မ့ၣ်အူအီၣ်မဲၢ်လးဘၣ်ကီဘၣ်ခဲဒဲက၀ီၤဒီး ဟံၣ်အဖျၢၣ် ၈၀ ဘျဲၣ်ဟးဂီၤ

လါဖ့ၤဘြူၤအါရံၤ ၁၀ သီႇ ၂၀၂၁ နံၣ်ႇ ခ့ၣ်အဲးစံၣ်

ကီၢ်ကၠီၣ်တဲၣ်=ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲက၀ီၤအပူၤ ဖဲမဟါ ၉ နၣ်ရံၣ်ဘျဲၣ်အဆၢကတီၢ် ခီဖျိလၢမ့ၣ်အူအီၣ်တၢ်အဃိ ဟံၣ်အဖျၢၣ် ၈၀ ဘျဲၣ်ဟးဂီၤ၀ဲဒၣ်အဂ့ၢ်န့ၣ် ၦၤအိၣ်ဒဲက၀ီၤပူၤတဖၣ် စံးဘၣ်ခ့ၣ်အဲးစံၣ်န့ၣ်လီၤႉ

မဲၢ်လးဘၣ်ကီဘၣ်ခဲ က၀ီၤဒ့ C3A အပူၤ ဖဲမဟါဟါခီအကတီၢ် ခီဖျိလၢမ့ၣ်အူအီၣ်တၢ်အဃိ မ့ၣ်အူအီၣ်၀ဲဟံၣ် ၅၁ ဖျၢၣ်ႇ တၢ်ဘၣ်မၤလီၤၦီၢ်ကွံာ်၀ဲ ၃၆ ဖျၢၣ်ဒီး ၦၤလၢအဟံၣ်ဟးဂီၤ ၦၤနီၣ်ဂံၢ်အိၣ်၀ဲ ၄၆၉ ဂၤအဂ့ၢ်န့ၣ် ဒဲက၀ီၤၦၤဘၣ်မူဘၣ်ဒါတဂၤ ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ

အ၀ဲစံး၀ဲလၢ “မ့ၣ်အူအီၣ်တၢ်အိၣ်တစိၢ်ဖိဘျီန့ၣ် မၤပံာ်၀ဲမ့ၣ်အူန့ၢ်လီၤႉ သိလ့ၣ်မၤသံမ့ၣ်အူဟဲတုၤ၀ဲ ၆ ခိၣ်ညါလီၤႉ ၦၤဘၣ်ဒိဘၣ်ထံးဒုတအိၣ်ဘၣ်ႉ ဘၣ်ဆၣ်ဟံၣ်တအိၣ်လၢၤဘၣ်တၢ်ကီတၢ်ခဲဒုအိၣ်၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါ လၢအ၀ဲသ့ၣ်အဂီၢ်တၢ်မၤစၢၤလၢအလိၣ််၀ဲတဖၣ်န့ၣ် ဒဲက၀ီၤၦၤဘၣ်မူဘၣ်ဒါတဖၣ် လၢတၢ်ကက့ၤသူၣ်ထီၣ်ဘှီဂ့ၤထီၣ်ကဒါအဂီၢ် တၢ်ဟံးန့ၢ်၀ဲစရီတဖၣ်လံဒီး လၢဂ့ၢ်ဂီၢ်အူတၢ်အီၣ် တၢ်အီဒီးတၢ်ကူတၢ်သိးအဂီၢ်တနီၤန့ၣ် တၢ်မၤစၢၤ၀ဲဒၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ၦၤလၢမ့ၣ်အူအီၣ်ကွံာ်အဟံၣ်တဂၤ စံး၀ဲလၢ “ပတၢ်ဖိတၢ််လံၤန့ၣ် စိာ်တချုးနီတမံၤလၢၤဘၣ်ႉ လိၣ်ဘၣ်၀ဲတၢ်အီၣ်တၢ်အီအသိး ကပၢၤနီၣ်ဒိစ့ၢ်ကီးလိၣ်၀ဲလီၤႉ တၢ်ကူတၢ်သိးစ့ၢ်ကီးတအိၣ်နီတမံၤလၢၤဘၣ်ႉ အိၣ်တ့ၢ်က့ၤထဲဖျီၣ်ခံဖုၣ်ခီၣ်တဘ့ၣ်ဒီးဆ့ကၤတဘ့ၣ်လီၤႉ ယဟံၣ်ဖိဃီဖိအိၣ်် ၄ ဂၤလီၤႉ ယမါႇယဖိႇယမုဂါသးၦၢ်တဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ကီၢ်ဆၢဘၣ်ကီဘၣ်ကီဘၣ်ခဲဒဲက၀ီၤတဖၣ််အပူၤ တၢ်ဆၢကတီၢ်မ့ၢ်တုၤဃီၤလၢတၢ်ကိၢ်ဒိၣ်အဆၢကတီၢ်န့ၣ် မ့ၣ်အူအီၣ်တၢ်ကဲထီၣ်သးအိၣ်၀ဲတလီၢ်လီၢ်ဒီး တကီၢ်ခါဘၣ်ထွဲဒီးမ့ၣ်အူအီၣ်တၢ်ကဲထီၣ်သးတခီန့ၣ် တၢ်တသ့ၣ်ညါ၀ဲလီၤတံၢ်လီၤဆဲးဒံးဘၣ်အဂ့ၢ်န့ၣ် ၦၤအိၣ်ဒဲက၀ီၤအပူၤတဖၣ် စံး၀ဲန့ၣ်လီၤႉ