လါမ့ၤ ၅ သီႇ ၂၀၂၁ နံၣ်ႇ ခ့ၣ်အဲးစံၣ်
ဒ်သိးကလဲၤဆှၢမၤစၢၤမီၤစိရိၤအသုးတဖၣ်တၢ်အီၣ်တၢ်အီအဂီၢ် သုးခိးကီၢ်ဆၢ -BGF သုးတဖၣ် ဟဲတုၤ၀ဲဒၣ်လၢ KNU- ကညီဒီကလုာ်စၢဖှိၣ်ကရၢ သုးက့(၅)ဟီၣ်က၀ီၤအါအါဂီၢ်ဂီၢ်အဂ့ၢ်န့ၣ် သုးက့(၅)တကပၤ စံး၀ဲန့ၣ်လီၤႉ
ခီဖျိသုးတၢ်အီၣ်တၢ်အီတလၢတၦဲၤဘၣ်ဒီး တၢ်ကးတံၢ်ဃာ်၀ဲတၢ်အီၣ်တၢ်အီအကျဲတဖၣ်အဃိ ဒ်သိးကလဲၤဆှၢမၤစၢၤ၀ဲမီၤစိရိၤအသုးကလၢၤလၢအအိၣ်ဖဲသုးက့(၅)ဟီၣ်က၀ီၤပူၤတဖၣ်တၢ်အီၣ်တၢ်အီအဂီၢ် သုးခိးကီၢ်ဆၢ(BGF)တဖၣ် စးထီၣ်ဖဲအပူၤကွံာ်စှၤသီန့ၣ် သုးနီၣ်ဂံၢ် ၅၀၀ ဘျဲၣ် ဟဲတုၤ၀ဲဒၣ်လၢကမၤမိၢ်၀့ၢ်အဂ့ၢ်န့ၣ် ခ့ၣ်အဲၣ်ယူၣ် သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤႉ
အ၀ဲစံး၀ဲ“ဖဲအပူၤကွံာ်တနွံန့ၣ် ဒ်ပဒိးန့ၢ်ဘၣ်တၢ်ကစီၣ်အသိး ပနၢ်ဟူလၢဃုာ်ဒီးပယီၤသုးနီၣ်ဂံၢ် ၁၅၀ ဂၤဃၣ်ဃၣ် ဟဲထီၣ်၀ဲလီၤႉ ဖဲလါမ့ၤ ၃ သီအနံၤစ့ၢ်ကီး သုးဂံၢ်ဘါဟဲအါထီၣ်ကဒီး(၄၀၀)ဘျဲၣ်လီၤႉ အဃိန့ၣ် ဖဲအံၤကအိၣ်၀ဲဒၣ် ၅၅၀ ညါမီၤနီၤႉ လၢအံၤတကပၤခီဒု လၢကဟဲဆှၢသုးတၢ်အီၣ်တၢ်အီတဖၣ်အဂီၢ်မၤစၢၤ၀ဲမီၤနီၤႉ တနီၤန့ၣ်လဲၤထီၣ်၀ဲဒၣ်လၢသုးက့(၁)တကပၤဒီး လဲၤပာ်ဖှိၣ်မၤသကိးတၢ်ဒီးပယီၤသုးလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ
သုးခိးကီၢ်ဆၢ(BGF)လၢအဟဲတုၤ၀ဲဒၣ်ခဲအံၤတဖၣ်န့ၣ် မ့ၢ်မတဂၤတီခိၣ်ရိၣ်၀ဲဒီးမ့ၢ်မနုၤသုးရ့ၣ်တဖၣ်လဲၣ်န့ၣ် တ သ့ၣ်ညါဘၣ်လီၤတံၢ်လီၤဆဲးဒံးဘၣ်အဂ့ၢ်ဒီး သုးရ့ၣ်လၢအအိၣ်ပာ်စၢၤလၢညါတဖၣ်န့ၣ် မ့ၢ်၀ဲဒၣ် (၁၀၁၃)သုးရ့ၣ် ဒီး (၁၀၁၄)သုးရ့ၣ်တဖၣ်လီၤဒီး သုးလၢအဟဲတုၤ၀ဲခဲအံၤတဖၣ် ဆီလီၤသုးကလၢၤအိၣ်ဒံး၀ဲဒၣ်လၢကမၤမိၢ်ဒံးအဂ့ၢ်န့ၣ် KNU စံး၀ဲန့ၣ်လီၤႉ
