Home တၢ်ကစီၣ် ကလုာ်ဒူၣ်ပတုာ်တၢ်ခးကရူၢ်တဖၣ် ကဆိကတီၢ်ဃာ်၀ဲတၢ်တၢၣ်ပီၣ်တဲသကိးထံရူၢ်ကီၢ်သဲးဒီးသုးကီၣ်ကး

ကလုာ်ဒူၣ်ပတုာ်တၢ်ခးကရူၢ်တဖၣ် ကဆိကတီၢ်ဃာ်၀ဲတၢ်တၢၣ်ပီၣ်တဲသကိးထံရူၢ်ကီၢ်သဲးဒီးသုးကီၣ်ကး

151
0

လါဖ့ၤဘြူၤအါရံၤ ၂၂ သီႇ ၂၀၂၀ နံၣ်ႇ ခ့ၣ်အဲးစံၣ်

တကီၢ်ခါဆၢကတီၢ်ခဲအံၤ ကဆိကတီၢ်ဃာ်၀ဲတၢ်တၢၣ်ပီၣ်တဲသကိးထံရူၢ်ကီၢ်သဲးဒီး သုးကီၣ်ကးလၢအဟံးဆူၣ်တၢ်စိတၢ်ကမီၤတဖၣ်အဂ့ၢ်န့ၣ် ဖဲလါဖ့ၤဘြူၤအါရံၤ ၂၀ သီအနံၤ ကလုာ်ဒူၣ်ဖီၣ်စုက၀ဲၤကရူၢ်လၢအဆဲးလီၤ(NCA)တဖၣ် တၢ်တီခိၣ်ရိၣ်မဲတၢ်မုာ်တၢ်ခုၣ်တၢ်မၤအကျဲ (PPST ) ထုးထီၣ်ဘိးဘၣ်ရၤလီၤ၀ဲန့ၣ်လီၤႉ

ဖဲလါဖ့ၤဘြူၤအါရံၤ ၁၉ သီအနံၤ PPST ကရူၢ်ဖိခိၣ်နၢ်တဖၣ်မၤ၀ဲတၢ်အိၣ်ဖှိၣ်တခါဒီး ခီဖျိလၢ သုးဟံးဆူၣ်ကွံာ်တၢ်စိတၢ်ကမီၤအဃိ တၢ်ကမၤဖျါထီၣ်တၢ်မုာ်တၢ်ခုၣ်တၢ်မၤအကျဲ ကြၢးႇတကြၢးအဖီခိၣ် တၢ်တၢၣ်ပီၣ်ထိၣ်ဃူဟံးန့ၢ်၀ဲတၢ်သးလီၤပလိာ်ဒီး တၢ်ဆၢတဲာ်ဟဲထီၣ်၀ဲဒ်အံၤလီၤအဂ့ၢ်န့ၣ် PPST လံာ်တၢ်ပာ်ဖျါ ၦၤကတိၤတၢ်ပၢ ပဒိၣ်စီၤတီနံ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ “ဖဲလၢပတၢၣ်ပီၣ်တဲသကိးထံရူၢ်ကီၢ်သဲးအခါန့ၣ် တချုးဒံးလၢသုးဟံးန့ၢ်တၢ်စိတၢ်ကမီၤဘၣ်လီၤႉ ကရူၢ်ကရၢလၢအဟံးဆူၣ်ကွံာ်တၢ်စိတၢ်ကမီၤလၢတကီၢ်ခါခဲအံၤစ့ၢ်ကီး တဖိးသဲစးဘၣ်အသိး ကတၢၣ်ပီၣ်ထံရူၢ်ကီၢ်သဲးအဂီၢ်စ့ၢ်ကီး တသ့၀ဲဘၣ်ႉ တကပၤစ့ၢ်ကီး မ့ၢ်ဘၣ်တဲဒ်ထံရူၢ်ကီၢ်သဲးအသိးန့ၣ် ကရူၢ်ကရၢလၢကတဲသကိးတၢ်အံၤ မ့မ့ၢ်ပဒိၣ်န့ၣ် ဘျီၣ်ဒိၣ်စ့ၢ်ကီးကဘၣ်အိၣ်လီၤႇ ပဒိၣ်စ့ၢ်ကီးကဘၣ်အိၣ်ႇ သုးစ့ၢ်ကီးကဘၣ်အိၣ်လီၤႉ ခဲအံၤန့ၣ် သုးကီၣ်ကးကရူၢ်အံၤ မ့ၢ်ပဒိၣ်ဖဲလဲၣ်တဒူၣ်လဲၣ်န့ၣ်တသ့ၣ်ညါဘၣ်ႉ ဘျီၣ်ဒိၣ်စ့ၢ်ကီးတအိၣ်လၢၤဘၣ်ႉ တၢ်အဃိန့ၣ် လၢတၢ်ကတၢၣ်ပီၣ်တဲသကိးထံရူၢ်ကီၢ်သဲးအပတီၢ်အံၤ တၢ်သူၣ်ထီၣ်ဆီလီၤလၢအလၢအၦဲၤကဘၣ်အိၣ်လီၤႉ တဲ၀ဲလၢအဖိးသဲစးဘၣ်ဆၣ် တၢ်သူၣ်ထီၣ်ဆီလီၤမ့ၢ်တလၢၦဲၤန့ၣ် ကမၤအဂီၢ်တသ့ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါ ခီဖိလျၢမ့ၢ်တၢ်ဟံးန့ၢ်ဆူၣ်တၢ်စိတၢ်ကမီၤအဃိ တတူၢ်လိာ်၀ဲအ၀ဲသ့ၣ်ဘၣ်အသိး လၢအဖိးသဲစးစ့ၢ်ကီးတအိၣ်ဘၣ်အဃိ လၢကတၢၣ်ပီၣ်တဲသကိးထံရူၢ်ကီၢ်သဲးအဂီၢ် လ့ၤတက့ၤတသ့ဘၣ်အဂ့ၢ်န့ၣ် ပဒိၣ်စီၤတီနံး စံးအါထီၣ်၀ဲန့ၣ်လီၤႉ

