ခီတီၣ်ၦၤလီၢ်အိၣ်ကမှံဖိပိာ်မုၣ်တဖၣ်အဂီၢ် တၢ်အိးထီၣ်န့ၢ်၀ဲတၢ်ဆးစဲးတၢ်သိၣ်လိ

လါဒံၣ်စ့ဘၢၣ် ၂၁ သီႇ ၂၀၂၀ နံၣ်ႇ စီၤရှါ

ကညီကီၢ်စဲၣ်ႇ လူၢ်ပျဲၢ်ကီၢ်ဆၣ်ႇ ခီတီၣ်(မၠဲၤကၠံငူၣ်)ၦၤလီၢ်ကမှံအလီၢ် ပိာ်မုၣ်မိာ်မၢၤတဖၣ်အဂီၢ် တၢ်အိးထီၣ်န့ၢ်၀ဲတၢ်ဆးစဲးတၢ်သိၣ်လိ လၢအဆိကတၢၢ်တဘျီ စးထီၣ်ဖဲလါဒံၣ်စ့ဘၢၣ် ၁၁ သီတုၤလၢလါယနူၤအါရံၤ ၁၀ သီအနံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢတၢ်ဆးစဲးတၢ်ကူၣ်ဘၣ်ဘၣ်ကူၣ်သ့တဆီ ဒ်သိးကမၤသ့၀ဲတုၤလၢတၢ်လုၢ်အီၣ်နီၢ်ခိသးသမူတစုကန့ၢ်အဂီၢ် မုၢ်လၢ်တိာ်ပာ်၀ဲဒီးမၤဟ့ၣ်၀ဲလီၤအဂ့ၢ်န့ၣ် ဖဲလါဒံၣ်စ့ဘၢၣ် ၁၈ သီအနံၤ သၣ်တီၣ်ကၠံပိာ်မုၣ်ကရၢ ၦၤနဲၣ်တၢ် နီၣ်မၤမၤခၠိၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

အ၀ဲစံး၀ဲလၢ“တၢ်ဆးစဲးတၢ်သိၣ်လိအံၤမၤလိ၀ံၤတဘျီဃီန့ၣ်တဘၣ်၀ံၤဘၣ်ဒီး မၤလိဂံၢ်ခီၣ်ထံးတၢ်သိၣ်လိမ့ၢ်၀ံၤန့ၣ် ကဆဲးထီၣ်လၢအပတီၢ်ထီလီၤႉ အပတီၢ်ထီမ့ၢ်၀ံၤန့ၣ် တၢ်သ့စုခီၣ်ဘၣ်လၢမၤသ့ဃာ်တဖၣ် ဒ်သိးကတုၤလၢတၢ်ဆါတၢ်ၦ့ၤလီၢ်အဂီၢ် ပညိၣ်ပာ်ဒီးကမၤကဲထီၣ်၀ဲလီၤ” အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါ တၢ်သိၣ်လိမ့ၢ်၀ံၤန့ၣ်ၦၤလၢအထီၣ်တၢ်မၤလိ၀ံၤသ့ၣ်တဖၣ်အံၤ ဒ်သိးကျိၣ်စ့တၢ်ဟဲနုာ်ကအိၣ်လၢဟံၣ်ပူၤဃီပူၤအဂီၢ်တကးဘၣ် တိာ်ပာ်၀ဲလၢ ကထုးထီၣ်ရၤလီၤအီၤလၢမ့ၢ်ခီတီၣ်အတၢ်ပနီၣ်(တံဆိပ်)တစုအဂ့ၢ်န့ၣ် နီၢ်မၤမၤခၠိၤ ဆဲးစံး၀ဲန့ၣ်လီၤႉ
တၢ်သိၣ်လိလၢဘၣ်တၢ်မၤ၀ဲတလါအတီၢ်ပူၤအံၤ ကီၢ်စဲၣ်ၦၤဂ့ၢ်၀ီၦၤမၤတၢ်ဖိ၀ဲၤကျိၤတီခိၣ်ရိၣ်မဲ၀ဲဒၣ်ဒီး UN Women ကရူၢ်အံၤမၤစၢၤ၀ဲတၢ်ဆးစဲးတၢ်ဖိတၢ်လံၤတဖၣ်ဒီး သၣ်တီၣ်ကၠံပိာ်မုၣ်ကရၢ မၤစၢၤ၀ဲ တၢ်ဆးစဲးသရၣ်တဖၣ် ပာ်ဖှိၣ်မၤစၢၤစ့ၢ်ကီး၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ

