Home တၢ်ကစီၣ် လၢၢ်ဒိၣ်ဟီၣ်က၀ီၤအပူၤ သးစၢ်ခံဂၤယီၢ်ဘၣ်မ့ၣ်ပိၢ်ဒီးသံ၀ဲ

လၢၢ်ဒိၣ်ဟီၣ်က၀ီၤအပူၤ သးစၢ်ခံဂၤယီၢ်ဘၣ်မ့ၣ်ပိၢ်ဒီးသံ၀ဲ

315
0

လါမးရှး ၃ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲလါမးရှးထီၣ် ၁ သီအနံၤန့ၣ် ကညီသးစၢ် ၂ ဂၤလၢအအိၣ်ဖဲ မုၢ်သဲးသ၀ီႇလၢၢ်ဒိၣ်ကီၢ်ဆၣ်ႇ သုးက့ ၃ တၢ်ပၢအပူၤအံၤ ဖဲအ၀ဲသ့ၣ်ကလဲၤၦ့ၤတၢ်ဖိတၢ်လံၤလၢလၢၢ်ဒိၣ်၀့ၢ်အဆၢကတီၢ် ယီၢ်ဘၣ်၀ဲဒၣ်မ့ၣ်ပိၢ်ဒီးသံ၀ဲ ၂ ဂၤလၢာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ၦၤဘှီသိလ့ၣ်ယီၢ်ဖိပိာ်ခွါတဂၤဒီးအသကိးပိာ်မုၣ်တဂၤအံၤ ဖဲလါမးရှး ၁ သီ ဂီၤခီ ၇ နၣ်ရံၣ်ဘျဲၣ်အဆၢကတီၢ်န့ၣ် ဒ်သိးကလဲၤၦ့ၤတၢ်ဖိတၢ်လံၤလၢလၢၢ်ဒိၣ်၀့ၢ်အဂီၢ် ဖဲအ၀ဲသ့ၣ်ဟးထီၣ်လၢသ၀ီချၢအကတီၢ် ဘၣ်၀ဲဒီးမ့ၣ်ပိၢ်အဃိသံ၀ဲဒၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကျဲလၢသးစၢ် ၂ ဂၤဘၣ်၀ဲဒီးမ့ၣ်ပိၢ်အံၤန့ၣ် မ့ၢ်ကျဲမုၢ်လၢ KNU တဟ့ၣ်အခွဲးလၢကဟးထီၣ်က့ၤလီၤဘၣ်ဒီး မ့ၣ်ပိၢ်လၢတၢ်ဒိးလီၤဃာ်၀ဲအံၤစ့ၢ်ကီး မ့ၢ်မတၤဒိးလီၤဃာ်လဲၣ်န့ၣ်တသ့ၣ်ညါဒံးဘၣ်အဂ့ၢ်န့ၣ် Free Burma Rangers (FBR) ကရူၢ် မူဒါခိၣ် စီၤကျၢၤမူထူ စံး၀ဲန့ၣ်လီၤႉ

“ကျဲန့ၣ် KNU ကးတံၢ်ဃာ်၀ဲႇၦၢ်သးစၢ်ခံဂၤအံၤ ဃ့အခွဲးလၢပယီၤသုးအအိၣ်ဒီးလဲၤ၀ဲလီၤႉ တၢ်ကဲထီၣ်သးန့ၣ် ဖဲလါမးရှး ၁ သီ ဂီၤခီလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ် ဖဲလါမးရှး ၂ သီအနံၤန့ၣ်လီၤႉ

တၢ်လီၢ်လၢတၢ်ကဲထီၣ်သးအလီၢ်န့ၣ်မ့ၢ်တၢ်လီၢ်လၢ ခ့ၣ်အဲၣ်ယူၣ်ဒီးပယီၤသုးတဖၣ်အဘၢၣ်စၢၤ သုးတၢ်ဖ့ၣ်ဆၢအိၣ်၀ဲဒၣ်အသိး ဖဲအပူၤကွံာ် လါဒံၣ်စ့ဘၢၣ်လၢာ်အခါစ့ၢ်ကီး တၢ်ကဲထီၣ်သး လၢခံခီခံကပၤတၢ်ခးလိာ်သးအဃိ လီၢ်က၀ီၤသ၀ီဖိလၢအကထိ ဘၣ်စံၣ်မှံဟးဖျိး၀ဲဒၣ်လၢၦၢ်လၢ်ကျါဒီး တုၤလၢခဲအံၤတစုတက့ၤဘၣ်ဒံးလၢအနီၢ်ကစၢ်တၢ်လီၢ်တၢ်ကျဲဒံးဘၣ်န့ၣ်လီၤႉ