Home တၢ်ကစီၣ် မီၤစိရိၤသနူကလီၤၦီၢ်ကွံာ်အဂီၢ် တၢ်ဆၢကတီၢ်တုၤဃီၤလၢပကဘၣ်ပာ်ဖှိၣ်မၤသကိးတၢ်လံအဂ့ၢ်န့ၣ် ခ့ၣ်အဲၣ်ယူၣ် ၦၤပၢၤလီၢ်ဆ့ၣ်နီၤစံး၀ဲ

မီၤစိရိၤသနူကလီၤၦီၢ်ကွံာ်အဂီၢ် တၢ်ဆၢကတီၢ်တုၤဃီၤလၢပကဘၣ်ပာ်ဖှိၣ်မၤသကိးတၢ်လံအဂ့ၢ်န့ၣ် ခ့ၣ်အဲၣ်ယူၣ် ၦၤပၢၤလီၢ်ဆ့ၣ်နီၤစံး၀ဲ

265
0

လါဖ့ၤဘြူၤအါရံၤ ၁၁ သီႇ ၂၀၂၀ နံၣ်ႇ ခ့ၣ်အဲးစံၣ်

ဘၣ်ကွၢ်ဆၢၣ်မဲာ်ဒီးသုးမီၤစိရိၤသနူတၢ်ပၢတၢ်ပြးသ့ၣ်တဖၣ်လၢအထီဒါ၀ဲဒၣ်ဒံၣ်မိၣ်ခြ့ၣ်စံၣ်အကျဲဒီး လၢထံကီၢ်တၢ်လဲၤထီၣ်လဲၤထီအဂီၢ်စ့ၢ်ကီး ကဲထီၣ်တၢ်နးတၢ်ဘျးအဃိ သုးမီၤစိရိၤကလီၤၦီၢ်ကွံာ်အဂီၢ် တၢ်ဆၢကတီၢ်တုၤဃီၤ၀ဲလၢပကဘၣ်ပာ်ဖှိၣ်မၤသကိးတၢ်လံအဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ၦၤပၢၤလီၢ်ဆ့ၣ်နီၤ သုးခိၣ်ကျၢၢ်ဒိၣ်စိ စီၤမူၤတူစ့ဖိ စံး၀ဲန့ၣ်လီၤႉ

ဖဲ ၂၀၂၀ နံၣ်ႇ လါဖ့ၤဘြူၤအါရံၤ ၁၁ သီအနံၤ လၢအလီၤဘၣ်၀ဲ ၇၃ ၀ီတ၀ီ ကညီဒီကလုာ်မုၢ်နံၤအဂီၢ် လံာ်ဟ့ၣ်ယုၢ်အပူၤ ခ့ၣ်အဲၣ်ယူၣ် ၦၤပၢၤလီၢ်ဆ့ၣ်နီၤ သုးခိၣ်ကျၢၢ်ဒိၣ်စိ စီၤမူၤတူစ့ဖိ ထၢနုာ်စံးလီၤ၀ဲန့ၣ်လီၤႉ

“ကီၢ်ပယီၤသုးမုၢ်ဒိၣ်ဟံၣ်ဆူၣ်ကွံာ်တၢ်စိတၢ်ကမီၤအံၤ မ့ၢ်တၢ်လၢအထီဒါလိာ်သးဒီးကညီဒီ ကလုာ်စၢဖှိၣ်ကရၢဃုာ်ဒီး ကလုာ်ဒူၣ်တဖၣ်ခဲလၢာ်အတၢ်မိၣ်န့ၢ်သးလီလၢ တၢ်ကသူၣ်ထီၣ်ဒံၣ်မိၣ်ခြ့ၣ်စံၣ်ဖဲၣ်ဒရၢၣ်ကီၢ်စၢဖှိၣ်အတၢ်ပာ်ပညိၣ်ဒီး တၢ်မၤအက့ၢ်အဂီၤတဖၣ်န့ၣ်လီၤႉ ဒ်ကလုာ်ဒူၣ်တဖၣ်ဘၣ်ကွၢ်ဆၢၣ်မဲာ်ဒီးပယီၤကလုာ်ဒိၣ်စိသနူဒီး သုးမီၤစိရိၤသနူတၢ်ပၢတၢ်ပြးအသိး ကလုာ်ဒူၣ်ၦၤပယီၤဖိတဖၣ်စ့ၢ်ကီး ဘၣ်ကွၢ်ဆၢၣ်မဲာ်ဒီးသုးမီၤစိရိၤသနူသ့ၣ်တဖၣ် အတၢ်ပၢတၢ်ပြးတဖၣ်လၢအထီဒါဒံၣ်မိၣ်ခြ့ၣ်စံၣ်တၢ်မၤအကျဲဒီး တၢ်အိၣ်မူအတၢ်လဲၤထီၣ်လဲၤထီအဂီၢ်န့ၣ်လီၤႉ အဃိန့ၣ် ပကဘၣ်ပာ်ဖှိၣ်မၤသကိးတၢ်လၢမီၤစိရိၤသနူကလီၤၦၢ်ကွံာ်အဂီၢ်န့ၣ်လီၤ” အဂ့ၢ်န့ၣ် ခ့ၣ်အဲၣ်ယူၣ် ၦၤပၢၤလီၢ်ဆ့ၣ်နီၤ စံး၀ဲန့ၣ်လီၤႉ

