ပယီၤသုးခးကျိဖးဒိၣ်အဃိ လၢၢ်ဒိၣ်လီၢ်က၀ီၤဖိတဂၤဘၣ်ဒိဘၣ်ထံးနးနးကလဲာ်

လါယနူၤအါရံၤ ၂၀ သီႇ ၂၀၂၁ နံၣ်ႇ စးအဲၣ်ဆူ

တကီၢ်ခါ တၢ်ဖ့ၣ်ဆၢကဲထီၣ်သးလၢ ကီၢ်ပယီၤသုးမုၢ်ဒိၣ် ဒီး KNU-ကညီဒီကလုာ်စၢဖှိၣ်ကရၢ လၢၢ်ဒိၣ်ကီၢ်ဆၣ်ႇ သုးက့(၃)ဟီၣ်က၀ီၤႇ ပဲၤကီၤခံသ၀ီအပူၤ လီၢ်က၀ီၤဖိတဂၤ ခီဖျိလၢဘၣ်၀ဲဒၣ်ဒီးသုးမုၢ်ဒိၣ်ကျိဖးဒိၣ်အဃိ ဘၣ်ဒိဘၣ်ထံး၀ဲနးနးကလဲာ်အဂ့ၢ်န့ၣ် ၦၤလၢအအိၣ်ဒီးအီၤတပူၤဃီ စီၤ၀ါဒိၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢၢ်ဒိၣ်ကီၢ်ဆၣ်ႇ ပဲၤကီၤခံသ၀ီဖိ စီၤလၢၢ်ဘီ ၄၁ နံၣ်အံၤ ဖဲအအိၣ်လၢတၢ်ဟးစံၣ်အိၣ်ခူသူၣ်သးအလီၢ်ဒီး ဟဲက့ၤဘုၣ်လီၤဆၣ်ဖိကီၢ်ဖိအဆၣ်လၢအဟံၣ်အဆၢကတီၢ် ခီဖျိလၢပယီၤသုးခးလီၤ၀ဲဒၣ်ကျိဖးဒိၣ်အဃိ ဘၣ်ဒိၣ်ဘၣ်ထံး၀ဲလီၤအဂ့ၢ်န့ၣ် လီၢ်က၀ီၤဖိ စီၤ၀ါဒိၣ် စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ “ဟဲက့ၤလၢသ၀ီပူၤအဃိဘၣ်၀ဲဒၣ်လီၤႉ ဖဲအဘၣ်ဒီးကျိအဆၢကတီၢ်န့ၣ်အိၣ်၀ဲဒၣ်ယၤဒီးအ၀ဲလီၤႉ ပယီၤသုးအံၤခး၀ဲကျိဖးဒိၣ် ၂ ဖျၢၣ် နုာ်လီၤ၀ဲလၢသ၀ီပူၤတဖျၢၣ်လီၤႉ ဘၣ်ဒိ၀ဲအခီၣ်ကံၣ်ဒုၣ်လီၤႉ ဟဲက့ၤယါဘျါလၢၦၢ်ပူၤၦၤစံၣ်အိၣ်ခူသူၣ်အလီၢ်အံၤလီၤႉ သးသမူတၢ်ဘၣ်ယိၣ် ဘၣ်ဘှီအိၣ်ဧါႇတအိၣ်ဧါဒုတသ့ၣ်ညါဘၣ်ႉ လၢသ၀ီပူၤန့ၣ်အဟံၣ်ဖိဃီဖိတဖၣ်တအိၣ်ဘၣ်ႉ သ၀ီဖိတဖၣ်ဃ့ၢ်ကွံာ်လၢာ်လံႉ ခဲအံၤလၢသ၀ီပူၤန့ၣ်ယအိၣ်ယၤတဂၤလီၤ” အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိး ခီဖျိလၢ သုးခိၣ်ဒိၣ်ဖိ မီၣ်မီၣ်စါ တီခိၣ်ရိၣ်မဲ၀ဲ ပယီၤသုး ခီၣ်ချ့သုးရ့ၣ် (ခမရ=၆၀၃)အံၤ ခးလီၤ၀ဲကျိဖးဒိၣ်ကျိဖိလၢသ၀ီပူၤအဃိ လီၢ်က၀ီၤဖိ စီၤလၢၢ်ဘီ အခီၣ်ကံၣ်ဒုၣ်ခံကပၤႇ အခိၣ်သၣ်ဃံဘၣ်ဒိဘၣ်ထံး၀ဲဒၣ်ဒီး တၢ်ဘၣ်ယိၣ်ဘၣ်ဘှီအိၣ်၀ဲဒၣ်အဃိ KNU ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် ၦၤဘၣ်မူဘၣ်ဒါတဖၣ်ကူဆါယါဘျါအီၤအဂ့ၢ်န့ၣ် KNU တၢ်ဘိးဘၣ်ရၤလီၤ၀ဲၤကျိၤ သူလ့ၤတၢ်ကစီၣ်ပာ်ဖျါ၀ဲ ဖဲလါယနူၤအါရံၤ ၁၉ သီအနံၤန့ၣ်လီၤႉ

