လါမးရှး ၅ သီႇ ၂၀၂၁ နံၣ်ႇ ခ့ၣ်အဲးစံၣ်
ဒ်သိးသုးမီၤစိရိၤကလီၤၦီၢ်ကွံာ်အဂီၢ်ဒီးပယီၤသုးကထုးကွံာ်သုးကလၢၤအဂီၢ် ဖဲတနံၤအံၤ လါမးရှး ၅ သီအနံၤန့ၣ် KNU-ညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်ဟီၣ်က၀ီၤ(သုးက့ ၅ )အပူၤ ကမျၢၢ်ထံဖိကီၢ်ဖိ ၁ ကလးဘျဲၣ် လဲၤပာ်ဖျါထီၣ်သး ဖဲဖၣ်ပူၣ်ႇ ကမၤမိၢ်ကျဲမုၢ်ဖီခိၣ်န့ၣ်လီၤႉ
ဒ်သိးပယီၤသုးကလၢၤလၢအိၣ်ဟီၣ်က၀ီၤဖဲန့ၣ်အပူၤတဖၣ်ကထုးကွံာ်သးအဂီၢ် ကမျၢၢ်တဖၣ်မၤ၀ဲတၢ်ပာ်ဖျါထီၣ်သးအိၣ်၀ဲတလီၢ်လီၢ်အသိး ခီဖျိထီဒါစ့ၢ်ကီးသုးဟံးဆူၣ်ကွံာ်တၢ်စိတၢ်ကမီၤအဃိ ဘၣ်ပာ်ဖျါထီၣ်ကဒီးသးအဂ့ၢ်န့ၣ် ၦၤလၢအပၣ်ဃုာ်လၢတၢ်ပာ်ဖျါထီၣ်သးအပူၤတဖၣ် စံးဘၣ်ခ့ၣ်အဲးစံၣ်န့ၣ်လီၤႉ
ၦၤလၢအလဲၤပာ်ဖျါထီၣ်သးတဖၣ်မ့ၢ်၀ဲ KNU မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ်ဒီးဘုသိၣ်ကီၢ်ဆၣ်အပူၤ ဒူသ၀ီကရူၢ် ၁၃ ကရူၢ်ပၣ်ဃုာ်၀ဲဒီး ဒ်သိးကမျၢၢ်တဖၣ်ကပာ်ဖျါထီၣ်သးလၢတၢ်မုာ်တၢ်ခုၣ်အပူၤကန့ၢ်အဂီၢ် လၢအကပိၤကပၤန့ၣ် ပထံၣ်ဘၣ်လၢ KNU သုးကရူၢ်တဖၣ်ဟံးန့ၢ်၀ဲတၢ်ဘံၣ်တၢ်ဘၢတဖၣ်န့ၣ်လီၤႉ
လၢတၢ်ပာ်ဖျါထီၣ်သးအပူၤ ကမျၢၢ်တဖၣ်ကိးသတြီဃ့ထီၣ်၀ဲတၢ်ဂ့ၢ်လၢအမ့ၢ် မ်ကလုာ်ဒိၣ်စိသနူဒီး သုးမီၤစိရိၤသနူကလီၤၦီၢ်ကွံာ်ႇ ပျၢ်လီၤကွံာ်ခိၣ်နၢ်ခဲလၢာ်လၢတၢ်ဖီၣ်ဃာ်၀ဲတဖၣ်ႇ တၢ်ကဘၣ်တြူၢ်ကွံာ် ၂၀၀၈ တၢ်ဘျၢသဲစးခိၣ်သ့ၣ်ႇ ဒ်သိးကဒိးန့ၢ်ဘၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ဒီးနီၢ်ကစၢ်တၢ်ပၢလီၤသးခွဲးယာ်အဂီၢ်ႇ ထုးကွံာ်သုးကလၢၤခဲလၢာ်လၢအိၣ်ဟီၣ်က၀ီၤအပူၤတဖၣ် ဒီး ဟီၣ်ခိၣ်ဘီမုၢ်စၢဖှိၣ်ကရၢတဘၣ်ပာ်ဖှိၣ်မၤသကိးတၢ်ဒီးသုးကီၣ်ကးလၢအတဖိးသဲစးဘၣ်န့ၣ် ဃ့ထီၣ်၀ဲန့ၣ်လီၤႉ
လၢန့ၣ်အမဲာ်ညါ လၢ KNU တၢ်ပၢဟီၣ်က၀ီၤ သုးက့ ၅ အပူၤန့ၣ် တၢ်လီၢ်လၢဟ့ၣ်တၢ်ဖးန့ၢ်အိၣ်၀ဲစှၤဘၣ်ဆၣ် ခီဖျိလၢထီဒါ၀ဲသုးဟံးဆူၣ်ကွံာ်ထံကီၢ်တၢ်စိတၢ်ကမီၤလၢ ဒံၣ်မိၣ်ခြ့ၣ်စံၣ်ပဒိၣ်ခိၣ်နၢ်တဖၣ် လၢကမျၢၢ်ထံဖိကီၢ်ဖိဃုထၢပာ်ထီၣ်၀ဲအံၤအဃိ ဘၣ်ပာ်ဖျါထီၣ်တၢ်ဘၣ်သးန့ၣ်လီၤႉ
