လါဒံၣ်စ့ဘၢၣ် ၇ သီႇ ၂၀၂၀ နံၣ်ႇ စီၤထိလ့
ကညီကီၢ်စဲၣ်ႇ သၣ်တီၣ်ကၠံကီၢ်ဆၣ် စံာ်လီၢ်ခုးလီၢ်လၢလီၢ်က၀ီၤပၢ၀ဲဒ်မိၢ်လုၢ်ပၢ်လၢ်တဖၣ်အံၤ ဒ်သိးကဒိးန့ၢ်ဘၣ် ပဒိၣ်တၢ်ပာ်ပနီၣ် လံာ်အဒိ(၇)ကန့ၢ်အဂီၢ် ကမၤ၀ဲအဂ့ၢ်န့ၣ် ကညီကမျၢၢ်ပၣ်တံၣ် ဘျီၣ်ဒိၣ်ခၢၣ်စး စီၤခရံာ်တိၤဖၤ အၢၣ်လီၤစံး၀ဲန့ၣ်လီၤႉ
သၣ်တီၣ်ကၠံကီၢ်ဆၣ်အပူၤ ဟီၣ်ခိၣ်အ့ကၢၣ်ပာ်ဖှိၣ်ခဲလၢာ်အိၣ်၀ဲခွံကလီၢ်ဃၣ်ဃၣ်ဒီး ဟီၣ်ခိၣ်အ့ကၢၣ်လၢပဒိၣ်ထုးထီၣ်၀ဲလၢပၢဘၣ်ခွဲးယာ် လံာ်အဒိ(၇)အံၤ ပာ်ဖှိၣ်ခဲလၢာ်အိၣ်ထဲနွံကလးကပိၤကပၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဟီၣ်ခိၣ်လၢအအိၣ်တ့ၢ်တဖၣ်န့ၣ် မ့ၢ်ဒၣ်ဟီၣ်ခိၣ်လၢလီၢ်က၀ီၤမိၢ်လုၢ်ပၢ်လၢ်ပၢ၀ဲတဖၣ်လီၤဘၣ်ဆၣ် ပၢဘၣ်၀ဲလၢအဖိးသဲစးတအိၣ်ဘၣ်အဃိ ဒ်ထံကီၢ်တၢ်ဘျၢခိၣ်သ့ၣ်အသိး ကဲဒံးဒၣ်လၢ ဟီၣ်ခိၣ်ကလီႇ ဟီၣ်ခိၣ်သဘျ့လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
“တၢ်ပၢဘၣ်တၢ်အံၤ ဒူသ၀ီတၢ်ပၢဘၣ်ဟီၣ်ခိၣ်အတၢ်သိၣ်တၢ်သီအံၤ ပၢဘၣ်ထဲလဲၣ်န့ၣ် အိၣ်၀ဲဒၣ်လီၤႉ ဘၣ်ဆၣ်သနာ်က့ တကီၢ်ခါခဲအံၤခဲလၢာ်န့ၣ် မ့ၢ်၀ဲ ဟီၣ်ခိၣ်ကလီႇ ဟီၣ်ခိၣ်သဘျ့လီၤႉ ဒ်သိးထံဖိကီၢ်ဖိသူၣ်ကမုာ်သးကမုာ်အဂီၢ် ဒိးသန့ၤထီၣ်အသးလၢတၢ်အိၣ်သးအဖီခိၣ်လီၤမီၤႉ တၢ်အံၤ မ့မ့ၢ်လၢယၤန့ၣ် တၢ်ယဲၢ်နံၣ်မူဒါအံၤ ဆိကမိၣ်ဃာ်လၢကမၤလီၤ” အဂ့ၢ်န့ၣ် စီၤခရံာ်တိၤဖၤ စံး၀ဲန့ၣ် လီၤႉ
လၢန့ၣ်အမဲာ်ညါ လၢလီၢ်က၀ီၤအပူၤ ဒ်သိးမုၢ်ကျိၤ၀ဲၤကွာ်တၢ်မၤတဖၣ်ကလဲၤထီၣ်လဲၤထီအဂီၢ် ကမၤဟ့ၣ်၀ဲဒီး လၢအ၀ဲတကပၤ ဟ့ၣ်ပာ်၀ဲတၢ်အၢၣ်လီၤဒီး ကညီကီၢ်စဲၣ် ကီၢ်ဆၣ် ၇ ဘ့ၣ်လၢာ်အပူၤ ဘျီၣ်ဒိၣ်ခၢၣ်စးတဖၣ် ကီၢ်ဆၣ်တၢ်လိၣ်ဘၣ်သ့ၣ်တဖၣ်ကတၢၣ်ပီၣ်တဲသကိးဒီး မ့ၢ်မၤဟ့ၣ်၀ဲလၢဘျီၣ်ဒိၣ်အပူၤန့ၣ် ထံကီၢ်ဒီတဘ့ၣ် ကလဲၤထီၣ်လဲၤထီ၀ဲလီၤအဂ့ၢ်န့ၣ် စံး၀ဲန့ၣ်လီၤႉ