ပဒိၣ်သုးမုၢ်ဒိၣ်အံၤ ဟဲမၤဘၣ်ဒိ၀ဲဒၣ် NCA အဘျီဒီးအဘျီလံအဃိ တၢ်ခးလိာ်သးဘၣ်ကဲထီၣ်သးလီၤဒီး တၢ်ဂ့ၢ်ကီသ့ၣ်တဖၣ်အံၤအလီၢ်အိၣ်လၢ ပဒိၣ် ဒီး KNU ခိၣ်နၢ်တဖၣ် ကဘၣ်ထံၣ်လိာ်ဘှါရှဲ၀ဲလီၤအဂ့ၢ်န့ၣ် KNU ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် နဲၣ်ရွဲၣ် ပဒိၣ် စီၤဆၣ်၀ါ စံး၀ဲန့ၣ်လီၤႉ

တကီၢ်ခါ ဘၣ်ထွဲဒီးတၢ်ခးလိာ်သးကဲထီၣ်တၢ်ဂ့ၢ်တဖၣ်အံၤ ဖဲအပူၤကွံာ် စးထီၣ်ဖဲလါဒံၣ်စ့ဘၢၣ် ၂၈ သီ တုၤလၢခဲအံၤတစုတၢ်ဒုးဆဲးကဲထီၣ်ဒံး၀ဲအဃိ သ၀ီပာ်ဖှိၣ်ခဲလၢာ်(၄)ဖျၢၣ် ဟံၣ်ခိၣ်(၁၃၀)ဃၣ်ဃၣ်ဒီး ၦၤနီၣ်ဂံၢ် ၇၉၀ ဂၤ ဘၣ်သုးလီၢ်သုးကျဲဃ့ၢ်ထီၣ်ကွံာ်၀ဲဒၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

ဘၣ်ထွဲဒီးတကီၢ်ခါတၢ်ဒုးကဲထီၣ်အံၤ ကညီဒီကလုာ်စၢဖှိၣ်ကရၢ သုးမုၢ်ဒိၣ်-KNLA သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၤနံၤ စံး၀ဲလၢ“ပတဲဃာ်လၢ ခံခီခံကပၤထိၣ်ဃူထိၣ်ဖိး၀ံၤမးဟးထီၣ်က့ၤလီၤသ့လီၤႉ မ့ၢ်တလဲၤ၀ဲလၢတၢ်ထိၣ်ဃူထိၣ်ဖိးတအိၣ်ဘၣ်န့ၣ် ဒ်ပတၢ်သိၣ်တၢ်သီအိၣ်ပာ်အသိး ကဘၣ်က့ၤခီၣ်ဆၢကဒါလီၤႉ ခဲအံၤန့ၣ် အ၀ဲသ့ၣ်ဒုးသ့ၣ်ညါဒီးလဲၤ၀ဲဘၣ်ဆၣ် ခံခီခံကပၤထိၣ်ဃူထိၣ်ဖိး ခံခီခံကပၤမ့ၢ်သးလီၤပလိာ်မး လဲၤန့ၢ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ဒ်န့ၣ်အသိး တကီၢ်ခါခီဖျိလၢ ပယီၤသုးမုၢ်ဒိၣ် ဒီး KNU အဘၢၣ်စၢၤ တၢ်ဒုးဟဲက့ၤကဲထီၣ်ကဒါအဃိ မုၢ်တြီၢ်(ဖၣ်ပူၣ်)ကီၢ်ရ့ၣ် ဒွဲၣ်လိကီၢ်ဆၣ်ႇ မဲခၠိၤသ၀ီဖိ စီၤသးဆၢ ၃၅ နံၣ်အံၤ ဖဲအပူၤကွံာ်လါယနူၤအါရံၤ ၁၂ သီအနံၤ ဘၣ်၀ဲဒီးကျိဖးဒိၣ်အဃိသံ၀ဲအသိးႇ ဖဲလါယနူၤအါရံၤ ၁၅ သီအနံၤစ့ၢ်ကီး မဲၤ၀့ၤလီၢ်က၀ီၤ ဖိသၣ်တဂၤ အခိၣ်သၣ်ဃံဘၣ်၀ဲဒီးကျိဖးဒိၣ်အဂ့ၢ်န့ၣ် KNU စံး၀ဲန့ၣ်လီၤႉ