လါမးရှး ၃ သီႇ ၂၀၂၁ နံၣ်ႇ ခ့ၣ်အဲးစံၣ်
တကီၢ်ခါ တၢ်ထီဒါမၤ၀ဲသုးမီၤစိရိၤသနူ (CDM)တၢ်ဟူးတၢ်ဂဲၤအပူၤ ပယီၤသုးမုၢ်ဒိၣ်အဂၤ ၁၀ ဘျဲၣ် လၢအအိၣ်ဆီလီၤအသး ဖဲခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤတဖၣ် ဟဲနုာ်လီၤပၣ်ဃုာ်လၢ(CDM)တၢ်ဟူးတၢ်ဂဲၤပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခ့ၣ်အဲၣ်ယူၣ်(သုးက့ ၅)ၦၤကတိၤတၢ်ပၢ ပဒိၣ်မါမါမါ စံး၀ဲလၢ “ခဲအံၤန့ၣ်အိၣ်၀ဲ ၁၀ ဘျဲၣ်လံမီၤနီၤႉ ကဟဲဒံးခါဆူညါအိၣ်ဒံး၀ဲသ့လီၤႉ မီၤစိရိၤသုးကရူၢ်အတၢ်ဖံးတၢ်မၤအဖီခိၣ်အံၤန့ၣ် ၦၤမၤတၢ်ဖိမုၢ်ဆ့ၣ်မုၢ်ဂီၤလၢအဘၣ်ထွဲ၀ဲၤကျိၤတဖၣ်အကးဘၣ် ပယီၤသုးဖိတဖၣ်စ့ၢ်ကီးသ့ၣ်ညါထီၣ်၀ဲလံႉ တၢ်သ့ၣ်တဖၣ်အံၤဘၣ်တဲလၢန့ၢ်ဂံၢ်န့ၢ်ဘါသဂၢၢ်၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ပယီၤသုးလၢအဟဲနုာ်လီၤပၣ်ဃုာ်လၢ CDM တၢ်ဟူးတၢ်ဂဲၤအကျါတဖၣ်န့ၣ် အါဒၣ်တက့ၢ်န့ၣ်မ့ၢ်ၦၤတဖၣ်လၢအသးနံၣ်အိၣ်အနံၣ်တဆံဘျဲၣ်သုးဖိအပတီၢ်ဒီး တနီၤန့ၣ်ဟဲစိာ်ဃုာ်၀ဲဒီးတၢ်စုက၀ဲၤဒီး တကီၢ်ခါခဲအံၤ အ၀ဲသ့ၣ်တၢ်ဘံၣ်တၢ်ဘၢအဂီၢ်ဒီး တၢ်အိၣ်တၢ်ဆိးတၢ်အီၣ်တၢ်အီအဂီၢ် ခ့ၣ်အဲၣ်ယူၣ် သုးက့ ၅ ရဲၣ်ကျဲၤ၀ဲအဂ့ၢ်န့ၣ် ပဒိၣ်မါမါ စံးအါထီၣ်၀ဲန့ၣ်လီၤႉ
ဖဲလါဖ့ၤဘြူၤအါရံၤ ၂၆ သီအနံၤ ဒ်ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)လံာ်ထုးထီၣ်ပာ်ဖျါအပူၤန့ၣ် ခီဖျိလၢသုးဟံးဆူၣ်ကွံာ်တၢ်စိတၢ်ကမီၤအဃိ ကယဲၢ်မ့ၢ်ကမျၢၢ်လၢအပာ်ဖျါထီၣ်သးလၢတၢ်မုာ်တၢ်ခုၣ်အပူၤတဖၣ် ကတူၢ်လိာ်ဟ့ၣ်ဂံၢ်ဟ့ၣ်ဘါဆီၣ်ထွဲ၀ဲဒီး ဃ့ထီၣ်သုးမီၤစိရိၤပဒိၣ်လၢ တဘၣ်သူ၀ဲတၢ်စုဆူၣ်ခီၣ်တကးႇဖီၣ်တၢ်ဒီးလိာ်ဘၢလိာ်ကွီၢ်ကမျၢၢ်လၢ အပာ်ဖျါထီၣ်သးလၢတၢ်မုာ်တၢ်ခုၣ်အပူၤတဖၣ်ဘၣ်န့ၣ်လီၤႉ
