လါယနူၤအါရံၤ ၇ သီႇ ၂၀၂၁ နံၣ်ႇ နါ၀့ၤဖၠိစၣ်
KNU ဒူသထူၣ်ကီၢ်ရ့ၣ်ႇ သုးက့(၁)ဟီၣ်က၀ီၤအပူၤ ဖဲလါယနူၤအါရံၤထီၣ်သီအကတီၢ် ခီဖျိလၢတၢ်ခးလိာ်သးကဲထီၣ်အဃိ ဒူသ၀ီကမျၢၢ်လၢအအိၣ်ဖဲဟီၣ်က၀ီၤဖဲန့ၣ်အပူၤတဖၣ် အိၣ်ဆိး၀ဲဒၣ်လၢတၢ်ပလီၢ်ပဒီသးအပူၤဒီး ဘၣ်ယိၣ်၀ဲဒၣ်လၢသုးဂ့ၢ်၀ီကဟဲက့ၤဖ့ၣ်ဆၢထီၣ်ကဒါအဂ့ၢ်န့ၣ် လီၢ်က၀ီၤသ၀ီဖိတဖၣ် စံးဘၣ်ခ့ၣ်အဲးစံၣ်န့ၣ်လီၤႉ
တကီၢ်ခါဆၢကတီၢ်ခဲအံၤ ဒူသ၀ီတနီၤလၢအအိၣ်ဖဲဟီၣ်က၀ီၤ၀ဲန့ၣ်အပူၤ လီၢ်က၀ီၤဖိတဖၣ်အံၤ လၢအ၀ဲသ့ၣ်နီၢ်ကစၢ်တၢ်ဘံၣ်တၢ်ဘၢအဂီၢ်ဒီး လၢတၢ်ဒီတဒၢလီၤနီၢ်ကစၢ်သးသမူအဂီၢ် ခူၣ်ဃာ်၀ဲဒၣ်တၢ်ပူၤလၢဟံၣ်ဖီလာ်လံအဂ့ၢ်န့ၣ် သ၀ီဖိတဂၤစံး၀ဲဒ်အံၤန့ၣ်လီၤႉ
သ၀ီဖိလၢတအဲၣ်ဒိးပာ်ဖျါအမံၤတဂၤ စံး၀ဲ “ဖဲတလါအံၤအတီၢ်ပူၤန့ၣ် တၢ်ခးလိာ်သးအိၣ်ထီၣ်တဆံး တက့ၢ်အဃိ တနီၤန့ၣ်စံၣ်အိၣ်ခူသူၣ်သးတစိၢ်တလီၢ်အိၣ်၀ဲလီၤႉ ခဲအံၤလီၤကယါတဆဲးလံႉ ဘၣ်ဆၣ်တၢ်အိၣ် သးဒုဂၢၢ်ကျၢၤတလီၤတံၢ်ဒံးဘၣ်ႉ လၢပအိၣ်သ၀ီအပူၤန့ၣ် ဟံၣ်တဖၣ်အါဒၣ်တက့ၢ်န့ၣ်ခူၣ်ဃာ်တၢ်ပူၤလီၤႉ လၢကဟးထီၣ်က့ၤလီၤစ့ၢ်ကီး ဟးတဘူၣ်အါအါဒံးဘၣ်ႉ တၢ်အိၣ်သးအံၤကဂၢၢ်ကျၢၤကဒါဧါႇ ကနးဒိၣ်ထီၣ်ကဒါဧါ မ့ၢ်ကအိၣ်ဒ်လဲၣ်န့ၣ် တသ့ၣ်ညါဘၣ်ႉ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
စးထီၣ်ဖဲတနံၣ်အံၤ ဖဲဟီၣ်က၀ီၤ၀ဲန့ၣ်အပူၤ ပယီၤသုးဒီးသုးခိးကီၢ်ဆၢ(BGF)ပာ်ဖှိၣ်ထီၣ်သးဒီး သုးတၢ်ဟူးဂဲၤတဖၣ်စးထီၣ်ကဒါက့ၤအဃိ လီၢ်က၀ီၤဖိတဖၣ်တၢ်ဘၣ်ယိၣ်ဘၣ်ဘှီဟဲအိၣ်ထီၣ်ကဒါ၀ဲအဂ့ၢ်န့ၣ် KNU ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤစိမၠ့ၣ် စံး၀ဲဒ်အံၤန့ၣ်လီၤႉ
