စီၤဘးအူကၠံတၢ်ဂီၤစိးပျၤတၢ်ဂ့ၢ် ကဂုာ်ကျဲးစၢးဒုးအိၣ်ထီၣ်ကမံးတံာ်တဒူၣ်

လါယနူၤအါရံၤ ၂၇ သီႇ ၂၀၂၁ နံၣ်ႇ စးဖါရှီ

ဖဲအပူၤကွံာ် လါယနူၤအါရံၤထီၣ်သီအဆၢကတီၢ် ဘၣ်ထွဲဒီးတၢ်ထုးလီၤကွံာ် ကညီဒီကလုာ်ခိၣ်နၢ် စီၤဘးအူကၠံ တၢ်ဂီၤစိးပျၤ ဖဲဘဲကယဲးသ၀ီပူၤတၢ်ဂ့ၢ်အံၤ ဒ်သိးတၢ်ကက့ၤပာ်ထီၣ်ကဒါကန့ၢ်အဂီၢ် ကဂုာ်ကျဲးစၢးဒုးအိၣ်ထီၣ်၀ဲကမံးတံာ်တဒူၣ်လၢအပၣ်ဃုာ်ဒီး ကညီတၢ်ကရၢကရိတဖၣ်စုာ်စုာ်အဂ့ၢ်န့ၣ် သ့ၣ်ညါဘၣ်လၢၦၤတီခိၣ်ရိၣ်မဲဟူးဂဲၤတၢ်ဖိတဖၣ်အအိၣ်န့ၣ်လီၤႉ

ဖဲမဟါ လါယနူၤအါရံၤ ၂၆ သီအနံၤ ဒ်သိးတၢ်ကက့ၤပာ်ထီၣ်ကဒါစီၤဘးအူကၠံတၢ်ဂီၤစိးပျၤကန့ၢ်အဂီၢ် ကၤကၠံဒီၣ်ကီၢ်ဆၣ် ကွ့ယါကၠံသ၀ီႇ ပီၤတီၤမူၤကၠိ တၢ်ကွၢ်ကီကျိၣ်အလီၢ် တၢ်မၤ၀ဲဒၣ်တၢ်အိၣ်ဖှိၣ်တခါ၀ံၤ သးလီၤပလိာ်ဆၢတဲာ်လီၤ၀ဲဒၣ်န့ၣ်လီၤႉ

ၦၤလၢအဟဲထီၣ်တၢ်အိၣ်ဖှိၣ် ကညီဒီကလုာ်တ၀ၢကရူၢ် ၦၤဟ့ၣ်ကူၣ်တၢ်ဖိ မါသဲၣ်နဲၤအူ စံး၀ဲလၢ “ဒ်သိးတၢ်ကက့ၤပာ်ထီၣ်ကဒါတၢ်ဂီၤစိးပျၤကန့ၢ်အဂီၢ် အဒိ ထံရူၢ်ကီၢ်သဲးပၣ်တံၣ်တဖၣ်ႇသးစၢ်တဖၣ်ႇ ၦၤဂ့ၢ်၀ီတၢ်ကရၢကရိတဖၣ်ႇလံာ်လဲၢ်တၢ်ဆဲးတၢ်လၤခဲလၢာ်မီၤနီၤႉ တၢ်ဂ့ၢ်တၢ်၀ီ၀ဲအံၤ ဒ်သိးၦၤလၢအပၣ်ဃုာ်သ့ကနုာ်လီၤပၣ်ဃုာ်အဂီၢ် ကကွဲမုာ်၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ကညီဒီကလုာ်ခိၣ်နၢ် စီၤဘးအူကၠံ အိၣ်ဖျဲၣ်ထီၣ်အလီၢ် ဘဲကယဲးသ၀ီအပူၤ တၢ်ပာ်ထီၣ်၀ဲဒၣ် စီၤဘးအူကၠံတၢ်ဂီၤစိးပျၤအံၤ ခီဖျိလၢလီၢ်က၀ီၤၦၤဘၣ်မူဘၣ်ဒါတဖၣ်ဟ့ၣ်၀ဲတၢ်ဆီၣ်သနံးအဃိ ဖဲအပူၤကွံာ် လါယနူၤအါရံၤ ၃ သီ ဟါခီအဆၢကတီၢ်န့ၣ် ဘၣ်တၢ်ထုးလီၤကွံာ်အီၤန့ၣ်လီၤႉ

တၢ်မၤ၀ဲတၢ်အိၣ်ဖှိၣ်လၢဘျီ၀ဲအံၤအပူၤ ကညီထံရူၢ်ကီၢ်သဲးပၣ်တံၣ်တဖၣ်ႇ ကညီထံရူၢ်ကီၢ်သဲး ပၣ်တံၣ်လၢအဂၤတဖၣ်ႇ အ့ၣ်ယၣ်၀တံၣ်ကညီသးစၢ်တဖၣ်ႇ ၦၤဂ့ၢ်၀ီကရူၢ်ကရၢတဖၣ်ႇ လံာ်လဲၢ်တၢ်ဆဲးတၢ်လၤကမံးတံာ်ဖိတဖၣ်ႇ ကညီပီၢ်ရီဖိတဖၣ် ပၣ်ဃုာ်ဟဲထီၣ်တၢၣ်ပီၣ်တဲသကိး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်အိၣ်ဖှိၣ်ဘျီ၀ဲအံၤ ဒ်သိးတၢ်ကက့ၤပာ်ထီၣ်ကဒါစီၤဘးအူကၠံတၢ်ဂီၤစိးပျၤကန့ၢ်အဂီၢ် မ့ၢ်တၢ်ကိးပတြီာ်ဆိ၀ဲတၢ်အိၣ်ဖှိၣ်ဒီး တၢၣ်ပီၣ်တဲသကိး၀ဲန့ၣ်လီၤႉ တၢ်အိၣ်ဖှိၣ်လၢခံတဘျီတၢ်တၢၣ်ပီၣ်တဲသကိးမ့ၢ်၀ံၤမး ဘၣ်ထွဲဒီးတၢ်ကဒုးအိၣ်ထီၣ်ကမံးတံာ်တၢ်ဂ့ၢ်ဒီး တၢ်ဖံးတၢ်မၤအကျဲလၢကဘၣ်ဟံးထီၣ်ဖီၣ်ထီၣ်၀ဲတဖၣ် ဒီးတၢ်ဖံးတၢ်မၤမူဒါတဖၣ်အံၤ ကဆၢတဲာ်ဒုးအိၣ်ထီၣ်၀ဲလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