လၢန့ၣ်အမဲာ်ညါ ကညီဖိလၢအအိၣ်လၢတၢ်လီၢ်တပူၤလၢ်လၢ် ကဘၣ်ပာ်ဖှိၣ်မၤသကိး တၢ်ဒီးကလုာ်ဒူၣ်တဖၣ်ခဲလၢာ်ဒီး ထီဒါမၤလီၤၦီၢ်ကွံာ်သနူဒီး တၢ်သူၣ်ထီၣ်အက့ၢ်အဂီၤကိးမံၤဒဲးလၢအမၤထီဒါကညီကလုာ်အတၢ်အိၣ်စံာ်အိၣ်ကျၢၤႇ ဃုာ်ဒီးကလုာ်ဒူၣ်ထံဖိကီၢ်ဖိခဲလၢာ်အတၢ်လဲၤထီၣ်လဲၤထီတဖၣ်လီၤအဂ့ၢ်န့ၣ် စီၤမူၤတူစ့ဖိ ဆဲးစံး၀ဲန့ၣ်လီၤႉ

လါဖ့ၤဘြူၤအါရံၤ ၁၁ သီအနံၤ လၢအလီၤဘၣ်၀ဲ ၇၃ ၀ီတ၀ီ ကညီဒီကလုာ်မုၢ်နံၤအံၤ လၢတၢ်သ့ၣ်နီၣ်ဆၢက့ၤမၤလၤကပီၤအီၤအဂီၢ် ၀့ၢ်တကူၣ်ဃုာ်ဒီးကညီသးစၢ်လၢအအိၣ်လၢတၢ်လီၢ်အဂၤတဖၣ်စုာ်စုာ်အပူၤ မၤ၀ဲတၢ်ထီဒါသုးမီၤစိရိၤသနူတၢ်ရဲၣ်တၢ်ကျဲၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲ ၁၉၄၈ နံၣ်ႇ လါဖ့ၤဘြူၤအါရံၤ ၁၁ သီအနံၤန့ၣ် ကီၢ်ပယီၤဒီတဘ့ၣ် ကညီထံဖိကီၢ်ဖိကမျၢၢ် လွံၢ်ကလီၢ်ဘျဲၣ် ပာ်ဖျါထီၣ်၀ဲတၢ်ဘၣ်သးလၢတၢ်မုာ်တၢ်ခုၣ်အပူၤဒီး ကိးသတြီဃ့ထီၣ်၀ဲတၢ်ဂ့ၢ် ၄ ထံၣ်န့ၣ်လီၤႉ ဖဲ ၁၉၅၃ နံၣ်ႇ လါနိၣ်၀့ဘၢၣ်အပူၤ ဖၣ်ပူၣ်၀့ၢ်ပူၤတၢ်မၤ၀ဲ ကီၢ်သူလ့ၤကီၢ်ဒီဘ့ၣ်ခီကရဲးအပူၤ လါဖ့ၤဘြူၤအါရံၤ ၁၁ သီအနံၤန့ၣ် ဘၣ်တၢ်ပာ်ပနီၣ်၀ဲလၢအမ့ၢ်ကညီဒီကလုာ်အမုၢ်နံၤန့ၣ်လီၤႉ