Home တၢ်ကစီၣ် ဒ်သိးတၢ်နာ်န့ၢ်လိာ်သးသုတလီၤစှၤတဂ့ၤအဂီၢ် အလီၢ်အိၣ်လၢကဘၣ်ထံၣ်လိာ်တၢၣ်ပီၣ်တဲသကိး၀ဲလံအဂ့ၢ်န့ၣ် KNU စံး၀ဲ

ဒ်သိးတၢ်နာ်န့ၢ်လိာ်သးသုတလီၤစှၤတဂ့ၤအဂီၢ် အလီၢ်အိၣ်လၢကဘၣ်ထံၣ်လိာ်တၢၣ်ပီၣ်တဲသကိး၀ဲလံအဂ့ၢ်န့ၣ် KNU စံး၀ဲ

451
0

လါယနူၤအါရံၤ ၁၁ သီႇ ၂၀၂၁ နံၣ်ႇ စးအဲၣ်ဆူ

KNU- ကညီဒီကလုာ်စၢဖှိၣ်ကရၢဒီး ကီၢ်ပယီၤသုးမုၢ်ဒိၣ်တဖၣ်အဘၢၣ်စၢၤ ဒ်သိးသုးတၢ်ဖီလာ် တၢ်ဘၣ်သဂၢၢ်ခးလိာ်သးသုတဆဲးကဲထီၣ်လၢၤတဂ့ၤအဂီၢ်ဒီး တၢ်နာ်န့ၢ်လိာ်သးသုတဆဲးဟးဂီၤတဂ့ၤအဂီၢ် အလီၢ်အိၣ်လၢခံခီခံကပၤ ကဘၣ်ထံၣ်လိာ်တၢၣ်ပီၣ်တဲသကိးလိာ်သးလိၣ်၀ဲအဂ့ၢ်န့ၣ် KNU လီၢ်ခၢၣ်သး ထုးထီၣ်ရၤလီၤ၀ဲတၢ်ကစီၣ် ဖဲလါယနူၤအါရံၤ ၈ သီအနံၤန့ၣ်လီၤႉ

တကီၢ်ခါတၢ်ကဲထီၣ်သးလၢ တၢ်ဖီလာ်တၢ်ဘၣ်သဂၢၢ်ခးလိာ်သးတဖၣ်အံၤ အပူၤကွံာ်တၢ် ကဆဲးတၢၣ်ပီၣ်တဲသကိး၀ဲအဂီၢ် သုးတၢ်ဂ့ၢ်လၢခံခီခံကပၤတူၢ်လိာ်သးလီၤပလိာ်၀ဲတဖၣ်အံၤ တၢ်တၢၣ်ပီၣ်တဲသကိး၀ဲတန့ၢ်ဒံး၀ဲဘၣ်ဒီး တၢ်မုာ်တၢ်ခုၣ်တၢ်မၤအကျဲအဖီခိၣ် ကမျၢၢ်တဖၣ်တၢ် နာ်အီၣ်လီၤစှၤ၀ဲဒၣ်အသိး တၢ်ဖီလာ်တၢ်ဘၣ်သဂၢၢ်ခးလိာ်သးတဖၣ် ဘၣ်ဟဲကဲထီၣ်၀ဲလီၤအဂ့ၢ်န့ၣ် KNU စံး၀ဲန့ၣ်လီၤႉ

KNU နဲၣ်ရွဲၣ်ခိၣ်ကျၢၢ် ပဒိၣ်စီၤတၢ်ဒိၣ်မူ စံး၀ဲလၢ “ပ၀ဲသ့ၣ်တဖၣ်ပဆဲးလီၤတ့ၢ်ဃာ် NCA လီၤႉ ဆဲးလီၤစ့ၢ် ကီး Bilateral ဘၣ်ဆၣ် တၢ်လၢပသးလီၤပလိာ်၀ဲလၢ တၢ်ဂ့ၢ်လၢကဆဲးတၢၣ်ပီၣ်တဲသကိးတဖၣ်အံၤ တဟဲကဲထီၣ်၀ဲနီတမံၤဘၣ်အဃိ ခဲလၢာ်န့ၣ်အိၣ်၀ဲဂၢၢ်ဒ်အံၤဒီး လၢတၢ်ဖီလာ်စ့ၢ်ကီး ပယီၤသုးမၤအါထီၣ်အဂံၢ်အဘါ ဘၢၣ်၀ဲကျဲတဖၣ်ဆဲးမၤ၀ဲဒၣ်ထီဘိလီၤႉ တၢ်အံၤဒ်သိးဘှါရှဲကန့ၢ်အဂီၢ် ဘၣ်ထွဲတၢ်တၢၣ်ပီၣ်တဲသကိးသုးတၢ်ဂ့ၢ်အံၤ ဂုာ်ကျဲးစၢးတုၤ၀ဲလၢ ၂၀၂၀ နံၣ်ဒီတတီၢ်ဘၣ်ဆၣ် တုၤလၢခဲအံၤတစု တၢ်တၢၣ်ပီၣ်တဲသကိးအံၤတကဲထီၣ်ဒံးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါ ဒ်သိးတၢ်ကတၢၣ်ပီၣ်တဲသကိးဘၣ်ထွဲသုးတၢ်ဂ့ၢ်တဖၣ်ကန့ၢ်အဂီၢ် မၤန့ၢ်၀ဲတၢ်သး လီၤပလိာ်အိၣ်တုၤ၀ဲလၢခံဘျီညါအဂ့ၢ်ဒီး တကီၢ်ခါတၢ်ဂ့ၢ်ကီသ့ၣ်တဖၣ်အံၤ သုတကဲထီၣ်သးလၢၤတဂ့ၤအဂီၢ် ဆှၢထီၣ်လံာ်ဆူ သုးခိၣ်ကျၢၢ်စိ ယၤပၠ့ၣ်တီခိၣ်ရိၣ်မဲ၀ဲ သုးမုၢ်ဒိၣ် တၢ်ထိၣ်ဃူထိၣ်ဖိးခၢၣ်စးကရူၢ်ဒီး ကလုာ်တၢ်က့ၤဘၣ်ဂီၢ်ဖိးဒ့ဒီးတၢ်မုာ်တၢ်ခုၣ်လီၢ်ခၢၣ်သး၀ဲၤကျိၤ(NRPC)အအိၣ်အိၣ်၀ဲခံဘျီညါန့ၣ်လီၤႉ ဖဲန့ၣ် NRPC တကပၤက့ၤစံးဆၢကဒါ၀ဲဘၣ်ဆၣ် မ့မ့ၢ်လၢသုးမုၢ်ဒိၣ်တကပၤ တုၤလၢခဲအံၤတစု က့ၤစံးဆၢကဒါတၢ်တအိၣ်နီတမံၤဒံးဘၣ်အဂ့ၢ်န့ၣ် ပဒိၣ်စီၤတၢ်ဒိၣ်မူ စံးအါထီၣ်၀ဲန့ၣ်လီၤႉ

