လါယနူၤအါရံၤ ၂၀ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲမဟါ လါယနူၤအါရံၤ ၁၉ သီအနံၤ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် (သုးက့=၃) ဒီး မုၢ်တြီၢ်ကီၢ်ရ့ၣ် (သုးက့=၅)အဘၢၣ်စၢၤ တၢ်ခးသံကဒီး၀ဲလီၢ်က၀ီၤကမျၢၢ် ၂ ဂၤ ကဲထီၣ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ခးသံ ကမျၢၢ် ၂ ဂၤ တၢ်ဂ့ၢ်ကဲထီၣ်သးအံၤအဖီခိၣ် ပယီၤသုးမုၢ်ဒိၣ် ဒီး ကညီဒီကလုာ်စၢဖှိၣ်ကရၢ -KNU ခံဒူၣ်လၢာ် ထုးထီၣ်ပာ်ဖျါလိာ်ဘၢလိာ်ကွီၢ်လိာ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲမဟါလါယနူၤအါရံၤ ၁၉ သီအနံၤ ဒ်ပယီၤသုးတၢ်ဘိးဘၣ်ရၤလီၤတၢ်ကစီၣ်ကရူၢ် ထုးထီၣ်ပာ်ဖျါ၀ဲအသိးန့ၣ် လၢၢ်ဒိၣ်ကီၢ်ဆၣ်ႇ မုၢ်သဲၣ်သ၀ီမုၢ်ထီၣ်တကပၤ ဘၣ်ဖဲမုၢ်ဃ့ၢ်လီၤ ၁ နၣ်ရံၣ် ၁၅ မံးနံးအဆၢကတီၢ် နၢ်ဟူ၀ဲဒၣ်ကျိသီၣ်အဃိ ဖဲလဲၤသမံသမိး၀ဲအဆၢကတီၢ်န့ၣ် လၢအယံၤ၀ဲဒီးသုးကလၢၤ(၁၂၀၀) မံထၢၣ်ဃၣ်ဃၣ်အံၤ ထံၣ်၀ဲလၢလီၢ်က၀ီၤကမျၢၢ် ၂ ဂၤ သံ၀ဲဒၣ်ဒီးကျိဖိအဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါ ကမျၢၢ် ၂ ဂၤအံၤ အိၣ်၀ဲဒၣ်လၢ လၢၢ်ဒိၣ်ကီၢ်ဆၣ်ႇ တီၤငူၤတါ က၀ီၤဒ့ အူတာ်(၅၄)နံၣ် ဒီး အူထိစိ(၄၂)နံၣ်ဒီး ၦၤ ၂ ဂၤအံၤ မ့ၢ်၀ဲဒၣ် KNU သုးက့(၅) ကမျၢၢ်သုးရ့ၣ်(၁)ကရူၢ် ခးသံ၀ဲဒၣ်အဂ့ၢ်ဒီး ဟံးဆူၣ်န့ၢ်၀ဲစ့လၢၦၤသံခံဂၤအအိၣ်စ့ၢ်ကီးအဂ့ၢ်န့ၣ် ပယီၤသုးမုၢ်ဒိၣ်တၢ်ကစီၣ်အပူၤ ပာ်ဖျါ၀ဲန့ၣ်လီၤႉ
ဘၣ်ဆၣ် ဒ် KNU တကပၤ ထုးထီၣ်ပာ်ဖျါ၀ဲအသိး ဖဲမဟါ ၁၉ သီ ဂီၤခီ ၇ နၣ်ရံၣ်အဆၢကတီၢ်န့ၣ် KNU သုးက့(၃)ဒီး သုးက့(၅)အဘၢၣ်စၢၤ ဖဲကစၢၢ်တကွံတၢ်လီၢ်အကပိၤကပၤန့ၣ် ခီဖျိလၢပယီၤသုးခးလီၤကျိအဃိ အူတာ်(၅၇)နံၣ် ဒီး ကၠံၣ်ဖိ(၄၂)နံၣ် ကမျၢၢ်ခံဂၤဘၣ်သံ၀ဲဒၣ်လီၤအဂ့ၢ်န့ၣ် ပာ်ဖျါ၀ဲန့ၣ််လီၤႉ
