ကညီကီၢ်စဲၣ် တၢ်ထီဒါသုးမီၤစိရိၤတၢ်ရဲၣ်တၢ်ကျဲၤ လီၢ်က၀ီၤဒူသ၀ီဖိတဖၣ်နုာ်လီၤပၣ်ဃုာ်အါထီၣ်

လါဖ့ၤဘြူၤအါရံၤ ၉ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ်ပူၤ ခံသီတသီတၢ်မၤ၀ဲတၢ်ထီဒါသုးမီၤစိရိၤသနူတၢ်ရဲၣ်တၢ်ကျဲၤအပူၤ ၀့ၢ်ပူၤလီၢ််က၀ီၤဖိတကးဘၣ်အမဲာ်ညါ လီၢ်က၀ီၤဒူသ၀ီဖိလၢအကထိတဖၣ် လၢကလဲၤပာ်ဖျါထီၣ်သးလၢ၀့ၢ်ပူၤအဂီၢ် နုာ်လီၤပာ်ဖှိၣ်ပၣ်ဃုာ်၀ဲန့ၣ်လီၤႉ

ဖဲမဟါမုၢ်နၤခီ တကီၢ်ခါသုးပဒိၣ်ထုးထီၣ်ပာ်ဖျါ၀ဲ ဂ့ၢ်ဂီၢ်အူတၢ်ဘျၢ အဆၢဒိၣ် ၁၄၄ ဘၣ်ဆၣ် တနံၤအံၤ ကမျၢၢ်လၢအအိၣ်မၠၣ်၀တံၣ်ပူၤတဖၣ် ဆဲးမၤ၀ဲဒၣ်တၢ်ပာ်ဖျါထီၣ်သးဒံးဒီး လၢတၢ်ပာ်ဖျါထီၣ်သးအပူၤ လီၢ်က၀ီၤဒူသ၀ီကရူၢ်တဖၣ်စုာ်စုာ် ကမျၢၢ်လၢအကထိနုာ်လီၤပၣ်ဃုာ်၀ဲဒၣ်န့ၣ်လီၤႉ

မၠၣ်၀တံၣ်ကီၢ်ဆၣ်ႇ သ့ၣ်ဘီဘိသ၀ီကရူၢ် လီၢ်က၀ီၤဖိ စီၤကိၤမၠိ စံး၀ဲလၢ “တၢ်တဘျီညါအံၤမး မ့ၢ်တနုာ်လီၤပၣ်ဃုာ်ဘၣ်န့ၣ် သုးမီၤစိရိၤသနူအံၤကဆဲးအိၣ်ဒံးထီရီၤအဃိ ၦၤကိးဂၤဒဲးသူၣ်ဆူၣ်သးဂဲၤဟဲနုာ်လီၤပၣ်ဃုာ်၀ဲလီၤ” အဂ့ၢ်န့ၣ် စံးဘၣ်ကညီတၢ်ကစီၣ်န့ၣ်လီၤႉ

ဒ်န့ၣ်အသိး စးထီၣ်ဖဲမဟါန့ၣ် ဖၣ်အၣ်၀့ၢ်ဖိလၢအကလီၢ်စးထီၣ်ပာ်ဖျါထီၣ်သး၀ံၤအလီၢ်ခံ တနံၤအံၤကၠၤအ့စ့ၣ်ကၠံကီၢ်ဆၣ်ႇကီးတရံးကီၢ်ဆၣ် လီၢ်က၀ီၤဖိတဖၣ်နုာ်လီၤပၣ်ဃုာ်ပၣ်ဂီၢ်၀ဲဒီး ကၠၤအ့စ့ၣ်ကၠံကီၢ်ဆၣ်(ကညီဒီကလုာ်စၢဖှိၣ်ကရၢ -KNU ၀ီၢ်ရီကီၢ်ဆၣ်)ပူၤ လီၢ်က၀ီၤဒူသ၀ီဖိတဖၣ်အမဲာ်ညါ တၢ်ကူၣ်ဘၣ်ကူၣ်သ့ၦၤမၤတၢ်ဖိတဖၣ်ဒီး ၀ဲၤကျိၤၦၤမၤတၢ်ဖိတဖၣ် နုာ်လီၤပၣ်ဃုာ်၀ဲန့ၣ်လီၤႉ

ၦၤလၢအပၣ်ဃုာ်လၢတၢ်ပာ်ဖျါထီၣ်သးအပူၤ စီၤ၀့နဲၤ စံး၀ဲလၢ “ပ၀ဲသ့ၣ်တဖၣ်ပလိၣ်ဘၣ်ဒံၣ်မိၣ်ခြ့ၣ်စံၣ်လီၤႉ သုးမီၤစိရိၤအံၤ လ့ၤတက့ၤပတအဲၣ်ဒိးဘၣ်ႉ ဒ်သိးကဒိးန့ၢ်ဘၣ်ဒံၣ်မိၣ်ခြ့ၣ်စံၣ်ဒီးတၢ်မုာ်တၢ်ခုၣ်အဂီၢ် လၢကထုးလီၤကွံာ်မီၤစိရိၤအဂီၢ်ဘၣ်ပာ်ဖျါထီၣ်သးလီၤႉ ပ၀ဲကညီကလုာ်တဖၣ် တၢ်ကူၣ်ဘၣ်သ့၀ဲၤကျိၤ ဒီး၀ဲၤကျိၤၦၤမၤတၢ်ဖိတဖၣ် ပၣ်၀ဲခဲလၢာ်လီၤ” အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိး တနံၤအံၤ ခံသီတသီ ကီးတရံး၀့ၢ်ပူၤတၢ်မၤ၀ဲတၢ်ပာ်ဖျါထီၣ်သးအပူၤ ၀့ၢ်ပူၤကမျၢၢ်တဖၣ်အမဲာ်ညါ ဟီၣ်က၀ီၤဒူသ၀ီလီၢ်က၀ီၤဖိတဖၣ်နုာ်လီၤပၣ်ဃုာ်ပၣ်ဂီၢ်အဃိ ၦၤပာ်ဖျါထီၣ်သးအနီၣ်ဂံၢ်အိၣ်၀ဲလၢအကလးညါအဂ့ၢ်န့ၣ် လီၢ်က၀ီၤဖိတဖၣ် စံး၀ဲန့ၣ်လီၤႉ

လၢတၢ်ပာ်ဖျါထီၣ်တၢ်ဘၣ်သးအပူၤ ကမျၢၢ်တဖၣ်ကိးသတြီဃ့ထီၣ်၀ဲတၢ်ဂ့ၢ်လၢအမ့ၢ် ထူးသံကွံာ်သုးမီၤစိရိၤသနူႇ ပျၢ်လီၤကွံာ်ခိၣ်နၢ်လၢတၢ်ဖီၣ်ဃာ်၀ဲတဖၣ်ႇ မ်ဒီၣ်အီၣ်ဆါဆူးကၠံၣ်ကအိၣ်ဆူၣ်အိၣ်ချ့တက့ၢ်ႇ ကမျၢၢ်အပၢၤကီၢ်ကမျၢၢ်အပၢၤကီၢ်ႇ သုးခိၣ်ကျၢၢ်ဟ့ၣ်သုးတၢ်သ့တၢ်ဘၣ်လၢကက့ၤမၤသံက့ၤကမျၢၢ်တမ့ၢ်ဘၣ် သ့ၣ်တဖၣ်န့ၣ်လီၤႉ