တုၤလၢခဲအံၤတစု တၢ်မၤစၢၤတၢ်ဖိတၢ်လံၤတဖၣ်တတုၤဒံးလၢၦၤလီၢ်အိၣ်ကမှံဖိအအိၣ်ဒံးဘၣ်

လါဖ့ၤဘြူၤအါရံၤ ၁၅ သီႇ ၂၀၂၁ နံၣ်ႇ ခ့ၣ်အဲးစံၣ်

စးထီၣ်ဖဲလါဒံၣ်စ့ဘၢၣ်ထီၣ်သီန့ၣ် တၢ်ကဲထီၣ်သးလၢ ကညီဒီကလုာ်စၢဖှိၣ်ကရၢ -KNU စုဒုၣ်တီၤအဖီလာ် သုးကရူၢ်တဖၣ်ဒီး ကီၢ်ပယီၤသုးမုၢ်ဒိၣ်တဖၣ်အဘၢၣ်စၢၤ တၢ်ဒုးကဲထီၣ်အဃိ လၢၦၤဃ့ၢ်မှံဟးဖျိးတဖၣ်အဂီၢ် တၢ်မၤစၢၤတၢ်ဖိတၢ်လံၤလၢတၢ်ဟ့ၣ်မၤစၢၤ၀ဲတဖၣ်အံၤ တုၤလၢခဲအံၤတစုတတုၤဒံး၀ဲလၢၦၤဃ့ၢ်တၢ်ဒုးဖိတဖၣ်အအိၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ၦၤဃ့ၢ်မှံဟးဖျိးဖိတဖၣ်အဂီၢ် တၢ်အီၣ်တၢ်အီတၢ်အိၣ််တၢ်ဆိးလီၢ်ကျဲဒီးတၢ်ကူတၢ်သိးလၢအလိၣ်၀ဲတဖၣ်အံၤ ကညီသးစၢ်တဖၣ်ပၣ်ဖှိၣ်ထၢ၀ဲဒၣ်တၢ်ဖိတၢ်လံၤလၢ ၦၤမၤဘူၣ််လီၤလၢတၢ်လီၢ်အါတီၤအပူၤအံၤ လဲၤတုၤဒံး၀ဲဒၣ်ဖဲပကိကီၢ်ခီလၢၢ်ဒိၣ်၀့ၢ်လီၤဒီး ခီဖျိလၢပယီၤသုးမုၢ်ဒိၣ်တဟ့ၣ်ပျဲလဲၤ၀ဲဘၣ်အဃိ တၢ်ဖိတၢ်လံၤတဖၣ်လဲၤတတုၤဒံး၀ဲလၢၦၤဃ့ၢ်မှံဟးဖျိးအအိၣ်ဘၣ်အဂ့ၢ်န့ၣ် သ့ၣ်ညါဘၣ်လၢ ၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤအအိၣ်န့ၣ်လီၤႉ

အ၀ဲစံး၀ဲလၢ“တၢ်မၤစၢၤတၢ်ဖိတၢ်လံၤတဖၣ်တဆှၢဘၣ်ဒံးဘၣ်ႉ ကျဲမးတအိးထီၣ်ဒံးဆှၢကသ့ဒ်လဲၣ်ႉ လၢပအိၣ်န့ၣ် တၢ်ဖိတၢ်လံၤကအိၣ်လၢကါတခိၣ်ညါလီၤႉ တၢ်လီၢ်လၢအဂၤစ့ၢ်ကီးအိၣ်ဒံးဒီဒူၣ်ညါလီၤႉ အါဒၣ်တက့ၢ်န့ၣ် ၀့ၢ်တကူၣ်ႇပသံၣ် မၠီမၠးဒီးပကိတဖၣ်ပၣ်၀ဲလီၤႉ တၢ်ဖိတၢ်လံၤတဖၣ်ဟဲတုၤ၀ဲလၢ အပူၤကွံာ်တလါလံလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

တကီၢ်ခါ တၢ်မၤစၢၤတၢ်ဖိတၢ်လံၤတဖၣ်အံၤ ကညီသးစၢ်တဖၣ်လဲၤဆှၢ၀ဲလၢလၢၢ်ဒိၣ်၀့ၢ် KNU တၢ်ရ့လိာ်မုာ်လိာ်၀ဲၤဒၢးဒီးဟံၣ်တနီၤလံဘၣ်ဆၣ် ခီဖျိလၢတၢ်ဒုးတၢ်ယၤအဃိဒီး သုးမုၢ်ဒိၣ်တြီဃာ်တၢ်လဲၤ ထီၣ်က့ၤလီၤအဃိ တၢ်ဆှၢ၀ဲတၢ်ဖိတၢ်လံၤတသ့ဒံးဘၣ်ဒီး လၢတၢ်သ့ၣ်တဖၣ်အံၤအဂီၢ် KNU တကပၤ ထိၣ်ဃူဘှါရှဲဟံးထီၣ်ဖီၣ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကညီကီၢ်စဲၣ် မုၢ်တြီၢ်ဟီၣ်က၀ီၤ ဒီး ပကိကီၢ်ခီလၢၢ်ဒိၣ်ဟီၣ်က၀ီၤတဖၣ်အပူၤ ဖဲအပူၤကွံာ် လါဒံၣ်စ့ဘၢၣ် ဒီး လါယနူၤအါရံၤအတီၢ်ပူၤအခါ KNU စုဒုၣ်တီၤအဖီလာ်ကရူၢ်တဖၣ်ဒီး ပယီၤသုးမုၢ်ဒိၣ်ကရူၢ်တဖၣ်အဘၢၣ်စၢၤ တၢ်ဒုးဟဲကဲထီၣ်၀ဲဒၣ်တလီၢ်လီၢ်အဃိ လီၢ်က၀ီၤဖိလၢအကထိဘၣ်ဃ့ၢ်မှံဟးဖျိး၀ဲဒၣ်လၢၦၢ်လၢ်ကျါန့ၣ်လီၤႉ

တုၤလၢခဲအံၤတစုတၢ်ခးလိာ်သးကဲထီၣ်ဒံး၀ဲအဂ့ၢ်ဒီး ခီဖျိလၢတၢ်ခးလိာ်သးအဃိ လီၢ်က၀ီၤၦၤဃ့ၢ်မှံဟးဖျိးဖိတဖၣ် တက့ၤဘၣ်လၢအနီၢ်ကစၢ်လီၢ်ကျဲဒံးဘၣ်အသိး ဖဲအပူၤကွံာ် လါဖ့ၤဘြူၤအါရံၤ ၁၀ သီအနံၤစ့ၢ်ကီး ခီဖျိလၢနၢ်ဟူကျိသီၣ်အဃိ သ၀ီ ၃ ဖျၢၣ်သ၀ီဖိတဖၣ် ပျံၤတၢ်ဖုးတၢ်စံၣ်ပူၤဖျဲးထီၣ်ကဒီးသးအဂ့ၢ်န့ၣ် KNU တၢ်ဘိးဘၣ်ရၤလီၤတၢ်ကစီၤ၀ဲၤကျိၤ ပာ်ဖျါ၀ဲန့ၣ်လီၤႉ