“ပယီၤသုးအံၤမၤအါထီၣ်၀ဲအသုးနီၣ်ဂံၢ်ဒီး လၢသုးက့(၅)ဒီး သုးက့(၁)အပူၤန့ၣ် အ၀ဲသ့ၣ်တၢ်ဟူး တၢ်ဂဲၤဟဲအါထီၣ်၀ဲဒၣ်တစဲးလီၤႉ ခဲအံၤ BGF ဒီးပယီၤသုးတဖၣ်ပာ်ဖှိၣ်ထီၣ်သးဒီး မၤအါထီၣ်သုးနီၣ်ဂံၢ်ဒီးဟဲထီၣ်အိၣ်၀ဲလီၤႉ သုးဖိတနီၤန့ၣ်က့ၤ၀ဲလီၤႉ ဘၣ်ဆၣ် တနီၤန့ၣ်အိၣ်တ့ၢ်ဒံးလီၤႉ ၀ံၤဘျီတသီခံသီအံၤအတီၢ်ပူၤစ့ၢ်ကီး ပယီၤသုးအံၤ လၢကဃုသ့ၣ်ညါတၢ်အဂီၢ်ပျၢ်လီၤကဒါကဘီယူၤ(Drone)အိၣ်၀ဲလီၤ” အဂ့ၢ်န့ၣ် ပဒိၣ်စီၤစိမၠ့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ဒ် KNU ဒူသထူၣ်ကီၢ်ရ့ၣ် သုးက့(၁)ၦၤဘၣ်မူဘၣ်ဒါတဖၣ်စံး၀ဲအသိး လၢကီၢ်ရ့ၣ်၀ဲၤဒၢးအကပိၤကပၤန့ၣ် ပယီၤသုးအံၤသူ၀ဲဒၣ်(Drone)ဒီး လၢမုၢ်ဆါခီအမဲာ်ညါမုၢ်နၤခီစ့ၢ်ကီး ဃုသ့ၣ်ညါတၢ်အိၣ်၀ဲတလီၢ်လီၢ်အဃိ ဒ်သိးကဘှါရှဲ၀ဲတၢ်ဂ့ၢ်အံၤအဂီၢ် တီၣ်ဖျါထီၣ်ဃ့ထီၣ်၀ဲဒၣ်ဆူ ကီၢ်စဲၣ် JMC အအိၣ်ဘၣ်ဆၣ် တုၤလၢခဲအံၤတစုတၢ်လီၤတိၢ်လီၤဆီတအိၣ်၀ဲနီတမံၤဘၣ်အသိး ပယီၤသုးတကပၤဆဲးဃုသ့ၣ်ညါတၢ်ဒီး(Drone)ထီဘိလီၤအဂ့ၢ်န့ၣ် စံး၀ဲန့ၣ်လီၤႉ
ဖဲဟီၣ်က၀ီၤ၀ဲန့ၣ်အပူၤ BGF သုးကလၢၤလၢအအိၣ်ဆီလီၤအသးဖဲ ယိၤကျါသ၀ီ သီခါဖၠၣ်အကရၢၢ်အပူၤန့ၣ် ဒ်သိးကထုးကဒါကွံာ်၀ဲအဂီၢ် ဖဲအပူၤကွံာ် လါဒံၣ်စ့ဘၢၣ်လၢာ်အခါန့ၣ် KNDO သုးရ့ၣ်(၂)အံၤ ဆှၢထီၣ်လံာ်ဃ့ထီၣ်၀ဲအိၣ်၀ဲအသိး ဖဲတလါအံၤ လါယနူၤအါရံၤ ၂ သီအနံၤစ့ၢ်ကီး သုးကလၢၤအ၀ဲန့ၣ် ခီဖျိလၢ KNLA တကပၤလဲၤခး၀ဲအဃိ သုးခိးကီၢ်ဆၢ(BGF)သုးဖိတဂၤ ဘၣ်ဒိဘၣ်ထံး၀ဲဒၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
