လါမ့ၤ ၂၆ သီႇ ၂၀၂၁ နံၣ်ႇ ခ့ၣ်အဲးစံၣ်
ခီဖျိပယီၤသုးမီၤစိရိၤအသုးဒီး သုးခိးကီၢ်ဆၢ (BGF)သုးပာ်ဖှိၣ်တဖၣ်မၤအါထီၣ်သုးဂံၢ်ဘါအဃိ လၢကညီဒီကလုာ်စၢဖှိၣ်ကရၢ -KNU သုးက့(၅)ဟီၣ်က၀ီၤအပူၤ တၢ်ဒုးဟဲဆူၣ်ထီၣ်၀ဲဒီး လၢလါမ့ၤအတီၢ်ပူၤ တၢ်ဒုးကဲထီၣ်အိၣ်၀ဲအဘျီတကယၤဘျဲၣ်အဂ့ၢ်န့ၣ် KNU တကပၤ စံး၀ဲန့ၣ်လီၤႉ
စးထီၣ်ဖဲလါမ့ၤထီၣ်သီန့ၣ် ခီဖျိသုးမီၤစိရိၤအသုးဒီး BGF သုးပာ်ဖှိၣ်တဖၣ် မၤအါထီၣ်၀ဲသုးဂံၢ်ဘါဒီးဟူးဂဲၤအါထီၣ်၀ဲအဃိတၢ်ဒုးဘၣ်ဟဲဆူၣ်ထီၣ်ဒီး တုၤလၢတနံၤအံၤလါမ့ၤ ၂၆ သီအနံၤတစု တၢ်ဒုးကဲထီၣ်အိၣ်၀ဲအဘျီတကယၤဘျဲၣ်ဒီး သုးမီၤစိရိၤအၦၤသံအိၣ်၀ဲဒၣ်လၢအကယၤအဂ့ၢ်န့ၣ် KNU သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲဒ်အံၤန့ၣ်လီၤႉ
“လၢသုးက့(၅)အပူၤန့ၣ် ခီဖျိပယီၤသုးဆှၢထီၣ်သုးဂံၢ်ဘါဃုာ်ဒီး BGF အဃိ တၢ်ဒုးတၢ်ယၤန့ၣ်တလီၤပတြုာ်သးဘၣ်မီၤနီၤႉ တၢ်ဒုးဆူၣ်ထီၣ်တဆဲးတဆဲးအဃိန့ၣ် တၢ်ခးလိာ်သးန့ၣ်အိၣ်လၢကိးမုၢ်နံၤဒဲးဃၣ်ဃၣ်ညါလီၤႉ စးထီၣ်ဖဲလါမ့ၤထီၣ်တုၤလၢတနံၤအံၤန့ၣ် တၢ်ဒုးကဲထီၣ်အိၣ်၀ဲ ၁၉၃ ဘျီလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ
လၢန့ၣ်အမဲာ်ညါ တၢ်ဒုးကဲထီၣ်အဘျီတကယၤဘျဲၣ်အပူၤန့ၣ် သုးမီၤစိရိၤအၦၤသံ၀ဲ ၁၂၈ ဂၤဒီး ဘၣ်ဒိ၀ဲဒၣ် ၁၈၀ ဂၤအသိး ပယီၤသုးအကသ့ၣ်သံ၀ဲခဲလၢာ် ၁၂ ဒုဒီး သိလ့ၣ်ဟးဂီၤ၀ဲဒၣ် ၉ ခိၣ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲဒၣ်န့ၣ်လီၤႉ
သုးမီၤစိရိၤအၦၤသံအကျါန့ၣ်ပၣ်ဃုာ်၀ဲဒၣ်ဒီး သုးခိၣ်စိ ၁ ဂၤႇသုးစကီၤ ၁ ဂၤႇသုးခိၣ်ဖိ ၁ ဂၤဒီး မ့မ့ၢ်လၢ KNLA သုးက့(၅)တကပၤန့ၣ် သံ၀ဲ ၂ ဂၤႇ ဘၣ်ဒိ ၉ ဂၤဒီး ကမျၢၢ်သံ၀ဲ ၁ ဂၤႇဘၣ်ဒိဘၣ်ထံး၀ဲ ၅ ဂၤအဂ့ၢ်န့ၣ် KNU တကပၤ စံး၀ဲန့ၣ်လီၤႉ
