံၣ်ၦဲၤ ပအိၣ်ဒီကလုာ်နံၣ်ထီၣ်သီတၢ်ရဲၣ်တၢ်ကျဲၤအံၤတၢ်မၤ၀ဲဒၣ် ဖဲဖၣ်အၣ်၀့ၢ်ႇ ပအိၣ်လံာ်လဲၢ်ဒီးတၢ်ဆဲးတၢ်လၤကရၢအရူဒီး စံးဘၣ်၀ဲၦၤမၤတၢ်ကစီၣ်ဖိတဖၣ်န့ၣ်လီၤႉ

ကညီကီၢ်စဲၣ်ႇ ပအိၣ်လံာ်လဲၢ်ဒီးတၢ်ဆဲးတၢ်လၤၦၤပၢၤလီၢ်ဆ့ၣ်နီၤ ခိၤသ့တ့ၤ စံး၀ဲလၢ “တဘၣ်သးပ့ၤနီၣ်ပလုၢ်လၢ်ထူသနူႇတၢ်ဆဲးတၢ်လၤအံၤဘၣ်ဒီး မုၢ်နံၤဒိၣ်မုၢ်နံၤထီလၢအဘၣ်ထွဲတဖၣ်မ့ၢ်ဂ့ၤႇ တၢ်ဆဲးတၢ်လၤတဖၣ်မ့ၢ်ဂ့ၤ ကပၢၤဃာ်စိာ်ကဖီထီၣ်တဘိယူၢ်ဃီအဂီၢ် အဲၣ်ဒိးမၤလိာ်ဃာ်ယဲလီၤ” အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါ ကလုာ်ဒူၣ်ခွဲးယာ်တဖၣ်ရှူ၀ဲဒၣ်တၢ်ဂ့ၢ်တၢ်ကျိၤတခီန့ၣ် ပၣ်ဃုာ်၀ဲတထံၣ်ခီဖျိလၢ တၢ်ကူၣ်ဘၣ်ကူၣ်သ့စှၤ၀ဲဒီး ဒ်သိးပအိၣ်ၦၤကူၣ်ဘၣ်ကူၣ်သ့ကဟဲအိၣ်ထီၣ်အါအါအဂီၢ်လိၣ်ဒံး၀ဲဒၣ်အသိး ပအိၣ်ကလုာ်ၦၤကူၣ်ဘၣ်ကူၣ်သ့လၢအအိၣ််ပာ်တဖၣ်စ့ၢ်ကီး တၢ်ကူၣ်ဘၣ်ကူၣ်သ့လၢအအိၣ်ပာ်တဖၣ်ကဘၣ်သူ၀ဲဒီး နုာ်လီၤပၣ်ဖှိၣ်မၤသကိးတၢ်လၢကလုာ်တၢ်ဖံးတၢ်မၤတဖၣ်အပူၤအဂ့ၢ်န့ၣ် ခိၤသ့တ့ၤ ဆဲးစံး၀ဲန့ၣ်လီၤႉ

ပအိၣ်ကလုာ်တဖၣ်အံၤ ခီဖျိလၢဃုသ့ၣ်ညါနီၢ်ကစၢ်လုၢ်လၢ်ထူသနူတၢ်ဆဲးတၢ်လၤတၢ်ဟ့ၣ်သါတဖၣ်စှၤ၀ဲဒီး ဘူးတ့ၢ်မးလၢကလီၤမၢ်ကွံာ်ဘၣ်အသးအဃိ ဒ်သိးတသးပ့ၤနီၣ်လုၢ်လၢ်ထူသနူတၢ်ဆဲးတၢ်လၤဘၣ်ဒီး ဒ်သိးကဟ့ၣ်သါက့ၤစၢၤသွဲၣ်သီတဖၣ်ကန့ၢ်အဂီၢ် ဘၣ်တၢ်မၤလၤကပီၤက့ၤ ပအိၣ်နံၣ်ထီၣ်သီအမုၢ်နံၤအံၤလီၤအဂ့ၢ်န့ၣ် ၦၤဘၣ်မူဘၣ်ဒါတဖၣ်စ့ၢ်ကီးစံး၀ဲန့ၣ်လီၤႉ

ခီဖျိလၢခိ၀ံၣ်ဆၢကတီၢ်အဃိ လၢကီၢ်စဲၣ်အပူၤ ၅ ၀ီတ၀ီ ပအိၣ်နံၣ်ထီၣ်သီတၢ်ရဲၣ်တၢ်ကျဲၤအံၤ ကညီကီၢ်စဲၣ်ႇ ပအိၣ်လံာ်လဲၢ်ဒီးတၢ်ဆဲးတၢ်လၤကရၢတီခိၣ်ရိၣ်မဲမၤ၀ဲတဆံးတက့ၢ်လီၤဘၣ်ဆၣ် လၢတၢ်ရဲၣ်တၢ်ကျဲၤအပူၤ တၢ်တဲလီၤရှဲပၠး၀ဲဘၣ်ဃးဒီးပအိၣ်ဒီကလုာ်နံၣ်ထီၣ်သီတၢ်စံၣ်စိၤတဲစိၤကဲထီၣ်အဂ့ၢ်ဒီး တၢ်ရဲၣ်တၢ်ကျဲၤအတၢ်မုၢ်လၢ်အံၤၦၤဘၣ်မူဘၣ်ဒါလၢအဘၣ်ထွဲတဖၣ် စံးလီၤ၀ဲန့ၣ်လီၤႉ

တၢ်ရဲၣ်တၢ်ကျဲၤလၢဘျီ၀ဲအံၤအပူၤ သီခါတဖၣ်ႇ ကညီကီၢ်စဲၣ် ပအိၣ်ကလုာ်ဒူၣ်ဂ့ၢ်၀ီကိတိာ် ခိၤမၠိတ့ၣ်ႇ ကလုာ်ဒူၣ်ဂ့ၢ်၀ီကိတိာ်၀ဲၤကျိၤ ကညီကီၢ်စဲၣ်ၦၤနဲၣ်တၢ်ခိၣ် စီၤကၠီၤမ့ထိၣ်ဒီး ပဒိၣ်ၦၤဘၣ်မူဘၣ်ဒါတဖၣ်ႇ ပအိၣ်လံာ်လဲၢ်ဒီးတၢ်ဆဲးတၢ်လၤကရၢဖိတဖၣ်ႇ ဃုာ်ဒီးပအိၣ်ကလုာ်ဒူၣ်ဖိတဖၣ် ခဲလၢာ်ပာ်ဖှိၣ် ၃၀ ဂၤဘျဲၣ်ဟဲထီၣ်၀ဲဒၣ်န့ၣ်လီၤႉ အပူၤကွံာ်နံၣ် ပအိၣ်နံၣ်ထီၣ်သီအံၤ လံာ်လဲၢ်ဒီးတၢ်ဆဲးတၢ်လၤကရၢအံၤ မၤ၀ဲဒၣ်နံၣ်ထီၣ်သီဖဲသၤမညၣ်သ၀ီပူၤဒိၣ်ဒိၣ်မုၢ်မုၢ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