လၢတၢ်သိၣ်လိဘျီ၀ဲအံၤအပူၤ လီၢ်အိၣ်ကမှံၦၤထီၣ်တၢ်သိၣ်လိဖိဟဲထီၣ်၀ဲ ၂၀ ဂၤဒီး တၢ်သိၣ်လိန့ၢ်၀ဲဂံၢ်ခီၣ်ထံးတၢ်ဆးစဲးအကျိၤအကျဲတဖၣ်လၢအမ့ၢ် ကညီတၢ်ကူတၢ်ကၤ ခိၣ်ဖၢၣ်တဖၣ်ႇ ထဲကူတဖၣ်ႇ ဖိသၣ်တၢ်ကူတၢ်ကၤတဖၣ်ႇ ပိာ်ခွါဆ့ကၤတဖၣ်ႇ ပိာ်မုၣ်ဆ့ကၤလၢတၢ်ဆးအဖီတဖၣ် တၢ်သ့စုခီၣ်ဘၣ်တဖၣ်အံၤကသိၣ်လိန့ၢ်၀ဲအဂ့ၢ်န့ၣ် တၢ်သိၣ်လိသရၣ်မုၣ်တဖၣ် စံး၀ဲန့ၣ်လီၤႉ
ၦၤထီၣ်စဲးတၢ်သိၣ်လိဖိ နါသ့စိအ့ စံး၀ဲလၢ“ကျဲခါဆူညါလၢကဘၣ်လဲၤအဂီၢ်ဒီးဟံၣ်ဖိဃီဖိအဂီၢ် မ့ၢ်န့ၢ်ဘၣ်တၢ်ကူၣ်ဘၣ်ကူၣ်သ့တခါအံၤန့ၣ် ကဆဲးထီၣ်ကဒါတၢ်ကူၣ်ဘၣ်ကူၣ်သ့လၢအပတီၢ်ထီလီၤႉ တၢ်သိၣ်လိတခါအံၤမ့ၢ်၀ံၤန့ၣ် အဲၣ်ဒိးကဲထီၣ်(Fashion Designer)န့ၣ် မုၢ်လၢ်၀ဲလီၤ” အဂ့ၢ်န့ၣ် စံး၀ဲန့ၣ်လီၤႉ

ဖဲ ၂၀၁၆ နံၣ်အခါ လူၢ်ပျဲၢ်ကီၢ်ဆၣ်ႇ မဲၢ်သ၀ီဟီၣ်က၀ီၤအပူၤ ခီဖျိပဒိၣ်သုးမုၢ်ဒိၣ်ႇ သုးခိးကီၢ်ဆၢ (BGF)ကရူၢ်တဖၣ်ပာ်ဖှိၣ်ထီၣ်သးကရူၢ်ဒီး ဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ် DKBA (ထုးဖးသးကရူၢ်)တဖၣ်အဘၢၣ်စၢၤ တၢ်ခးလိာ်သးကဲထီၣ်အဃိ လီၢ်က၀ီၤသ၀ီဖိတဖၣ် လၢကအိၣ်ကဒုသးအဂီၢ် ဟဲတုၤ၀ဲဒၣ်ဖဲမၠဲၣ်ကၠံငူၣ်တၢ်လီၢ်ဒီး တုၤလၢခဲအံၤတစု က့ၤ၀ဲလၢအတၢ်လီၢ်တၢ်ကျဲတသ့ဒံးဘၣ်န့ၣ်လီၤႉ