သၣ်တီၣ်ကၠံကီၢ်ဆၣ်အံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢႇ တီအူကီၢ်ရ့ၣ်တၢ်ပၢဟီၣ်က၀ီၤတဖၣ်စ့ၢ်ကီးအိၣ်၀ဲဒီး ဒ်သိးဟီၣ်ခိၣ်ကပံာ်တၢ်ဂ့ၢ်တဖၣ်ဒီး လီၢ်က၀ီၤတၢ်လဲၤတၢ်က့ၤတၢ်ဆဲးကျိးကဂ့ၤထီၣ်အဂီၢ် တၢ်ကရၢကရိလၢအဘၣ်ထွဲတဖၣ် မ့ၢ်ပာ်ဖှိၣ်မၤသကိးတၢ်န့ၣ် ကတုၤထီၣ်ထီၣ်ဘးဒိၣ်၀ဲအဂ့ၢ်န့ၣ် လီၢ်က၀ီၤဖိတဖၣ် စံး၀ဲန့ၣ်လီၤႉ
လၢန့ၣ်အမဲာ်ညါ သၣ်တီၣ်ကၠံလီၢ်က၀ီၤဖိတဖၣ် ဒ်သိးကပၢဘၣ်ဟီၣ်ခိၣ်ကပံာ်အဂီၢ် ပဒိၣ်ပာ်ပနီၣ်၀ဲ လံာ်အဒိ(၇)တအိၣ်ဘၣ်ဆၣ် ဒူသ၀ီတနီၤန့ၣ် ဒ်တၢ်ကတီၤပၢၤဃာ်ဟီၣ်ခိၣ်ကပံာ်ကမံးတံာ် ပာ်ပနီၣ်ဃာ်၀ဲ တၢ်ပၢဘၣ်စံာ်လီၢ်ခုးလီၢ်ႇဟီၣ်ခိၣ်ကပံာ်လီၢ်အသိး လူၤပိာ်မၤထွဲ၀ဲအဂ့ၢ်န့ၣ် လီၢ်က၀ီၤဖိတဖၣ် စံး၀ဲန့ၣ်လီၤႉ
ဘၣ်ဆၣ် ဟီၣ်ခိၣ်ကပံာ်လၢလီၢ်က၀ီၤဖိပၢဘၣ်ဒ်မိၢ်လုၢ်ပၢ်လုၢ်အသိးတဖၣ်န့ၣ် ထံကီၢ်ပဒိၣ် ပာ်ပနီၣ်၀ဲလၢအမ့ၢ်သ့ၣ်ၦၢ်ႇ ဟီၣ်ခိၣ်ကလီႇ ဟီၣ်ခိၣ်သဘျ့တဖၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
“ပ၀ဲပျ့ၤခံသ၀ီန့ၣ် တၢ်ပၢ၀ဲဒၣ်ဟီၣ်ခိၣ်လီၢ်အံၤ တဂၤဒီးတဂၤအဘၢၣ်စၢၤန့ၣ် မၤဃာ်တၢ်ပနီၣ်ဒီး သ့ၣ်ထူၣ်ႇ လၢၢ်ႇ ထံတိၤဖိတဖၣ်လီၤႉ ၦၤအါဒၣ်တက့ၢ်န့ၣ်လူၤပိာ်မၤထွဲ၀ဲဒ် သ၀ီဟီၣ်ခိၣ်ကပံာ်တၢ်ဘျၢသဲစး မိၢ်လုၢ်ပၢ်လၢ်အသိးလီၤႉ သ၀ီခံမံးလာ်၀း၀းန့ၣ် တၢ်တဘၣ်ဖဲးအီၣ်ခုးမၤအီၣ်သံၣ်ဘၣ်” အဂ့ၢ်န့ၣ် လီၢ်က၀ီၤဖိတဂၤ စံး၀ဲန့ၣ်လီၤႉ
စီၤခရံာ်တိၤဖၤအံၤ ဖဲအပူၤကွံာ် ၂၀၂၀ တၢ်ဃုထၢအံၤန့ၣ် သၣ်တီၣ်ကၠံႇ ကီၢ်စဲၣ်ဘျီၣ်ဒိၣ်တၢ်ဖးဟီၣ်က၀ီၤ နီၢ်ဂံၢ် ၁ န့ၣ် မၤနၢၤတၢ်ဖးဒီး ဖဲ ၂၀၁၀ တၢ်ဃုထၢအခါစ့ၢ်ကီး မၤနၢၤ၀ဲတၢ်ဖးဖဲဟီၣ်က၀ီၤအ၀ဲအံၤန့ၣ်လီၤႉ စးထီၣ်ဖဲ ၂၀၁၁ တုၤလၢ ၂၀၁၆ နံၣ်န့ၣ် ဟံးတ့ၢ်မူဒါဒ်ကီၢ်စဲၣ်ကိတိာ်အသိးဒီး ဖဲ ၂၀၁၅ တၢ်ဃုထၢအခါရှူ၀ဲဒၣ် တၢ်ဖးဒီး က့ၤမၤနၢၤကဒီး၀ဲတၢ်ဃုထၢခဲအံၤအသီတဘျီကဒီးန့ၣ်လီၤႉ
