ခိရံယါတၢ်သး၀ံၣ်ပြၢအပူၤ ၦၤဘၣ်ထီၣ်လီၢ်ခံအပတီၢ်အကျါ နီၢ်မၤသးထူ၀ါ ပၣ်ဃုာ်

လါဒံၣ်စ့ဘၢၣ် ၁၀ သီႇ ၂၀၂၀ နံၣ်ႇ စီၤရှါ

ခိရံယါထံကီၢ် TV channel အမံၤဟူသၣ်ဖျါတခါလၢအမ့ၢ် KBS အံၤ မၤ၀ဲဒၣ်(Trot Nation Sports) တၢ်သး၀ံၣ်တပြၢအံၤအပူၤ လီၢ်ခံအပတီၢ်ၦၤလၢအအိၣ်တ့ၢ် ၄၈ ဂၤအကျါ ပၣ်ဃုာ်၀ဲဒၣ်ဒီးနီၢ်မၤသးထူ၀ါအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခိရံယါထံကီၢ်ႇစိလ်၀့ၢ်ခိၣ်အပူၤတကီၢ်ခါခဲအံၤတၢ််မၤ၀ဲၤဒၣ်တၢ်သး၀ံၣ်တပြၢတၢ်အံၤစးထီၣ်ဖဲလါယူၤလံန့ၣ်ၦၤနုာ်လီၤတပြၢတၢ်အနီၣ်ဂံၢ်အိၣ်လၢအကလးညါဒီး ဖဲန့ၣ်တပတီၢ်ၦၤနီၣ်ဂံၢ်အိၣ်တ့ၢ်လၢအကယၤအကျါ တၢ်ဃုထၢ၀ဲလၢအဂ့ၤကတၢၢ်အိၣ်တ့ၢ်က့ၤ၀ဲ ၈၄ ဂၤအကျါ ပၣ်ဃုာ်စ့ၢ်ကီး၀ဲဒၣ်ဒီးၦၤမံၤဟူသၣ်ဖျါ ၦၤသး၀ံၣ်တၢ်ဖိ စီၤထူ၀ါအဖိမုၣ်ဒိၣ် နီၢ်မၤသးထူ၀ါန့ၣ်လီၤႉ

ဖဲအပူၤကွံာ် လါဒံၣ်စ့ဘၢၣ် ၅ သီ မုၢ်နၤခီတၢ်ပြၢတၢ်သး၀ံၣ်အခါ နီၢ်မၤသးထူ၀ါ သး၀ံၣ်တပြၢတၢ်အဖီခိၣ် ဒိးန့ၢ်ဘၣ်၀ဲ ဆၣ် ၈ ဖျၢၣ်(all 8 stars) အသိး တၢ်ပာ်ပနီၣ်အီၤလၢ Top-2 ဒီး ၦၤလၢတၢ်ဃုထၢထီၣ်၀ဲလၢအဂ့ၤကတၢၢ် ၄၈ ဂၤအကျါ ဘၣ်တၢ်ဃုထၢထီၣ်အီၤစ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်သး၀ံၣ်တပြၢတၢ်ရဲၣ်တၢ်ကျဲၤလၢဘၣ်တၢ်သး၀ံၣ်အီၤလၢခိရံယါကျိာ်အံၤ မုၢ်ဘူၣ်( မုၢ်ဃုနံၤ)ကိးနံၤဒဲးတၢ်တပြၢ၀ဲတၢ်သး၀ံၣ်ဒီး လီၢ်ခံအပတီၢ်(final)တၢ်ပြၢအံၤ တၢ်တိာ်ပာ်၀ဲလၢအက၀ံၤ၀ဲ ဖဲ ၂၀၂၁ လါဖ့ၤဘြူၤအါရံၤအတီၢ်ပူၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခဲအံၤဒ်လီၢ်ခံကတၢၢ်တၢ်ပြၢစရီပူၤအသိး ၦၤလၢအတမ့ၢ်၀ဲဒၣ်ခိရိယါအထံဖိကီၢ်ဖိတဖၣ်လၢအမ့ၢ် နီၢ်မၤသးထူ၀ါလၢအအိၣ်ဖျဲၣ်ထီၣ် ဖဲကညီကီၢ်စဲၣ် ကီၢ်ပယီၤအပူၤဒီး ၦၤအဂၤ ၂ ဂၤလၢအအိၣ်ဖျဲၣ်ထီၣ်ဖဲနံၤကရိန့ၣ်လီၤႉ မ့မ့ၢ်နီၢ်မၤသးထူ၀ါအံၤ မ့ၢ်ၦၤနုာ်လီၤတပြၢတၢ်လၢအသးစၢ်ကတၢၢ်ခံဂၤတဂၤစ့ၢ်ကီးန့ၣ်လီၤႉ

ခိရံယါထံကီၢ် တၢ်တပြၢတၢ်သး၀ံၣ်တၢ်ရဲၣ်တၢ်ကျဲၤတဖၣ်အံၤ ၦၤထံဂုၤကီၢ်ဂၤဖိတဖၣ် တမၤနၢၤဒိးန့ၢ်၀ဲ(winner) နီတဘျီဘၣ် ဘၣ်ဆၣ် တၢ်ပြၢတဘျီအံၤ နီၢ်မၤသးထူ၀ါအံၤ ၦၤဟ့ၣ်ဂံၢ်ဟ့ၣ်ဘါအီၤအါ၀ဲႇ Judge တဖၣ်ဟ့ၣ်ဂံၢ်ဟ့ၣ်ဘါအီၤအါ၀ဲန့ၣ်လီၤႉ

နီၢ်မၤသးထူ၀ါအံၤအမံၤဟူသၣ်ဖျါထီၣ်၀ဲဒၣ်လၢ(socialmedia)အပူၤတၢ်သး၀ံၣ်လၢၦၤအါဂၤဘၣ်သူၣ်ဘၣ်သးကနၣ်မုာ်၀ဲလၢအမ့ၢ်“လိၣ်ဘၣ်ဟံၣ်တဖျၢၣ်လီၤ” တကးဘၣ် ကညီတၢ်သး၀ံၣ်ဒီးပယီၤတၢ်သး၀ံၣ်တဖၣ်စ့ၢ်ကီးသး၀ံၣ်၀ဲန့ၣ်လီၤႉ နီၢ်မၤသးထူ၀ါအံၤ လဲၤအိၣ်ဆိး၀ဲဒၣ်လၢခိရိယါထံကီၢ်ဃုာ်ဒီး အမိဒီးအဒ့ခွါ ၂ ဂၤန့ၣ်လီၤႉ