နၢ်ဟူလၢ သုးခိးကီၢ်ဆၢ(BGF)တဖၣ် စးထီၣ်ဟဲတုၤ၀ဲဒၣ်ဖဲအပူၤကွံာ်တနွံဘၣ်ဆၣ် လၢအ၀ဲသ့ၣ်တကပၤ ကဟးထီၣ်လၢတၢ်ချၢအဂီၢ် ဘၣ်ပျံၤတၢ်ဖုးတၢ်အဃိ သုးဂံၢ်ဘါလၢအဟဲတုၤတဖၣ်ဒီးတၢ်လီၢ်လၢအဆီလီၤသုး ကလၢၤအလီၢ်န့ၣ် တဲလီၤတံၢ်တသ့ဒံးဘၣ်အဂ့ၢ်န့ၣ် ကမၤမိၢ်လီၢ်က၀ီၤဖိတဂၤ စံးဘၣ်ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ
အ၀ဲစံး၀ဲလၢ“ဖဲအပူၤကွံာ်တနွံ ၄ သီ ၅ သီအနံၤန့ၣ် ပနၢ်ဟူလၢ(BGF)ဟဲထီၣ်လီၤႉ မ့ၢ်အိၣ်ဆံးအါလဲၣ်ဒုတသ့ၣ်ညါဘၣ်ႉ ခဲအံၤပဟးထီၣ်လၢတၢ်ချၢတဘူၣ်ဘၣ်ႉ တဲဃာ်၀ဲလၢမ့ၢ်လဲၤပိာ်ဘၣ်ဖုးမ့ၢ်ထံၣ်၀ဲလၢတၢ်ချၢန့ၣ်ကခး၀ဲလီၤႉ ဒိးလီၤဃာ်မ့ၣ်ပိၢ်အိၣ်အဃိလဲၤပိာ်အခံတဘူၣ်ဘၣ်”အဂ့ၢ်န့ၣ် စံး၀ဲန့ၣ်လီၤႉ
ဒ်န့ၣ်အသိး လၢခ့ၣ်အဲၣ်ယူၣ် သုးက့(၁)ဟီၣ်က၀ီၤတကပၤစ့ၢ်ကီး သုးခိၣ်ကီၢ်ဆၢ(BGF)ဒီးမီၤစိရိၤအသုးတဖၣ်ပာ်ဖှိၣ်ထီၣ်သးဟဲတုၤ၀ဲဒၣ်လၢအါအါဂီၢ်ဂီၢ်ဒီး ခံခီခံကပၤတၢ်ခးလိာ်သးကဲထီၣ်စ့ၢ်ကီးအိၣ်၀ဲအဂ့ၢ်န့ၣ် KNU သုးက့(၁) စံး၀ဲန့ၣ်လီၤႉ
ဘၣ်ထွဲဒီးတၢ်ဒုးကဲထီၣ်လၢ ခ့ၣ်အဲၣ်ယူၣ် ဟီၣ်က၀ီၤပူၤအကျါတနီၤန့ၣ် တၢ်ကစီၣ်ဟူထီၣ်လၢပၣ်ဃုာ်ဒီးသုးခိးကီၢ်ဆၢတၢ်ဂ့ၢ်အံၤ ကညီကီၢ်စဲၣ်ႇ သုးခိးကီၢ်ဆၢ(BGF) အနဲၣ်ရွဲၣ်ခိၣ်ကျၢၢ် သုးခိၣ်ဒိၣ်စိ စီၤခၠံၣ်သူၤ သမၢ၀ဲအဂ့ၢ်န့ၣ် DVB တၢ်ကစီၣ်သန့ပာ်ဖျါ၀ဲ ဖဲလါမ့ၤ ၃ သီအနံၤန့ၣ်လီၤႉ
စးထီၣ်ဖဲ KNU သုးက့(၅)ထီၣ်ဒုးဟံးန့ၢ်ကွံာ် မီၤစိရိၤအသုးကလၢၤတၢ်လီၢ်(၂)ခါ၀ံၤအလီၢ်ခံ ခီဖျိမီၤစိရိၤအသုးက့ၤခီၣ်ဆၢကဒါလၢကလံၤကျါတၢ်ဒုးအဃိ လီၢ်က၀ီၤကမျၢၢ်ဘၣ်ဒိဘၣ်ထံးသံအိၣ်၀ဲအသိး လီၢ်က၀ီၤထံဖိကီၢ်ဖိကမျၢၢ်လၢအကလးဘၣ်ဃ့ၢ်မှံဟးဖျိး၀ဲဒၣ်န့ၣ်လီၤႉ