ခီဖျိသုးမီၤစိရိၤတကပၤ ခးလီၤ၀ဲဒၣ်ကျိဖးဒိၣ်(၉၈)ဖျၢၣ်ဆူကမျၢၢ်တၢ်အိၣ်တၢ်ဆိးတၢ်မၤအီၣ်လီၢ်ကျဲအဃိ ဒွဲၣ်အူ၀ဲဒၣ်ထွံၣ်ဂံၢ်အုၣ်သ၀ီ အဟံၣ် ၄ ဖျၢၣ်ႇ ထံဖိဒၢသ၀ီန့ၣ်ဒွဲၣ်အူ၀ဲ ၁ ဖျၢၣ်ဒီး ဒဲ ၆ ဖျၢၣ်ဟးဂီၤ၀ဲန့ၣ်လီၤႉ လၢန့ၣ်အမဲာ်ညါ တဃီၤထၣ်သ၀ီအပူၤဟံၣ်ခိၣ်ကအိၣ်၀ဲအဖျၢၣ် ၄၀ ဃၣ်ဃၣ်န့ၣ်ဒွဲၣ်ဟးဂီၤ၀ဲခဲလၢာ်ဒီး ဟံအီၣ်၀ဲထံဖိကီၢ်ဖိကမျၢၢ်ဟုသးဒီးတၢ်ဖိတၢ်လံၤလၢအဂၤဖၣ်စ့ၢ်ကီးအဂ့ၢ်န့ၣ် KNU တၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ
ခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤ သုးမီၤစိရိၤအသုးကရူၢ်လၢအဟူးဂဲၤ၀ဲတဖၣ်လၢအမ့ၢ် နီၣ်ဂံၢ်(၈)ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ=၄၀၅)ႇ(ခမရ=၄၀၇) ဒီး(ခမရ=၄၀၈)တဖၣ်ဒီး BGF လၢအပာ်ဖှိၣ်ထီၣ်သးဒီးအ၀ဲသ့ၣ်တဖၣ်န့ၣ်မ့ၢ်၀ဲဒၣ် သုးရ့ၣ်(၁၀၁၃)ဒီး(၁၀၁၄)လၢအအိၣ်ဃာ်လၢညါတဖၣ်အမဲာ်ညါ တကီၢ်ခါခဲအံၤ သုးရ့ၣ်(၁၀၁၁)ႇ(၁၀၁၈)ဒီး သုးရ့ၣ်(၁၀၁၉)တဖၣ် ဆှၢအါမၤၦဲၤထီၣ်သုးဂံၢ်ဘါဒီး ခီဖျိဂုာ်ကျဲးစၢးနုာ်လီၤဟူးဂဲၤ၀ဲဆူ KNU ဟီၣ်က၀ီၤပူၤအဃိ တၢ်ဒုးဘၣ်ဟဲကဲထီၣ်ကိးမုၢ်နံၤဒဲးလီၤအဂ့ၢ်န့ၣ် KNU တကပၤ စံး၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ် လါမ့ၤ ၂၄ ဒီး ၂၅ သီအနံၤန့ၣ် သုးခိးကီၢ်ဆၢ(BGF)သုးဒီး KNU သုးက့(၅)စုဒုၣ်တီၤအဖီလာ် KNLA သုးတဖၣ်အဘၢၣ်စၢၤ တၢ်ခးလိာ်သးကဲထီၣ်ဒီး BGF တကပၤ သုးကျိၤခိၣ်သံ၀ဲ ၁ ဂၤဒီး တၢ်ခးလိာ်သးလၢခံတဘျီအပူၤ BGF အသုးသံကဒီး၀ဲ ၂ ဂၤ ဘၣ်ဒိ၀ဲ ၁၁ ဂၤအဂ့ၢ်န့ၣ် KNU တၢ်ဘိးဘၣ်ရၤလီၤတၢ်ကစီၣ်၀ဲၤကျိၤ ထုးထီၣ်ပာ်ဖျါ၀ဲန့ၣ်လီၤႉ
ခီဖျိတၢ်ဒုးဆူၣ်ထီၣ်အဃိ လီၢ်က၀ီၤကမျၢၢ်ထံဖိကီၢ်ဖိလၢအကလးဘၣ်ဃ့ၢ်မှံဟးဖျိးဒံး၀ဲအဖၢမုၢ်ဒီး ခီဖျိတၢ်ဆၢကတီၢ်တုၤဃီၤ၀ဲလၢတၢ်စူၤခါလံအဃိ လိၣ်ဘၣ်၀ဲဒၣ်တၢ်ခိၣ်ဒုးႇ ဂံၢ်ခီၣ်ထံးတၢ်အီၣ်တၢ်အီတဖၣ်ဒီး ကသံၣ်ကသီတဖၣ်အဂ့ၢ်န့ၣ် သ့ၣ်ညါဘၣ်လၢၦၤဂ့ၢ်၀ီတၢ်ကရၢကရိလၢအအိၣ်လၢဟီၣ်က၀ီၤပူၤအအိၣ်န့ၣ်လီၤႉ
