လါဖ့ၤဘြူၤအါရံၤ ၅ သီႇ ၂၀၂၁ နံၣ်ႇ ခ့ၣ်အဲးစံၣ်
ကညီဒီကလုာ်ပၣ်တံၣ်အံၤ ဒ်သိးကနုာ်လီၤပၣ်ဃုာ်လၢပဒိၣ်ကရူၢ်ကျါအဂီၢ် ဖဲလါဖ့ၤဘြူၤအါရံၤ ၄ သီအနံၤန့ၣ် လၢၦၤအခၢၣ်သးတဆီဟဲဃ့ထီၣ်၀ဲဘၣ်ဆၣ် တတူၢ်၀ဲဘၣ်အဂ့ၢ်န့ၣ် KNP ၦၤဘၣ်မူဘၣ်ဒါတဂၤ ပာ်ဂၢၢ်ပာ် ကျၢၤစံးဘၣ်အဲးစံၣ်န့ၣ်လီၤႉ
“ဟဲတဲ၀ဲဖဲမဟါ ဒ်သိးကနုာ်လီၤပၣ်ဃုာ်လၢပဒိၣ်အကရူၢ်(ထံကီၢ်တၢ်ပၢတၢ်ပြးကီၣ်ကး)အကျါအဂီၢ် ဟဲဃ့ထီၣ်၀ဲလီၤႉ ယဆိကမိၣ်ဒု ကဘၣ်မ့ၢ်ကီၢ်ခီအပတီၢ်လီၤႉ ပ၀ဲသ့ၣ်တဖၣ်လၢတၢ်ဃုထၢအခါလံၤလံၤန့ၣ် ပၣ်တံၣ်ဖိတဖၣ်အဂံၢ်အဘါလၢာ်၀ဲဒၣ်ဒီး တၢ်ဆဲးကျိးဆဲးကျၢစှၤ၀ဲလီၤႉ မ့ၢ်ဘၣ်တဲန့ၣ် လၢကမၤအဂီၢ်ဂံၢ် ဘါစှၤ၀ဲအဃိ တၢ်ကတဲာ်ကတီၤတအိၣ်ဒံးဘၣ်အဂ့ၢ် က့ၤစံးဆၢကဒါလီၤ” အဂ့ၢ်န့ၣ် ပၣ်တံၣ်ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်န့ၣ်လီၤႉ
တကီၢ်ခါ ကညီပၣ်တံၣ်လၢအဂၤတခါလၢအမ့ၢ် KPP ၦၤပၢၤလီၢ်ဆ့ၣ်နီၤ စီၤထိအီၤမၠ့ၣ်အံၤ တၢ်တူၢ်လိာ်ဟ့ၣ်မူဟ့ၣ်ဒါလၢ ထံကီၢ်တၢ်ပၢတၢ်ပြးကီၣ်ကးပဒိၣ်အဖီလာ် ကလုာ်ဒူၣ်ဂ့ၢ်၀ီကိတိာ်၀ဲၤကျိၤ ကီၢ်စၢဖှိၣ်ကိတိာ်အဂ့ၢ်န့ၣ် ထုးထီၣ်ဘိးဘၣ်ရၤလီၤတၢ်ကစီၣ်န့ၣ်လီၤႉ
လၢန့ၣ်အမဲာ်ညါ ဖဲအပူၤကွံာ် ၂၀၂၀ တၢ်ဃုထၢဖးဒိၣ်အခါန့ၣ် ခ့ၣ်အဲၣ်ယူၣ်လီၢ်ခၢၣ်သးပၢဆှၢတၢ်မံးတံာ်လီၢ်လံၤ မါည့မီၣ် လၢအဒိးဃုထၢသးလၢကမျၢၢ်ဘျီၣ်ဒိၣ်ခၢၣ်စး ဖဲအ့ၣ်ယၣ်၀တံၣ် ပါတနီၤကီၢ်ဆၣ် လၢ KPP ပၣ်တံၣ်အခၢၣ်စးအံၤစ့ၢ်ကီး ဘၣ်တၢ်ဟ့ၣ်မူဟ့ၣ်ဒါအီၤလၢလီၢ်ခၢၣ်သးအပတီၢ် ထံကီၢ်တၢ်ပၢတၢ်ပြးကီၣ်ကးကရူၢ်အကျါန့ၣ်လီၤႉ
ဒ်န့ၣ်သိး လၢကနုာ်လီၤပၣ်ဃုာ်လၢ ထံကီၢ်တၢ်ပၢတၢ်ပြးကီၣ်ကးပူၤ ပဒိၣ်ကရူၢ်ဖိအလီၢ်တခါခါအဂီၢ် ဟဲဃ့ထီၣ်၀ဲ ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ် (KNDP) အိၣ်စ့ၢ်ကီး၀ဲအသိး ၦၤတဂၤလၢ်လၢ်လၢ မ့ၢ်လဲၤမၤသကိးတၢ်ဒီး သုးမီၤစိရိၤ ပဒိၣ်ကရူၢ်န့ၣ် တၢ်ကဆိကတီၢ်ကံ၁်အမူအဒါလၢပၣ်တံၣ်ပူၤအဂ့ၢ်န့ၣ် ပၣ်တံၣ်ခိၣ် မါအီၤပၠံၤစိ စံး၀ဲဒၣ်ဖဲတနံၤအံၤ(လါဖ့ၤဘြူၤအါရံၤ ၅ သီ)န့ၣ်လီၤႉ