KNU သုးက့(၅)ၦၤကတိၤတၢ်ပၢ ပဒိၣ်မါမါ စံး၀ဲလၢ“ယအဲၣ်ဒိးတဲန့ၣ် သုးက့(၅)အံၤ ဒ်ပယီၤသုးမုၢ်ဒိၣ်ထုးထီၣ်ပာ်ဖျါ၀ဲအသိးန့ၣ် ကမျၢၢ်သုး သုးရ့ၣ်(၁)န့ၣ်တအိၣ်ဘၣ်ႉ တၢ်အံၤမ့ၢ်အလံၣ်အီၣ်လီအီၣ်၀ဲလီၤန့ၣ်ဖျါ၀ဲလီၤႉ ပသုးရ့ၣ်ဒ်အံၤတအိၣ်နီတဘျီဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
လၢန့ၣ်အမဲာ်ညါ တၢ်လီၢ်လၢကမျၢၢ်ခံဂၤသံအလီၢ်န့ၣ် အိၣ်၀ဲဒၣ်ထဲပယီၤသုးကလၢၤတဖၣ်အဂ့ၢ်ဒီး ပယီၤသုး ခီၣ်ချ့သုးရ့ၣ်(ခမရ=၅၇)အံၤ ဖဲလါယနူၤအါရံၤ ၁၆ သီအနံၤန့ၣ် ဟ့ၣ်ပလီၢ်သ၀ီဖိတဖၣ်လၢတဘၣ်ဟး ထီၣ်သ၀ီချၢဘၣ်ႉ မ့ၢ်ထံၣ်န့ၢ်၀ဲသ၀ီဖိဟးထီၣ်လၢသ၀ီချၢအါန့ၢ်အကဲး(၅၀)န့ၣ် ဒ်အ၀ဲသ့ၣ်တၢ်ဘံၣ်တၢ်ဘၢအဂီၢ် ကခး၀ဲဒၣ်လၢကျိလီၤန့ၣ် ကိးဟ့ၣ်ပလီၢ်စံးဘၣ်၀ဲ မုၢ်သဲၣ်သ၀ီၦၤဘၣ်မူဘၣ်ဒါ စီၤစ့ခ့ၢ်သီႇစီၤခ့ၤသါမူႇစီၤဂ့ၤန့ၢ်မူဒီးစီၤဖါန့ၢ်သ့ၣ်တဖၣ်အဂ့ၢ်န့ၣ် KNU တၢ်ဘိးဘၣ်ရၤလီၤ၀ဲၤကျိၤ သူလ့ၤတၢ်ကစီၤအပူၤ ပာ်ဖျါ၀ဲန့ၣ်လီၤႉ
တကီၢ်ခါ ဃဲဒၢသ၀ီ လီၢ်က၀ီၤဖိ စီၤ၀ါဒိၣ် လၢဘၣ်ဃ့ၢ်ပူၤဖျဲးအသးအံၤ စံး၀ဲလၢ“ပယီၤသုးခိၣ်တဂၤတဲ ဃာ်၀ဲအိၣ်၀ဲလီၤႉ မ့ၢ်လဲၤလၢအ၀ဲသ့ၣ်တၢ်လီၢ်အကပိၤကပၤန့ၣ် ကခး၀ဲခဲလၢာ်န့ၣ်တဲဃာ်၀ဲလီၤႉ ခဲအံၤ ပသ၀ီဖိတဖၣ်လဲၤတဘူၣ်နီတပူၤလၢၤဘၣ်ႉ မုၢ်သဲၣ်သ၀ီလၢပလဲၤဃုအီၣ် ဟုသးႇသိႇအံသၣ်ႇမိၢ်ဂံာ်သၣ်အကျဲန့ၣ် ခဲအံၤတပျဲ၀ဲလၢာ်လၢၦၤမုၢ်သဲၣ်သ၀ီဖိန့ၣ် တဘၣ်ထံၣ်လိာ်သးလၢၤဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ် ဖဲမဟါန့ၣ်လီၤႉ
တကီၢ်ခါ KNU သုးက့(၅)ႇ မုၢ်တြီၢ်(ဖၣ်ပူၣ်)ဟီၣ်က၀ီၤ ဒီး သုးက့(၃) ချၢၣ်လွံၢ်ထူၣ်ဟီၣ်က၀ီၤတဖၣ်အပူၤ ပယီၤသုးမုၢ်ဒိၣ်ဒီး ခ့ၣ်အဲၣ်ယူၣ်အဘၢၣ်စၢၤတၢ်ဒုးဆဲးကဲထီၣ်၀ဲဒၣ်အဆၢတတဲာ်ဘၣ်အဃိ လီၢ်က၀ီၤသ၀ီဖိလၢအကထိ ဘၣ်စံၣ်မှံဟးဖျိအိၣ်၀ဲအဖၢမုၢ်ဒံးန့ၣ်လီၤႉ
ဒ်န့ၣ်အသိး ဖဲအပူၤကွံာ်တနွံအတီၢ်ပူၤစ့ၢ်ကီး မုၢ်တြီၢ်လီၢ်က၀ီၤ သ၀ီသးၦၢ်တဂၤဘၣ်၀ဲဒီးကျိဖးဒိၣ်အဃိသံ၀ဲဒၣ်အသိး ဖိသၣ်(၁၂)နံၣ်တဂၤစ့ၢ်ကီး အခိၣ်သၣ်ဃံဘၣ်ဒိ၀ဲဒီးကျိနးနးကလဲာ်ဒီး ဖဲမဟါ လၢၢ်ဒိၣ်လီၢ်က၀ီၤသ၀ီဖိတဂၤစ့ၢ်ကီး ဘၣ်၀ဲဒၣ်ဒီးကျိဖးဒိၣ်နးနးကလဲာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
