လါမ့ၤ ၃ သီႇ ၂၀၂၁ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်= ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် သုးက့(၁)ဟီၣ်က၀ီၤအပူၤ စးထီၣ်ဖဲသုး ကီၣ်ကးဒီးသုးခိးကီၢ်ဆၢ -BGF ပာ်ဖှိၣ်ထီၣ်သးဟူးဂဲၤအလီၢ်ခံ တၢ်ဒုးကဲထီၣ်၀ဲဒၣ်ဒီး KNU သုးက့(၁) စုဒုၣ်တီၤအဖီလာ်တဖၣ်ကိးမုၢ်နံၤဒဲးအဂ့ၢ်န့ၣ် သ့ၣ်ညါဘၣ်လၢ ခ့ၣ်အဲၣ်ယူၣ် လီၢ်က၀ီၤခိၣ်နၢ်အအိၣ်န့ၣ်လီၤႉ
ဖဲအပူၤကွံာ်စးထီၣ်ဖဲလါအ့ဖြ့ၣ် ၂၃ သီ တုၤလၢ လါအ့ဖြ့ၣ် ၃၀ သီအနံၤ တၢ်ဒုးကဲထီၣ်၀ဲလၢ သုးက့(၁)ဟီၣ်က၀ီၤအပူၤကိးမုၢ်နံၤဒဲးဒီး သုးကီၣ်ကးဒီး သုးခိးကီၢ်ဆၢ -BGF သုးတဖၣ်ဖှိၣ်ထီၣ်သး ပညိၣ်ခးလီၤကျိဖးဒိၣ်တဖၣ်ဆူဒူသ၀ီပူၤအိၣ်၀ဲအဂ့ၢ်န့ၣ် KNU ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤစိမၠ့ၣ်စံး၀ဲဒ်အံၤန့ၣ်လီၤႉ
“တၢ်ဒုးဒုကဲထီၣ်ကိးမုၢ်နံၤဒဲးလီၤႉ မ့ၢ်တသးမံဘၣ်န့ၣ် ဖီၣ်စုက၀ဲၤကဒဲကဒဲခးတမ့ၢ်ဘၣ်ဒီး ခးလီၤ၀ဲဒၣ်ကျိဖးဒိၣ်လၢဒူသ၀ီအပူၤလီၤႉ ဖဲလါမးရှး ၃၀ သီအနံၤစ့ၢ်ကီး ခးလီၤ၀ဲကျိဖး ဒိၣ်လၢထိဘိၣ်ႇ နိၣ်ဖးလဲၢ်သ၀ီပူၤလီၤႉ လၢ(ဒေါင်း)သ၀ီတကပၤစ့ၢ်ကီးခး၀ဲလီၤႉ တၢ်ဘၣ်ဒိဘၣ်ထံးမ့ၢ်အိၣ်န့ၣ်ဘၣ်ဒိ၀ဲလၢကမျၢၢ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ခီဖျိသုးမီၤစိရိၤအသုးခးလီၤကျိဖးဒိၣ်ကျိဖိတဖၣ်လၢသ၀ီပူၤအဃိ ဟံၣ်ဃီဟးဂီၤ၀ဲဒီး သ၀ီပူၤသူၣ်က့သးၦၢ်ႇ ပိာ်မုၣ်ပိာ်မၢၤဒီးဖိဒံဖိသၣ်တဖၣ် ဘၣ်သုးလီၢ်သုးကျဲဆူတၢ်လီၢ်အဂၤန့ၣ်လီၤႉ
KNU သုးက့(၁) ဒူသထူၣ်ကီၢ်ရ့ၣ် ကီၢ်ဆၣ် ၄ ဘ့ၣ်အပူၤ တၢ်ခးလိာ်သးကဲထီၣ်၀ဲကိးမုၢ်နံၤဒဲးအသိး လၢဒူသထူၣ်ႇကၠဲၣ်ထိၤဒီးဖၣ်အၣ်ကီၢ်ဆၣ်(ဒိၤသမံၣ်မုၢ်ထီၣ်တကပၤ)တၢ်ခးလိာ်သးကဲထီၣ်အမဲာ်ညါ သုးကီၣ်ကးဒီး BGF မၤအါထီၣ်သုးဂံၢ်ဘါဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲအပူၤကွံာ် လါအ့ဖြ့ၣ် ၂၃ သီအနံၤ ခီဖျိသုးမီၤစိရိၤအသုးခးလီၤကျိဖးဒိၣ်လၢ ဘံလ့ကီၢ်ဆၣ် စွ့ၤယီၤပၠၣ်ႇ မယါကိသ၀ီတကပၤအဃိ လီၢ်က၀ီၤကမျၢၢ်ဘၣ်ဒိ ၁ ဂၤဒီး သံ၀ဲ ၁ ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲတၢ်တနံၤဃီအ၀ဲန့ၣ် ၀့ၢ်တကူၣ်=ဒူသထူၣ်ကျဲမုၢ်ဖးဒိၣ်အကပၤ လီၢ်က၀ီၤကမျၢၢ်ထံဖိကီၢ်ဖိမၤ ၀ဲတၢ်တူၢ်လိာ်ဆီၣ်ထွဲ ဒီကလုာ်တၢ်ဃူတၢ်ဖိးပဒိၣ်ကရူၢ် -NUG အခါ ခီဖျိ KNLA သုးက့(၁) စုဒုၣ်တီၤအဖီလာ်သုးကရူၢ်လၢအဟံးန့ၢ်၀ဲကမျၢၢ်တၢ်ဘံၣ်တၢ်ဘၢဒီး သုးမီၤစိရိၤအသုးတဖၣ်အဘၢၣ်စၢၤ ဘၣ်သဂၢၢ်ခးလိာ်သးအဃိ သုးမီၤစိရိၤအသုးတကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
