သုးက့(၅)အပူၤ တၢ်ဒုးကဲထီၣ် သုးမီၤစိရိၤအသိလ့ၣ်လီၤတကျၢၢ်ဒီး သိလ့ၣ်ပူၤ အၦၤသံ ၇ ဂၤလၢာ်

လါမ့ၤ ၆ သီႇ ၂၀၂၁ နံၣ်ႇ ခ့ၣ်အဲးစံၣ်

ဖဲလါမ့ၤ ၄ သီအနံၤ ဖၣ်ပူၣ်၀့ၢ်ကပၤ ကညီဒီကလုာ်စၢဖှိၣ်ကလရၢ -KNU သုးက့(၅)စုဒုၣ်တီၤအဖီလာ်သုးတဖၣ်ဒီး မီၤစိရိၤသုးတဖၣ်အဘၢၣ်စၢၤတၢ်ခးလိာ်သးကဲထီၣ်ဒီး မီၤစိရိၤအသုးသိလ့ၣ်တခိၣ်လီၤတကျၢၢ်၀ဲအဃိ သုးကီၣ်ကးအသုး(၇)ဂၤလၢာ်လၢအပၣ်ဃုာ်လၢသိလ့ၣ်ပူၤတဖၣ် သံကွံာ်၀ဲခဲလၢာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲလါမ့ၤ ၄ သီ မုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ် ဖၣ်ပူၣ်ဒီးခီပူၤအဘၢၣ်စၢၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA ဒီး မီၤစိရိၤအသုးတဖၣ်အဘၢၣ်စၢၤတၢ်ခးလိာ်သးကဲထီၣ်ဒီး သုးကီၣ်ကးအသိၣ်လ့ၣ်လီၤတကျၢၢ်၀ဲအဂ့ၢ်န့ၣ် သုးက့(၅) ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ “ဖဲလါမ့ၤ ၄ သီ ဟါခီအဆၢကတီၢ် ဒ်ၦၤဆှၢထီၣ်န့ၢ်ယၤတၢ်ကစီၣ်အသိး ပၦၤတဖၣ်ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်လီၤႉ ကဲထီၣ်၀ဲဖဲဖၣ်ပူၣ်ဒီးခီပူၤအဘၢၣ်စၢၤလီၤႉ ကဲထီၣ်ဖဲမုၢ်ထူၣ် ၁၂ နၣ်ရံၣ်အဆၢကတီၢ်လီၤႉ တၢ်ကဲထီၣ်သးအပူၤပယီၤသုးသိလ့ၣ်တကျၢၢ်တခိၣ်လီၤႉ သိလ့ၣ်တခိၣ်န့ၣ်ၦၤပၣ်၀ဲဒၣ် ၇ ဂၤႇ သံ၀ဲဒၣ် ၇ ဂၤလၢာ်လီၤႉ သိၣ်လ့ၣ်ဟးဂီၤ၀ဲဒီတခိၣ်ညါလီၤႉ ၦၤဆၢထီၣ်န့ၢ်ၦၤတၢ်ကစီၣ်လၢ ပ၀ဲသ့ၣ်တကပၤဒုတၢ်ဘၣ်ဒိဘၣ်ထံးတအိၣ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါ ဖဲလါမ့ၤ ၄ သီ ဟါခီအဆၢကတီၢ်စ့ၢ်ကီး ကဘီယူၤ ဟဲယူၤ၀ဲတဘ့ၣ်ခး၀ဲတၢ်တအိၣ်ဒံးဘၣ်အဂ့ၢ်ဒီး တကီၢ်ခါခဲအံၤ ခီဖျိခ့ၣ်အဲၣ်ယူၣ် တကပၤကးတံၢ်ဃာ်အ၀ဲသ့ၣ်တၢ်အီၣ်တၢ်အီကျဲတဖၣ်အဃိ ကျဲလၢကမျၢၢ်လ့ၢ်ထီၣ်လ့ၢ်လိၤ အလီၢ်န့ၣ်မီၤစိရိၤအသုးတဖၣ်က့ၤကးတံၢ်ကဒါ၀ဲအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲန့ၣ်လီၤႉ

စးထီၣ်ဖဲအပူၤကွံာ် လါမးရှး ၂၇ သီ တုၤလၢ လါမ့ၤထီၣ် ၄ သီအနံၤတစု ခ့ၣ်အဲၣ်ယူၣ် သုးက့(၅)ဒီး မီၤစိရိၤအသုးတဖၣ်အဘၢၣ်စၢၤ တၢ်ဒုးကဲထီၣ်အိၣ်၀ဲ(၄၀၇)ဘျီဒီး သုးကီၣ်ကးတကပၤသံ၀ဲ(၁၉၄)ဂၤႇ ဘၣ်ဒိၣ်(၂၂၀)ဘျဲၣ်ဒီး မ့မ့ၢ်ခ့ၣ်အဲၣ်ယူၣ်တကပၤ သံ၀ဲ ၉ ဂၤဒီး ဘၣ်ဒိ ၁၀ ဂၤအဂ့ၢ်န့ၣ် ခ့ၣ်အဲၣ်ယူၣ် သုးက့(၅)စံး၀ဲန့ၣ်လီၤႉ

ဖဲအပူၤကွံာ် လါမးရှး ၂၉ သီအနံၤစ့ၢ်ကီး ဖဲလူၢ်ပျဲၢ်ကီၢ်ဆၣ်အပူၤ ၀ၣ်ကျဲခိၣ်တၢ်လီၢ် သုးကီၣ်ကးအသိလ့ၣ်တခိၣ်လၢအတီၣ်၀ဲ ခီၣ်ချ့သုးရ့ၣ်(ခမရ=၄၀၈)အံၤလီၤတကျၢၢ်၀ဲဒီး သုးကီၣ်ကးအသုးအဂၤ ၂၀ ဃၣ်ဃၣ် ဘၣ်ဒိဘၣ်ထံးသံ၀ဲဒၣ်ဒံးန့ၣ်လီၤႉ