PPST အံၤ တၢၣ်ပီၣ်တဲသကိး၀ဲ တကီၢ်ခါထံရူၢ်ကီၢ်သဲးတၢ်အိၣ်သးလၢအကဲထီၣ်သးတဖၣ်ႇ ကီၢ်ပူၤတၢ်အိၣ်သးဒီးတၢ်မုာ်တၢ်ခုၣ်တၢ်မၤအကျဲတဖၣ်၀ံၤအလီၢ်ခံ ထုးထီၣ်ပာ်ဖျါ၀ဲတၢ်ပာ်သးတၢ်အိၣ်ဆၢထၢၣ်(၅)ထံၣ်ဒီး ဖဲန့ၣ်ပၣ်ဃုာ်၀ဲဒၣ်ဒီး တၢ်ကဆိကတီၢ်ကွံာ်တၢ်တၢၣ်ပီၣ်တဲသကိးတၢ်ဒီးသုးကီၣ်ကးတၢ်ဂ့ၢ်စ့ၢ်ကီးန့ၣ်လီၤႉ

တၢ်ပာ်သးတၢ်အိၣ်ဆၢထၢၣ်လၢအဂၤတဖၣ်န့ၣ်မ့ၢ်၀ဲ တူၢ်လိာ်၀ဲတၢ်ထီဒါသုး မီၤစိရိၤသနူတၢ်ဟူးတၢ်ဂဲၤတဖၣ်အသိး တၢ်ဆီၣ်ထွဲမၤစၢၤလၢအလိၣ်၀ဲတဖၣ်စ့ၢ်ကီး ကဃုကျဲကမၤစၢၤဆီၣ်ထွဲ၀ဲအဂ့ၢ်ႇတၢ်စူးကါ၀ဲတၢ်စုဆူၣ်ခီၣ်တကးလၢၦၤလၢအပာ်ဖျါထီၣ်သးတဖၣ်အဖီခိၣ်စ့ၢ်ကီး ထီဒါ၀ဲအဂ့ၢ်န့ၣ် လၢလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါဃ့ထီၣ်၀ဲလၢ တၢ်ကပျၢ်လီၤက့ၤၦၤလၢတၢ်ဖီၣ်ဃာ်၀ဲတဖၣ်လၢအဆိအချ့အသိး ဒ်သိးမီၤစိရိၤသနူကလီၤမၢ်ကွံာ်အဂီၢ်ဒီး ကဘှါရှဲတကီၢ်ခါထံရူၢ်ကီၢ်သဲးတၢ်ဂ့ၢ်ကီတဖၣ်အံၤအဂီၢ် ကပာ်ဖှိၣ်မၤသကိးတၢ်ဒီးထံဂုၤကီၢ်ဂၤကရူၢ်ကရၢတဖၣ်ဃုာ်ဒီးကီၢ်ပူၤကီၢ်ချၢတဖၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