Home တၢ်ကစီၣ် ချၢၣ်လွံၢ်ထူၣ် တၢ်ဒုးကဲထီၣ်အဃိ လီၢ်က၀ီၤကမျၢၢ် ၅၀၀ ဘျဲၣ် ဘၣ်စံၣ်မှံဟးဖျိး

ချၢၣ်လွံၢ်ထူၣ် တၢ်ဒုးကဲထီၣ်အဃိ လီၢ်က၀ီၤကမျၢၢ် ၅၀၀ ဘျဲၣ် ဘၣ်စံၣ်မှံဟးဖျိး

339
0

လါယနူၤအါရံၤ ၁၃ သီႇ ၂၀၂၁ နံၣ်ႇ နီၢ်အ့ပၠိ

ဖဲတလါညါအံၤ လါယနူၤအါံၤ ၁၁ သီအနံၤန့ၣ် ချၢၣ်လွံၢ်ထူၣ်ကီၢ်ရ့ၣ်အပူၤ ပယီၤသုးမုၢ်ဒိၣ်ဒီး ကညီဒီကလုာ်ဂၢၤသးကရၢ(KNDO)တဖၣ်အဘၢၣ်စၢၤ တၢ်ခးလိာ်သးကဲထီၣ်အဃိ လီၢ်က၀ီၤၦၤကမျၢၢ် ၅၀၀ ဘျဲၣ် ဘၣ်စံၣ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ် (သုးက့=၃) လၢၢ်ဒိၣ်ကီၢ်ဆၣ်တၢ်ပၢဟီၣ်က၀ီၤအပူၤ ဖဲလါယနူၤအါရံၤ ၁၁ သီ ဂီၤခီအဆၢကတီၢ်န့ၣ် ပယီၤသုး သုးခိၣ် ရှါလ့ တီခိၣ်ရိၣ်မဲ၀ဲ(ခလရ=၅၇)သုးရ့ၣ် ဒီး ကညီဒီကလုာ်ဂၢၤသးကရၢ -KNDO သုးရ့ၣ်(၃)တဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲခံဘျီအဃိ သ၀ီတဖၣ်လၢအမ့ၢ် ခဲဒ့သ၀ီကရူၢ်ႇ တကီၤဒဲသ၀ီႇ ပကီၤခံသ၀ီဒီး ပကီၤထၣ်သ၀ီဖိ ၅၈၈ ဂၤ ဒီး ဟံၣ်ခိၣ် အဖျၢၣ် ၈၀ ဃၣ်ဃၣ် ဘၣ်ဃ့ၢ်မှံဟးဖျိး၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ် တၢ်ကစီၣ်ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါ ခီဖျိတၢ်ခးလိာ်အသးကဲထီၣ်အံၤအဃိ ကၠိဖိလၢအမၤလိတၢ်လၢဒူသ၀ီဖဲန့ၣ်အပူၤတဖၣ် ဃုာ်ဒီးသရၣ်သရၣ်မုၣ်တဖၣ်စ့ၢ်ကီး ပျံၤတၢ်ဖုးတၢ်ဒီးစံၣ်မှံဟးဖျိးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိး ဖဲအပူၤကွံာ် လါဒံၣ်စ့ဘၢၣ်အတီၢ်ပူၤစ့ၢ်ကီး မုၢ်တြီၢ်ကီၢ်ရ့ၣ်အပူၤ ကညီဒီ ကလုာ်စၢဖှိၣ်ကရၢ -KNU သုးက့(၅)စုဒုၣ်တီၤအဖီလာ်သုးရ့ၣ် ဒီးသုးမုၢ်ဒိၣ်တဖၣ်အဘၢၣ်စၢၤ ခီဖျိလၢသုးတၢ်ဖ့ၣ်ဆၢအိၣ်ထီၣ်အဃိ လီၢ်က၀ီၤသ၀ီဖိ ၃ႇ၀၀၀ ဘျဲၣ် ဘၣ်ဃ့ၢ်မှံဟးဖျိးအိၣ်၀ဲန့ၣ်လီၤႉ

ပဒိၣ်ႇသုးမုၢ်ဒိၣ် ဒီး KNU တဖၣ်အဘၢၣ်စၢၤ ဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခး(NCA)လံာ်ဃံး ဃံာ်အိၣ်၀ဲ(၅)နံၣ်ဘျဲၣ်လံဘၣ်ဆၣ် တုၤလၢခဲအံၤတစုဘၣ်ထွဲသုးတၢ်ဂ့ၢ်တဖၣ်အံၤ တၢၣ်ပီၣ်တဲသကိး၀ဲတန့ၢ်ဒံး ဘၣ်အဃိ တၢ်ဖီလာ်သုးတဖၣ်အဘၢၣ်စၢၤတၢ်ခးလိာ်သးကဲထီၣ်အိၣ်၀ဲတလီၢ်လီၢ် တုၤလၢခဲအံၤတစုန့ၣ်လီၤႉ