တကီၢ်ခါတၢ်ကဲထီၣ်သးလၢ KNU တၢ်ပၢဟီၣ်က၀ီၤတဖၣ်လၢအမ့ၢ် မုၢ်တြီၢ်ကီၢ်ရ့ၣ် ဒီး ချၢၣ်လွံၢ်ထူၣ်ကီၢ်ရ့ၣ်အပူၤ ဒ်သိးပယီၤသုးကထုးကွံာ်သုးကလၢၤတဖၣ်အဂီၢ် လီၢ်က၀ီၤကမျၢၢ်တဖၣ် ပာ်ဖျါထီၣ်တၢ်ဘၣ်သးတဖၣ်အံၤစ့ၢ်ကီး နၢ်ပၢၢ်တူၢ်လိာ်စ့ၢ်ကီး၀ဲအဂ့ၢ်န့ၣ် KNU လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ဒ်န့ၣ်အသိး ဒ်သိးပယီၤသုးကထုးကွံာ်သုးကလၢၤတဖၣ်အဂီၢ် လီၢ်က၀ီၤဖိတဖၣ်ဃ့ထီၣ်၀ဲတၢ်ဂ့ၢ်တဖၣ်အံၤ သုးမုၢ်ဒိၣ်တကပၤပာ်လုၢ်ပာ်ၦ့ၤလူၤပိာ်မၤထွဲ၀ဲမ့ၢ်တအိၣ်ဘၣ်န့ၣ် လၢ ကဘၣ်ဒီတဒၢ၀ဲကမျၢၢ်အတၢ်လုၢ်အီၣ်နီၢ်ခိသးသမူဒီးတၢ်ဘံၣ်တၢ်ဘၢတဖၣ်အဂီၢ် KNU သုးက့ (၅)အံၤ အမူဒါအိၣ်၀ဲအသိး ကဆဲးမၤဟံးထီၣ်ဖီၣ်ထီၣ်၀ဲလီၤအဂ့ၢ်န့ၣ် ထုးထီၣ်၀ဲလံာ်ဟ့ၣ်ပလီၢ် ဖဲလါယနူၤအါရံၤ ၇ သီအနံၤန့ၣ်လီၤႉ

ဖဲအပူၤကွံာ် လါဒံၣ်စ့ဘၢၣ် ၁ သီအနံၤန့ၣ် ပယီၤသုးကလၢၤလၢအအိၣ် ဖဲလီၢ်က၀ီၤကမျၢၢ်ဒူသ၀ီအပူၤတဖၣ်အံၤ ဒ်သိးကထုးကွံာ်သုးကလၢၤဖဲ ၂၀၂၀ နံၣ်လၢာ်တုၤအ၀ံၤတစုအဂီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA လီၢ်ခၢၣ်သး ထုးထီၣ်ရၤလီၤဃ့ထီၣ်၀ဲ၀ံၤအလီၢ်ခံတသီ ဖဲစးထီၣ်ဖဲလါဒံၣ်စ့ဘၢၣ် ၂ သီအနံၤန့ၣ် KNU သုးက့(၅)ဟီၣ်က၀ီၤႇ မဲၤ၀့ၤဟီၣ်က၀ီၤအပူၤ ကီၢ်ပယီၤသုးမုၢ်ဒိၣ် ဒီး KNLA သုးကရူၢ်တဖၣ်အဘၢၣ်စၢၤ တၢ်ခးလိာ်သးတဖၣ်စးထီၣ်ကဲထီၣ်၀ဲန့ၣ်လီၤႉ

ဒ်န့ၣ်အသိး ဖဲအပူၤကွံာ် လါဒံၣ်စ့ဘၢၣ် ၃၀ သီအနံၤဒီး လါယနူၤအါရံၤ ၆ သီအနံၤန့ၣ် ဒ်သိးပယီၤကထုးကွံာ်အသုးကလၢၤတဖၣ်အဂီၢ် ဟီၣ်က၀ီၤဖဲန့ၣ်အပူၤ လီၢ်က၀ီၤကမျၢၢ်ဖိလၢအကလးတဖၣ် ပာ်ဖျါထီၣ်စ့ၢ်ကီးတၢ်ဘၣ်သးအိၣ်၀ဲခံဘျီဃၣ်ဃၣ်ညါန့ၣ်လီၤႉ